Ħarsa Lejn id-​Dinja

Isalvaw fl-​Inċidenti taʼ l-​Ajru

“Iktar minn 95% mill-​passiġġieri jsalvaw f’inċidenti li jinvolvu l-​ajruplani kummerċjali,” tistqarr il-​gazzetta Kanadiża National Post. Skond il-​Post, mill-​istudju li sar mill-​Bord għas-​Sigurtà fit-​Trasport Nazzjonali taʼ l-​Istati Uniti rriżulta li l-​biċċa l-​kbira mill-​passiġġieri jsalvaw anki f’“inċidenti serji” li fihom l-​ajruplan issirlu ħsara konsiderevoli. Art LaFlamme, id-​direttur ġenerali taʼ l-​avjazzjoni ċivili fid-​dipartiment tat-​Trasport Kanadiż, jispjega: “Ħafna mill-​inċidenti jsiru waqt li l-​ajruplan ikun nieżel jew tielaʼ. Dawn m’humiex it-​tip taʼ inċidenti li jissemmew fil-​punti ewlenin taʼ l-​aħbarijiet, u ħafna minnhom jispiċċaw b’wiċċ il-​ġid. Huwa għalhekk li aħna nagħtu importanza kbira għall-​istruzzjonijiet tas-​sigurtà li jingħataw mill-​ekwipaġġ.” Dawk li jivvjaġġaw taʼ spiss ikollhom it-​tendenza li ma jagħtux kas l-​istruzzjonijiet tas-​sigurtà. Imma bħalma qalet rappreżentanta taʼ waħda mil-​linji taʼ l-​ajru, “huwa importanti ferm li n-​nies jagħtu kashom. F’każ taʼ emerġenza, ħajjithom tkun tiddependi minnhom.”

It-​Tmiem tal-​Musmar

Skond The Toronto Star, il-​musmar komuni bla dubju għamlu żmienu. Il-​gazzetta tirrapporta li s-​suq taʼ l-​imsiemer komuni “naqas kważi bin-​nofs f’dawn l-​aħħar snin.” L-​iżvilupp taʼ l-​imsiemer pnewmatiċi, jew t’għodod li jaħdmu bl-​arja u li jwaħħlu l-​imsiemer pnewmatiċi (nail guns), naqqas id-​domanda għall-​imsiemer komuni fl-​Amerika taʼ Fuq. Il-​ħwienet li jbigħu oġġetti tal-​metall fl-​Istati Uniti jirrapportaw li l-​bennejja professjonali rari jixtru msiemer komuni, iżda minflok, jagħżlu li jużaw l-​għodod li jaħdmu bl-​arja u li qed isiru dejjem iżjed eħfef. Il-​manifatturi taʼ l-​imsiemer komuni għala ma bdewx jipproduċu l-​imsiemer pnewmatiċi? “Għall-​istess raġuni li l-​kumpaniji ferrovjarji ma daħlux għal xogħol mal-​linji taʼ l-​ajru,” twieġeb l-​iStar. “Huwa prodott kompletament differenti.”

Stress Teknoloġiku

Jingħad li l-​istress teknoloġiku—id-​disperazzjoni li tiġi mill-​pressjoni biex jintużaw teknoloġiji ġodda—qed jiżdied, tirrapporta r-​rivista Kanadiża Maclean’s. L-​istudji jissuġġerixxu li l-​kaġun taʼ dan l-​istress jistaʼ jkun, fost affarijiet oħra, il-​proċess li ma jieqaf qatt taʼ li titgħallem tuża t-​teknoloġiji ġodda, u n-​nuqqas taʼ li tagħraf id-​differenza bejn ix-​xogħol u d-​dar minħabba l-​introduzzjoni taʼ invenzjonijiet ġodda bħall-​e-mail, it-​trasferimenti awtomatiċi tat-​telefonati, u t-​telefons ċellulari. Kif tistaʼ tkampa? L-​esperti jirrakkomandaw li għandu jkollok limiti. Iddetermina jekk il-​fatt li tuża apparat partikulari hux se jagħmillek ħajtek iktar sempliċi inkella hux se jikkomplikahielek iktar. Qis li trid iż-​żmien biex titgħallem biżżejjed dwar teknoloġija ġdida biex tkun tistaʼ tibbenefika minnha bis-​sħiħ. Toqgħodx tuża t-​teknoloġija l-​ħin kollu, u iddedika ħin għal affarijiet iktar importanti. “In-​nies jibdew il-​ġurnata billi jagħmlu l-​iżball kbir li jiftħu l-​e-mail tagħhom, minflok ma jimxu fuq skeda,” jinnota Dan Stamp, espert tal-​produttività minn Vancouver. “L-​aħjar siegħa u nofs tal-​ġurnata jinħlew fuq affarijiet bla siwi.”

