Il-​Vjaġġ it-​Tajjeb!

“L-​evakwazzjonijiet minn ajruplani tal-​passiġġieri jseħħu madwar darba fil-​ġimgħa,” jgħid rapport f’USA Today. Għalkemm il-​biċċa l-​kbira minnhom ikunu jinvolvu inċidenti żgħar jew allarmi foloz, l-​evakwazzjoni tistaʼ ssir b’mod aħjar jekk tagħti kas dawn il-​pariri:

● ILBES SEW. Ilbes ħwejjeġ li huma komdi u li jħalluk tiċċaqlaq kif trid. Jekk jistaʼ jkun, il-​ħwejjeġ għandhom jgħattulek kważi ġismek kollu. Qalziet u flokk bil-​kmiem twal ikunu għażla tajba. Ilbes ħwejjeġ li huma magħmulin minn fibri naturali, bħat-​tajjar, suf, ġilda, jew drapp tal-​jeans. Drappijiet sintetiċi, bħal rayon, polyester, u nylon (speċjalment tajts u kalzetti), jistgħu jdubu bis-​sħana u jikkaġunaw ħruq serju fuq il-​ġisem u s-​saqajn.

● ĦEJJI LILEK INNIFSEK MENTALMENT. Aħseb dwar x’se tagħmel f’każ t’emerġenza. Malli tpoġġi bil-​qegħda, ara fejn jinsabu l-​eqreb bibien t’emerġenza, kemm dawk taʼ quddiemek u kemm dawk taʼ wara r-​ringiela tiegħek. Agħti widen għall-​istruzzjonijiet taʼ salvataġġ li jingħataw qabel kull titjira. Irrevedi l-​kartolina li tipprovdi dettalji dwar x’għandek tagħmel f’każ t’evakwazzjoni.

● TIPPANIKKJAX. Jekk tqum emerġenza, ibqaʼ kalm u segwi l-​istruzzjonijiet tal-​membri taʼ l-​ekwipaġġ. Jekk hemm bżonn li ssir evakwazzjoni, imxi lejn l-​eqreb bieb t’emerġenza, u tiħux affarijiet persunali miegħek.

● OQGĦOD ATTENT KIF TOĦROĠ MILL-​AJRUPLAN. Biex tinżel miż-​żurżieqa, aqbeż għal saqajk l-​ewwel minflok ma tpoġġi bil-​qegħda u tiżżerżaq. Orbot dirgħajk fuq sidrek. Żomm riġlejk u saqajk magħluqin, u inżaʼ ż-​żarbun jekk ikollok takkuna ppontata. Malli tmiss maʼ l-​art, tbiegħed mill-​ajruplan, u oqgħod għassa għall-​vetturi t‘emerġenza.

Jagħmel differenza jekk timxi maʼ dawn il-​pariri? Iva! “L-​inċidenti taʼ l-​ajru m’humiex kollha fatali,” jgħid il-​bullettin Intercom taʼ l-​Amministrazzjoni Federali taʼ l-​Avjazzjoni. Il-​bullettin ikompli jżid li madwar 50 fil-​mija taʼ l-​imwiet konnessi maʼ titjiriet kummerċjali jseħħu f’inċidenti fejn in-​nies setgħu salvaw.