L-​Aħbarijiet tat-​Televiżjoni—Kemm Minnhom Ikunu Aħbarijiet Tassew?

Grupp taʼ nies li josservaw mill-​qrib il-​mezzi tax-​xandir analizzaw 102 programmi lokali li jxandru l-​aħbarijiet fuq it-​televiżjoni fi 52 belt ewlenija fl-​Istati Uniti, sabiex jinvestigaw il-​kontenut u l-​preżentazzjoni. Minn din l-​osservazzjoni skoprew li 41.3 fil-​mija biss tal-​programmi kienu aħbarijiet. Mela x’jixxandar iktar waqt l-​aħbarijiet?

Bejn wieħed u ieħor, 30.4 fil-​mija tal-​ħin dedikat għall-​aħbarijiet lokali fuq it-​televiżjoni jikkonsisti f’reklami. Fil-​fatt, xi wħud mill-​istazzjonijiet li sar stħarriġ fuqhom jiddedikaw iktar ħin għar-​reklami milli għall-​aħbarijiet. Barra minn hekk, il-​ħin dedikat għall-​aħbarijiet ikun taʼ spiss mimli bit-​tnietef, jistqarr ir-​rapport li ġabar fil-​qosor l-​iskoperti taʼ l-​istudju.a Taħt is-​sottitlu “Tnietef,” ir-​rapport iniżżel “il-​ħin kumulattiv li jinkludi l-​kliem taʼ dawk li jaqraw l-​aħbarijiet huma u jintroduċu rapporti minn xandâra oħra, reklami u ħarsa bil-​quddiem lejn l-​aħbarijiet li jmiss, l-​aħbarijiet ‘sentimentali’ jew taʼ ftit importanza u l-​aħbarijiet dwar iċ-​ċelebritajiet.” Eżempju taʼ xi ftit minn dawn it-​tnietef t’aħbarijiet huma: “Kuntest taʼ l-​Agħar Tenuri,” “Riporter Jieħu Dawra taʼ l-​Għaġeb u Inkredibbli fuq Roller Coaster,” u “Iktar Nies Jixtru Prodotti mis-​Supermarkets biex Idellku l-​Ħobż.”

Il-​veri aħbarijiet liema ġrajjiet ikun fihom? Ġrajjiet konnessi mal-​kriminalità jiddominaw l-​aħbarijiet fuq it-​televiżjoni, u jinkludu 26.9 fil-​mija tal-​ħin dedikat għall-​aħbarijiet. “L-​għajdut ‘Jekk storja tinvolvi t-​tixrid tad-​demm, tieħu l-​ewwel’ għadu jgħodd ħafna fl-​aħbarijiet lokali fuq it-​televiżjoni . . . Ir-​rati tal-​kriminalità għandhom mnejn niżlu fl-​Istati Uniti matul dawn l-​aħħar ftit snin, imma mhux hekk fl-​aħbarijiet lokali fuq it-​televiżjoni.” Għala? Skond l-​awturi taʼ l-​istudju, “ġrajjiet konnessi mal-​kriminalità jkunu drammatiċi u jiġbdu l-​attenzjoni tan-​nies.”

Wara l-​kriminalità nsibu l-​aħbarijiet dwar id-​diżastri, bħal nirien, inċidenti bil-​karozza, għargħar, u splużjonijiet (12.2 fil-​mija taʼ l-​aħbarijiet), segwiti mill-​aħbarijiet sportivi (11.4 fil-​mija). Imbagħad insibu aħbarijiet li għandhom x’jaqsmu mas-​saħħa (10.1 fil-​mija), il-​gvern (8.7 fil-​mija), u l-​ekonomija (8.5 fil-​mija). Suġġetti bħall-​edukazzjoni, l-​ambjent, l-​arti, u x-​xjenza jirċievu ftit li xejn attenzjoni (minn 1.3 sa 3.6 fil-​mija). Ir-​rapporti tat-​temp, mill-​banda l-​oħra, għandhom medja taʼ 10 fil-​mija taʼ l-​aħbarijiet kollha. “Kulħadd jieħu pjaċir jitkellem fuq it-​temp, u l-​aħbarijiet fuq it-​televiżjoni l-​istess ħaġa jagħmlu,” jikkummentaw ir-​riċerkaturi. Huma jżidu: “Kwalunkwe tip taʼ temp, tajjeb jew ħażin, sħun jew kiesaħ, bix-​xita jew mhux, joħloq aħbarijiet twal fuq it-​televiżjoni.”

Fuq nota pożittiva, ir-​rapport isostni li għadd li dejjem jiżdied taʼ ġurnalisti u telespettaturi jħossu li hemm bżonn issir bidla. Madankollu, l-​istudju jammetti li bidla bħal din m’hijiex se sseħħ faċilment għax “l-​influwenza li għandu s-​suq u r-​regħba jistgħu dejjem jheddu l-​ġurnaliżmu taʼ kwalità.”

[Nota taʼ taħt]