“Il-​bliet Li Qed Jisplodu”

“In-​nies qed imorru minn post għall-​ieħor iktar minn qatt qabel, u l-​biċċa l-​kbira taʼ dawk li jħallu darhom biex ifittxu ħajja aħjar jerħulha lejn il-​bliet.”

HEKK qalet il-​pubblikazzjoni Foreign Affairs fl-​introduzzjoni t’artiklu intitolat “Il-​Bliet li Qed Jisplodu fid-​Dinja li Qed Tiżviluppa.” Skond dan l-​artiklu, ħafna nies “tħajru mit-​tlellix, jew ġew imġagħlin jitilqu mill-​kampanja minħabba inkwiet politiku u ekonomiku, pressjonijiet fil-​popolazzjoni, u kollass ekoloġiku.”

Eżattament kemm qed jikbru malajr il-​bliet? Xi wħud jikkalkulaw li n-​nies qed jerħulha għall-​bliet bir-​rata estrema taʼ iktar minn miljun ruħ fil-​ġimgħa! F’pajjiżi li qed jiżviluppaw, iktar minn 200 belt issa għandhom popolazzjoni li taqbeż il-​miljun ruħ. Xi 20 waħda laħqu l-​għaxar miljun ruħ! U ma jidhirx li r-​rata se tonqos. Per eżempju, ejja nieħdu l-​belt taʼ Lagos, fin-​Niġerja. Skond rapport mill-​Worldwatch Institute, sa l-​2015, f’Lagos jistaʼ jkun hemm 25 miljun abitant, u mit-​tlettax-il post titlaʼ għat-​tielet l-​akbar belt fid-​dinja.

Ħafna esperti jħossu li dan ma tantx jawgura affarijiet sbieħ għall-​futur. Federico Mayor, l-​ex direttur ġenerali taʼ l-​Organizzazzjoni Edukattiva, Xjentifika, u Kulturali tal-​Ġnus Magħquda, javża li sas-​sena 2035, “tlett elef miljun ruħ iktar se jkunu qed jgħixu fil-​[postijiet] urbani li jeżistu llum.” Biex inkunu nistgħu nifilħu għal din il-​popolazzjoni tant kbira, “se jkollna nibnu elf belt bi tliet miljun abitant fl-​erbgħin sena li ġejjin, ħamsa u għoxrin kull sena.”

L-esperti jgħidu wkoll li billi l-​popolazzjonijiet fil-​bliet qed jikbru b’rata tant mgħaġġla, il-​bliet madwar id-​dinja qed jiġu effettwati bl-​ikrah. U dan jinkludi bliet fid-​dinja industrijalizzata li hija mimlija bil-​ġid. Eżattament x’inhuma l-​problemi li qed jiffaċċjaw il-​bliet, u dan kif jistaʼ jeffettwak? Jidher li jeżistu xi soluzzjonijiet? L-​artikli li ġejjin se janalizzaw dawn il-​kwistjonijiet kritiċi.