Tħassib Rigward Demm kontaminat
META Demetrio Pessoa, bijokimiku mill-Bolivja, inqalgħulu xi komplikazzjonijiet wara operazzjoni li kien għamel, ittieħed malajr fi klinika. Hemmhekk ngħata trasfużjoni tad-demm, u s-sitwazzjoni tiegħu saret stabbli. Madankollu, f’qasir żmien, il-bijokimiku telagħlu d-deni. Wara li eżaminawh, it-tobba qalulu l-aħbar ħażina: Is-Sur Pessoa kien ngħata demm kontaminat bil-parassita Trypanosoma cruzi. B’konsegwenza taʼ dan, kien safa vittma tal-marda taʼ Chagas.
Il-każ tas-Sur Pessoa m’huwiex xi eċċezzjoni fil-Bolivja, tosserva Panos, aġenzija taʼ l-aħbarijiet li għandha l-bażi tagħha f’Londra. Studju mediku fit-tul li sar fi 12-il pajjiż fl-Amerka Latina juri li f’dik il-parti tad-dinja, l-infezzjonijiet kaġunati minn demm kontaminat huma xi ħaġa taʼ kuljum. F’pajjiż wieħed fl-Amerka Latina, minn kull 10,000 pazjent li ngħata trasfużjoni tad-demm, 220 laqqtu marda li tittieħed. Dan ifisser li 1 minn kull 45 persuna li ngħataw trasfużjoni tad-demm safaʼ vittma!
Iżda l-marda taʼ Chagas m’hijiex l-unika theddida li hemm. Dan l-istess studju juri li diversi pajjiżi taʼ l-Amerka Latina ma ttestjawx id-demm għall-epatite Ċ, u li f’xi pajjiżi t-testijiet għas-sifilide kienu jsiru biss kultant. Iktar minn hekk, għadd taʼ pajjiżi ma kellhomx biżżejjed apparat biex jittestjaw id-demm għall-HIV. Meta kien qed jitkellem dwar id-demm kontaminat, il-ministru tas-saħħa Bolivjan, Tonchi Marinkovic, qal: “Alla eħlisna minn xi emerġenza, għaliex nistgħu nispiċċaw b’xi kriżi medika taʼ sifilide, epatite, il-marda taʼ Chagas jew l-AIDS.”
Bla ma kien jaf, dan l-uffiċjal tal-gvern kien qed jindika d-direzzjoni t-tajba biex tiġi mwaqqfa din il-kriżi medika li kienet taʼ theddida. Xi snin ilu, il-ġurnal Notícias Bolivianas għamel din l-osservazzjoni f’artiklu dwar ir-riskji tat-trasfużjonijiet tad-demm: “Huwa rakkomandat li wieħed jastjeni mid-demm, fi qbil mal-kmandament Bibliku.” Il-kmand Bibliku li qed jirreferi għalih dan il-ġurnal Bolivjan jinsab f’Atti 15:29. Dan jgħid: ‘Tbiegħdu mill-ikel issagrifikat lill-idoli, mid-demm, mil-laħam taʼ l-annimali fgati u miż-żwieġ ħażin. Tagħmlu tajjeb jekk tħarsu rwieħkom minn dawn.’—Ara wkoll Ġenesi 9:4; Levitiku 3:17.