it-tkaxkira tar-Reliġjon fil-Britannja
MINN KORRISPONDENT TAʼ STENBAĦ! FIL-BRITANNJA
THE SUNDAY TIMES taʼ Londra rrapportat li kull ġimgħa 1,500 Britanniku qegħdin jabbandunaw il-knejjes konvenzjonali. Mill-1980 il-Knisja Kattolika Rumana tilfet 600,000 mill-attendenza, u l-Knisja Anglikana—li għadha titlef 600 membru kull ġimgħa—qed ikollha inqas minn miljun għall-funzjonijiet reliġjużi tagħha, inqas minn nofs in-numru taʼ dawk li kienu jattendu 50 sena ilu. Madwar 500 membru tal-kleru tal-Knisja Anglikana telqu wara d-deċiżjoni tas-Sinodu Ġenerali taʼ l-1992 li jistgħu jiġu ordnati saċerdoti nisa.
Ħafna minn dawk li telqu l-knejjes taʼ spiss iħossuhom irrabjati u diżappuntati li ħadd ma pprova jżommhom milli jitilqu jew ġera warajhom biex jara x’jistaʼ jsir biex jgħinhom ladarba jkunu telqu, irrapportat The Times. Il-gazzetta osservat li xi wħud “qalu li l-Knisja ma rnexxilhiex issir parti minn ħajjithom.”
Is-soċjetà Britannika hija sostnuta “minn provvista taʼ kapital spiritwali u morali li dejjem qed jonqos,” jgħid il-kardinal Basil Hume, l-arċisqof Kattoliku Ruman taʼ Westminster. X’ġiegħel din in-nixfa? “Ġuħ għall-Kelma t’Alla,” skond it-titlu tal-Catholic Herald. Din stqarret: “Fil-Quddies jinqrawlna xi biċċiet mit-Testment il-Qadim u l-Ġdid, imma rarament, jekk qatt, jingħata l-kuntest tagħhom. . . . Il-ħajjiet tal-qaddisin u kotba varji għal riflessjoni spiritwali huma tajbin, imma m’humiex addattati biex ikunu ċ-ċavetta biex tinftiehem l-Iskrittura.” Dan l-artiklu kkonkluda li “preżentazzjoni biblika moderna, b’mira pastorali” hija nieqsa.
F’ittra lil Boston Target taʼ Lincolnshire, wieħed qarrej qal: “In-nies qed jitilfu l-fidi tagħhom fir-reliġjonijiet . . . Dawn il-qassisin xi jkunu qed jagħmlu matul il-ġurnata? Żgur li ma joħorġux jiltaqgħu man-nies bħalma għamel Kristu . . . L-unika reliġjon li mid-dehra tagħti kas hija dik tax-Xhieda taʼ Jehovah, li joħorġu u jiltaqgħu man-nies u huma ġenwinament involuti f’li jippridkaw il-verità—huma jistidnuk biex tmur għal-laqgħat tagħhom u jitkellmu u jagħmlu xi ħaġa dwar affarijiet li għandhom x’jaqsmu maʼ l-ambjent. Jien m’iniex wieħed mix-[Xhieda], imma lil dawn in-nies nirrispettahom u noqgħod nismagħhom.”
Qatt attendejt għal-laqgħat li jsiru fis-Sala tas-Saltna tal-lokalità tiegħek? Hemm se ssib tagħlim li huwa kemm stimulanti kif ukoll t’għajnuna. Tixtieq li jkollok il-mistoqsijiet Bibliċi tiegħek imwieġba? Is-sena l-oħra, f’233 pajjiż, ix-Xhieda taʼ Jehovah ddedikaw elf miljun siegħa mill-ħin tagħhom b’xejn biex jgħinu lin-nies jifhmu l-Bibbja, billi kkonduċew iktar minn erbaʼ miljun studju tal-Bibbja fid-djar. Ix-Xhieda taʼ Jehovah jħarsu lejn din l-attività edukattiva tal-Bibbja bħala l-iktar xogħol importanti li qed isir bħalissa. Nistidnuk biex issir taf għala.—Mattew 24:14; 28:19, 20.