Ġojjell Salvaġġ

FID-​DEŻERT XOTT taʼ l-​Afrika, fejn ix-​xita hi skarsa ħafna, jikber ġojjell—il-​warda tad-​deżert (desert rose). Din il-​pjanta tikber f’għamla delikata, bi zkuk mgħawġin, u tieħu ż-​żmien biex tikber. Jingħad li tgħix għal mijiet taʼ snin. Iz-​zokk oħxon tas-​siġra u l-​għeruq tagħha jservu bħala riserva għall-​ilma u jgħinuha tiffjorixxi f’ambjent niexef u ostili.

Is-sugu, l-​għeruq, u ż-​żerriegħa taʼ din il-​pjanta sukkulenti fihom velenu qattiel. Ftit mill-​velenu taż-​żerriegħa jinġibed biex jitpoġġa fil-​ponot tal-​vleġeġ u s-​sajjieda jitfgħu z-​zkuk tagħha fl-​ilma biex lill-​ħut jistorduhom u jaqbduhom faċilment. Iktar minn hekk, ir-​raħħala jużaw partijiet minn din il-​pjanta biex iħalltu velenu li joqtol il-​qurdien u l-​qamel minn fuq l-​iġmla u l-​baqar tagħhom. Ħaġa kurjuża hi li, minkejja n-​natura qattiela tal-​pjanta, annimali salvaġġi jieklu mill-​weraq tagħha u ma jiġrilhom xejn.

Imma kif tistaʼ din il-​warda tad-​deżert velenuża tissejjaħ ġojjell? Imlibbsa b’għenieqed taʼ blanzuni delikati, il-​warda tad-​deżert hija spettakolari, b’kuluri vibranti li jvarjaw minn roża skur għal aħmar kremżi. Meta l-​art tkun niexfa ħafna u bla kulur, dan il-​ġojjell sabiħ u salvaġġ jiftaħ abbundanza taʼ fjuri li jibdew jiddu meta x-​xemx tleqq fuqhom.

Din is-​sbuħija taʼ l-​għaġeb fid-​deżert ma tistax ma tfakkarniex f’dak iż-​żmien meta “ħa jifirħu d-​deżert u l-​art maħruqa; ħa jifraħ ix-​xagħri u jwarrad, ħa jwarrad bħar-​ranġis.” (Isaija 35:1) Din il-​wegħda meraviljuża żgur li se ssir realtà taħt it-​tmexxija tas-​Saltna t’Alla li ġejja. F’dak iż-​żmien l-​art kollha se ‘tifraħ,’ għax mhux biss se ssir ġenna taʼ ġmiel imma wkoll post taʼ paċi għall-​umanità kollha.—Salm 37:​11, 29; Isaija 35:​6, 7.

[Sors tal-​istampa f’paġna 31]

© Mary Ann McDonald