Eżodu

3 U Mosè sar ragħaj tal-​merħla taʼ Ġetro,*+ il-​qassis taʼ Midjan, li kien il-​kunjatu tiegħu.+ Waqt li kien qed jieħu l-​merħla lejn in-​naħa tal-​punent tax-​xagħri, sa fl-​aħħar wasal ħdejn il-​muntanja taʼ l-​Alla l-​veru,+ fil-​Ħoreb.+ 2 Imbagħad l-​anġlu taʼ Ġeħova deherlu fi fjamma tan-​nar f’nofs għollieqa.+ Hekk kif baqaʼ jħares, ara, l-​għollieqa kienet qed taqbad bin-​nar, u madankollu ma bdietx tinħaraq. 3 U Mosè qal: “Ħa nersaq viċin sabiex nara x’inhu dan il-​fenomenu kbir, għala l-​għollieqa ma nħarqitx.”+ 4 Meta Ġeħova rah jersaq viċin biex jara x’inhu, Alla minnufih sejjaħlu minn nofs l-​għollieqa u qallu: “Mosè! Mosè!” u dan wieġbu: “Hawn jien.”+ 5 Qallu: “Tersaqx qrib hawnhekk. Neħħi s-​sandli minn saqajk, għax il-​post fejn int wieqaf hu art qaddisa.”+

6 U ssokta jgħidlu: “Jien l-​Alla taʼ missirijietek, l-​Alla t’Abraham, l-​Alla taʼ Iżakk, u l-​Alla taʼ Ġakobb.”+ Imbagħad Mosè ħeba wiċċu, għax beżaʼ jħares lejn l-​Alla l-​veru. 7 U Ġeħova żied: “Bla dubju jien rajt is-​sofferenza tan-​nies tiegħi li qegħdin l-​Eġittu, u smajt l-​għajta tagħhom minħabba dawk li jġegħluhom jaħdmu iebes; għaliex naf tajjeb kemm qed isofru.+ 8 U se ninżel neħlishom minn id l-​Eġizzjani+ u ntellagħhom u noħroġhom minn dik l-​art għal ġo art tajba u spazjuża, art li tnixxi ħalib u għasel,+ lejn il-​post tal-​Kangħanin, tal-​Ħittin, taʼ l-​Amurrin, tal-​Pereżin, tal-​Ħiwwin, u tal-​Ġebusin.+ 9 U issa, ara, l-​għajta taʼ wlied Israel waslet għandi, u rajt ukoll il-​moħqrija li biha qed jaħqruhom l-​Eġizzjani.+ 10 U issa ejja ħalli nibagħtek għand il-​Fargħun, u toħroġ il-​poplu tiegħi wlied Israel mill-​Eġittu.”+

11 Madankollu, Mosè qal lill-​Alla l-​veru: “Jien min jien biex immur għand il-​Fargħun u noħroġ lil ulied Israel mill-​Eġittu?”+ 12 Hu wieġbu: “Għaliex jien inkun miegħek,+ u dan hu s-​sinjal għalik li jien bgħattek:+ Wara li tkun ħriġt il-​poplu mill-​Eġittu, intom se taqdu lill-​Alla l-​veru fuq din il-​muntanja.”+

13 Minkejja dan, Mosè qal lill-​Alla l-​veru: “Issa suppost li mmur għand ulied Israel u ngħidilhom, ‘L-​Alla taʼ missirijietkom bagħatni għandkom,’ u huma jgħiduli, ‘X’jismu?’+ X’ngħidilhom?” 14 U Alla qal lil Mosè: “JIEN SE NSIR DAK LI RRID INSIR.”+ U żied: “Dan għandek tgħidilhom lil ulied Israel, ‘JIEN SE NSIR bagħatni għandkom.’”+ 15 Imbagħad Alla qal għal darb’oħra lil Mosè:

“Dan għandek tgħidilhom lil ulied Israel, ‘Ġeħova, l-​Alla taʼ missirijietkom, l-​Alla t’Abraham,+ l-​Alla taʼ Iżakk,+ u l-​Alla taʼ Ġakobb,+ bagħatni għandkom.’ Dan hu ismi għal dejjem,*+ u din hi t-​tifkira tiegħi minn ġenerazzjoni għal ġenerazzjoni.+ 16 Mur u iġbor ix-​xjuħ taʼ Israel, u għidilhom, ‘Deherli Ġeħova, l-​Alla taʼ missirijietkom,+ l-​Alla t’Abraham, Iżakk, u Ġakobb, u qalli: “Jien żgur li se ndawwar l-​attenzjoni+ tiegħi lejkom u lejn dak li qed jagħmlulkom fl-​Eġittu. 17 U għalhekk ngħid, se noħroġkom mis-​sofferenza+ li qed jagħmlulkom l-​Eġizzjani u ntellagħkom lejn l-​art tal-​Kangħanin, tal-​Ħittin, taʼ l-​Amurrin,+ tal-​Pereżin, tal-​Ħiwwin, u tal-​Ġebusin,+ lejn art li tnixxi ħalib u għasel.”’+

18 “U żgur li se jisimgħu minn kliemek,+ u int u x-​xjuħ taʼ Israel tridu tmorru għand is-​sultan taʼ l-​Eġittu u tgħidulu, ‘Ġeħova, l-​Alla taʼ l-​Ebrej,+ dehrilna,+ u issa, jekk jogħġbok, irridu mmorru vjaġġ taʼ tlett ijiem fix-​xagħri, u noffru sagrifiċċji lil Ġeħova Alla tagħna.’+ 19 U jien, iva, jien, naf tajjeb li s-​sultan taʼ l-​Eġittu mhux se jagħtikom permess li tmorru jekk mhux bil-​forza.+ 20 U jien ikolli mmidd idi+ u nolqot lill-​Eġittu bl-​għemejjel taʼ l-​għaġeb kollha li se nagħmel f’nofsu; u mbagħad jibgħatkom.+ 21 U lil dan il-​poplu se nagħtih li jsib il-​ħniena f’għajnejn l-​Eġizzjani; u jiġri li meta tmorru, ma tmorrux b’idkom vojta.+ 22 U kull mara trid titlob mingħand il-​ġâra tagħha u mingħand il-​mara li qed tgħammar bħala barranija f’darha oġġetti tal-​fidda u oġġetti tad-​deheb u lbies, u tridu tlibbsuhom lil uliedkom subien u bniet; u tneżżgħu lill-​Eġizzjani.”+