Il-​Ħin Quddiem it-​TV—Parti mir-​Rekord Mediku?

Ir-​rekord mediku tat-​tfal għandu jinkludi l-​ħin li jqattgħu quddiem it-​televixin, jirrakkomanda grupp taʼ pedjatriċi fi Spanja. Skond il-​gazzetta Spanjola Diario Mèdico, it-​tobba jħossu li għandhom ikunu jafu kemm iqattgħu ħin quddiem it-​TV il-​pazjenti żgħar tagħhom, kif ukoll x’tip taʼ programmi jaraw u maʼ min. Għala? Għaliex l-​istħarriġ li sar mill-​pedjatriċi wera li meta jqattgħu ħafna ħin quddiem it-​televixin, it-​tfal jistgħu jadottaw stil taʼ ħajja bil-​qiegħda, isiru iktar aggressivi, ikunu jridu dejjem jaraw x’se jixtru, jaqgħu lura fl-​iskola, u x’aktarx li ma jkunux jistgħu jgħaddu mingħajr it-​TV. “Il-​pedjatriċi jagħtu l-​parir lill-​ġenituri biex ma jdaħħlux it-​televixin fil-​kamra tas-​sodda tat-​tfal jew jagħmluh f’xi post fejn [it-tfal] ikunu jistgħu jikkontrollaw x’jaraw,” jgħid ir-​rapport. “Iktar minn hekk, it-​tfal m’għandhomx jitħallew jaraw it-​televixin waqt il-​ħin taʼ l-​ikel, u l-​ġenituri għandhom jillimitaw il-​ħin li t-​tfal iqattgħu quddiemu għal inqas minn sagħtejn kuljum, għalkemm ikun aħjar jekk ikun inqas minn siegħa.”

Żjieda fil-​Kanċer tal-​Ġilda

Skond is-​servizz taʼ l-​aħbarijiet Spanjol El Pais Digital, kien hemm żjieda drammatika fl-​iktar tumur tal-​ġilda serju, il-​melanoma. Sa nofs is-​seklu 20, 1 minn kull 1,500 persuna kellu l-​melanoma. Imma sas-​sena 2000, dan in-​numru telaʼ għal 1 minn kull 75 individwu, u dan għaliex kulħadd irid jismar. F’konvenzjoni tas-​Soċjetà Ewropea għall-​Onkoloġija Medika, il-​Professur J. Kirkwood stqarr li 40 fil-​mija tat-​tumuri tal-​melanoma huma marbutin maʼ fatturi ġenetiċi, waqt li s-​60 fil-​mija l-​oħra għandhom x’jaqsmu mal-​ħin żejjed li jitqattaʼ fix-​xemx. L-​iktar milqutin huma n-​nisa taʼ bejn it-​23 u l-​50 sena. Il-​Professur Kirkwood spjega li matul it-​tfulija u l-​adolexxenza, ir-​raġġi tax-​xemx jistgħu jikkawżaw bidla fiċ-​ċelluli li jifformaw il-​pigment fil-​ġilda, iżda jistgħu jgħaddu ħafna snin qabel ma joħroġ il-​kanċer. “Il-​ġilda tibqaʼ tiftakar kemm tkun ħadet xemx,” innota Kirkwood.