Jistgħu l-​Ispeċi li Hawn fuq l-​Art Jiġu Salvati?

IL-​GAZZETTA The Globe and Mail tal-​Kanada tgħid li aħna l-​bnedmin qed inġagħlu lil ħafna speċi taʼ annimali, minn xadini sa albatri u mazzarelli, jaslu sal-​punt t’estinzjoni tant malajr li qed nipperikolaw is-​sopravivenza tagħna stess. Il-​kummenti tal-​gazzetta saru f’konnessjoni mat-​2000 IUCN Red List of Threatened Species, pubblikata mill-​Unjoni għall-​Konservazzjoni tad-​Dinja (IUCN) taʼ Ġinevra, fl-​Isvizzera. Ir-​Red List twissi li iktar minn 11,000 speċi taʼ pjanti u annimali qegħdin f’riskju kbir li jiġu estinti. Il-​mammali huma l-​iktar li jinsabu fil-​periklu. “Bejn wieħed u ieħor, wieħed minn kull erbaʼ tipi taʼ mammali ħajjin fuq l-​Art illum—jew 24 fil-​mija—jinsab mhedded mill-​estinzjoni,” tirrapporta l-​Globe.

X’inhu l-​kaġun taʼ din il-​kriżi? Ix-​xjenzati jgħidu li dawn l-​ispeċi qed jgħosfru b’pass dejjem iktar mgħaġġel minħabba s-​suq internazzjonali taʼ l-​annimali li jinżammu bħala delizzju, is-​sajd bil-​konz, u l-​fatt li qed jonqos l-​abitat xieraq għall-​annimali. Iktar minn hekk, iżjed ma jinbnew toroq minn ġol-​foresti li jkunu għadhom ma ntmessewx mill-​bniedem, “in-​nies qed ikollhom iktar u iktar aċċess għall-​annimali salvaġġi li xi darba ma setgħux jintlaħqu. Imbagħad joqtluhom u jikluhom. Jekk dan isir b’mod estensiv biżżejjed, l-​ispeċi se jiġu estinti.”

Ix-​xjenzati jwissu li dan ifisser periklu għall-​bnedmin ukoll. “Hekk kif inġagħlu lill-​ispeċi jiġu estinti nkunu qed inbagħbsu fis-​sistema li żżomm il-​ħajja tagħna għaddejja,” jgħid David Brackett, li jippresiedi l-​kummissjoni għas-​sopravivenza taʼ l-​ispeċi għall-​Unjoni għall-​Konservazzjoni tad-​Dinja. Hu qal li l-​globu tagħna mhux se jsalva jekk il-​varjetà kollha taʼ ħlejjaq tkun biss fil-​ġonna żooloġiċi tagħna.

Ir-rapport taʼ l-​IUCN iħeġġeġ lis-​soċjetà kollha madwar il-​globu biex taġixxi, billi jgħid li “r-​riżorsi umani u finanzjarji jridu jiġu użati bejn 10 darbiet u 100 darba iktar mil-​livell kurrenti biex tissolva din il-​kriżi.” Madankollu, b’dispjaċir ngħidu li r-​regħba taʼ spiss tfixkel l-​isforzi sinċieri biex jiġu salvati r-​riżorsi tal-​pjaneta tagħna.

Jistgħu l-​ispeċi li hawn fuq l-​art jiġu salvati? L-​ewwel bnedmin u wliedhom ngħataw il-​biċċa xogħol li jieħdu ħsieb il-​varjetà taʼ ħajja fuq il-​pjaneta tagħna. “Il-​Mulej Alla ħa lill-​bniedem u qiegħdu fil-​ġnien taʼ l-​Għeden biex jaħdmu,” tgħid il-​Bibbja, “u jħarsu.” (Ġenesi 2:15) Għalkemm il-​bniedem qed jonqos mill-​obbligu tiegħu, l-​iskop t’Alla għall-​art għadu l-​istess. Hu jimpurtah mill-​pjaneta tagħna, u mhux se jippermetti li tinqered bit-​traskuraġni jew bir-​regħba. (Apokalissi 11:18) Il-​Kelma tiegħu twiegħed: “Il-​ġusti jirtu l-​art, u jgħammru fiha għal dejjem.”—Salm 37:29.

[Sors taʼ l-​Istampa f’paġna 11]

U.S. Fish & Wildlife Service, Washington, D.C./J.D. Pittillo