2 “Geħenna”—Simbolu taʼ Qerda Totali

Il-​kelma “Geħenna” tfisser “wied Ħinnom,” għax hi l-​forma Griega tal-​kelma Ebrajka geħ ħinnom. F’​Ġoż 18:16, fejn tidher il-​frażi “wied Ħinnom,” is-​Settanta Griega tittraduċiha bħala “Geħenna.” Din il-​kelma tidher 12-il darba fl-​Iskrittura Griega Kristjana, u tidher l-​ewwel darba f’​Mt 5:22. It-​Traduzzjoni tad-​Dinja l-​Ġdida tittraduċiha “Geħenna” kulfejn tidher, jiġifieri, f’​Mt 5:22, 29, 30; 10:28; 18:9; 23:15, 33; Mk 9:43, 45, 47; Lq 12:5; Ġk 3:6.

Il-wied taʼ Ħinnom kien sar il-​miżbla u l-​post fejn kien jinħaraq l-​iskart taʼ Ġerusalemm. Iġsma t’annimali mejtin kienu jintefgħu fih biex jinqerdu fin-​nirien li magħhom kien jiżdied il-​kubrit biex in-​nar jaqbad iktar. Fih kienu jintefgħu wkoll l-​iġsma taʼ kriminali li jkunu nqatlu u li ma kinux jitqiesu li tixirqilhom difna deċenti f’qabar tat-​tifkira. Jekk dawn l-​iġsma mejtin kienu jaqgħu fin-​nar kienu jispiċċaw fix-​xejn, imma jekk kienu jaqgħu fuq xi xifer taʼ l-​irdum għoli kienu jintnu u jimtlew bid-​dud li ma kienx imut qabel ma jkun kiel laħamhom u ħalla biss l-​iskeletri.

F’Geħenna ma kinux jintefgħu annimali jew ħlejjaq umani ħajjin biex jinħarqu ħajjin jew jiġu turmentati. Għaldaqstant, il-​post qatt ma jistaʼ jissimbolizza xi reġjun inviżibbli fejn l-​erwieħ umani jiġu turmentati għal dejjem f’nar letterali jew attakkati għal dejjem minn dud li ma jmutx. Peress li l-​kriminali mejtin li kienu jiġu mitfugħin hemmhekk kienu mċaħħdin minn difna deċenti f’qabar tat-​tifkira, li hu s-​simbolu tat-​tama taʼ l-​irxoxt, Geħenna ntużat minn Ġesù u d-​dixxipli tiegħu biex tissimbolizza l-​qerda għal dejjem, qerda totali mill-​univers t’Alla, jew “it-​tieni mewt,” kastig għall-​eternità.