“Kirurgi” Jżegilgu u f’Aptithom

Lil xi wħud dan il-​ħsieb jistaʼ jimbottahom, imma issa reġaʼ tfaċċa “kirurgu” kapaċi u iġjeniku—id-​dudu ċkejken. Rapport fir-​rivista The Journal of the American Medical Association (JAMA) jgħid li t-​tobba fir-​Renju Unit għamlu test bi prova fuq 12-il pazjent li kellhom l-​ulċeri f’riġlejhom. Sitta minnhom ngħataw kura tradizzjonali bit-​terapija taʼ l-​idroġel, u s-​sitta l-​oħra bl-​użu tad-​dud.a

“Is-​sitt pazjenti kollha li għamlu t-​terapija larvali [bid-dud] spiċċaw b’feriti nodfa wara 3 ijiem biss,” tgħid il-​JAMA. Minn dawk li ngħataw kura tradizzjonali, “tnejn biss kellhom feriti nodfa wara xahar taʼ kura; l-​erbgħa l-​oħra kellhom bżonn taʼ iktar attenzjoni medika.” Il-​ġurnal mediku Britanniku The Lancet jgħid li t-​terapija bid-​dud “tistaʼ tnaqqas iż-​żmien tal-​kura b’mod drammatiku meta mqabbla mat-​terapiji [tradizzjonali]” u li “tiswa ftit iktar min-​nofs taʼ l-​idroġel.”

Meta tintuża t-​terapija bid-​dud—per eżempju fuq xi ferita li tkun mewtet parti mill-​ġisem—it-​tobba jpoġġu larvi nodfa li jkunu għadhom żgħar ġewwa l-​ferita, tgħid il-​JAMA. (M’għandniex xi ngħidu, it-​tobba jużaw biss dawk l-​ispeċi taʼ larvi li ma jattakkawx iċ-​ċelluli f’saħħithom.) Imbagħad il-​ferita titgħatta b’xibka rqiqa tan-​nylon u b’materjal oħxon li jixrob iċ-​ċelluli mejtin li jkunu saru likwidu. Meta d-​dud ikun kiel kemm felaħ, jitneħħa u jintrema, u t-​tobba jkomplu jżidu dud ġdid sakemm il-​ferita tkun indafet għalkollox. Imbagħad, iċ-​ċirkulazzjoni tad-​demm lejn il-​bqija taċ-​ċelluli f’saħħithom tgħin il-​laħam ġdid biex jikber.

“Qatt ma kellna pazjent li rrifjuta d-​dud,” qal il-​kirurgu vaskulari Michael Walker. “Huma l-​membri taʼ l-​istaff li jiddardru, mhux il-​pazjenti.” Mhux fir-​Renju Unit biss qed tintuża t-​terapija larvali imma wkoll f’xi ċentri mediċi fl-​Istati Uniti u l-​Kanada. Fil-​fatt, kirurgu li ġie kwotat f’The Lancet qal li “hemm ħafna iktar pazjenti fl-​Istati Uniti li jridu t-​terapija bid-​dud milli hemm tobba li huma lesti li japplikawha.”

It-terapija bid-​dud instabet b’kumbinazzjoni. Ir-​rivista Science World tgħid li tobba li kienu jdewwu lis-​suldati fil-​gwerra indunaw li meta l-​feriti kienu jkunu miżgħudin bid-​dud, l-​istess feriti kellhom it-​tendenza li jfiqu aħjar minn oħrajn li ma kinux miżgħudin, u għalhekk malajr feġġet it-​terapija bid-​dud. Issa din qed tintuża f’mijiet taʼ sptarijiet fl-​Istati Uniti u fl-​Ewropa.

[Nota taʼ taħt]

[Stampa f’paġna 30]

Ammont taʼ dud muri fuq sabaʼ (daqs veru)

[Sors]

Picture copyright SMTL, http://www.smtl.co.uk/

[Stampi f’paġna 30]

Qabel

Wara

[Sors]

Ritratti minn R. Sherman, Università taʼ Kalifornja, Irvine