Il-​Ħarsa tal-​Bibbja

Għandhom il-​Kristjani Jkunu Kollha l-​Istess biex Ikunu Magħqudin?

ILLUM ir-​reliġjon tidher li hija mimlija firda. Anki fi ħdan knisja waħda, in-​nies jistgħu jkollhom għadd taʼ twemmin kontra xulxin fejn jidħlu d-​duttrina u l-​imġiba. Awtriċi waħda poġġietha hekk: “Saħansitra huwa diffiċli biex issib tnejn min-​nies li jemmnu preċiżament fl-​istess Alla. Daż-żmien, jidher li kull bniedem għandu t-​teoloġija tiegħu stess.”

B’kuntrast kbir maʼ dan, l-​appostlu Pawlu ħeġġeġ lill-​Kristjani taʼ l-​ewwel seklu f’Korintu biex ‘jaqblu fi kliemhom’ u biex ‘ikunu magħqudin kif imiss, ħsieb wieħed u fehma waħda.’ (1 Korintin 1:​10) Xi wħud illum jikkritikaw it-​twissija taʼ Pawlu. ‘In-​nies huma differenti,’ jibdew jgħidu, ‘u huwa ħażin li tesiġi li l-​Kristjani kollha jaħsbu jew jaġixxu bħal xulxin.’ Imma fil-​fatt kien Pawlu qiegħed jissuġġerixxi ubbidjenza bħal taʼ robot? Il-​Bibbja tippermetti libertà persunali?

Magħqudin, Mhux l-​Istess

F’ittra oħra minn tiegħu, Pawlu ħeġġeġ lill-​Kristjani biex jaqdu lil Alla bil-​“qawwa tar-​raġuni” tagħhom. (Rumani 12:​1, NW) Mela żgur li hu ma kienx qed jipprova jbiddel lill-​membri tal-​kongregazzjoni taʼ Korintu fi bnedmin li jaħdmu bħal magna. Imma għalfejn qalilhom biex ‘ikunu magħqudin kif imiss, ħsieb wieħed u fehma waħda’? Pawlu ta dan il-​parir għaliex il-​kongregazzjoni f’Korintu kienet għaddejja minn problema serja. Kienu żviluppaw partiti, tant li xi wħud bdew iqisu lil Apollo bħala l-​mexxej tagħhom waqt li oħrajn ippreferew lil Pawlu jew lil Pietru jew inkella żammew biss maʼ Kristu. Firda bħal din kienet serja, għax kienet qed thedded il-​paċi tal-​kongregazzjoni.

Pawlu ried lill-​Korintin ‘iżommu spirtu wieħed bir-​rabta tas-​sliem,’ eżatt bħalma wissa iktar tard lill-​Kristjani f’Efesu. (Efesin 4:3) Hu kien qed jinkuraġġixxi lill-​aħwa biex isegwu lil Ġesù Kristu magħqudin flimkien, biex ma jkunux maqsumin fi gruppi mifrudin, jew setet. B’hekk, huma setgħu jgawdu skop wieħed fil-​paċi. (Ġwann 17:22) Għalhekk, il-​parir taʼ Pawlu lill-​Korintin sewa biex iġib il-​ħsieb tagħhom f’postu u jippromwovi l-​għaqda, u mhux li kollha jkunu l-​istess bħal xulxin.​—2 Korintin 13:​9, 11.

L-għaqda hija importanti wkoll fejn tidħol id-​duttrina. Dawk li jimxu fil-​passi taʼ Ġesù jirrealizzaw li fil-​fatt “fidi waħda” hemm, bħalma hemm biss “Alla wieħed u Missier.” (Efesin 4:​1-6) Għalhekk, il-​Kristjani jkunu ċerti li dak li jemmnu jkun fi qbil mal-​verità li Alla wera fil-​Kelma tiegħu dwaru nnifsu u dwar l-​iskopijiet tiegħu. Huma magħqudin fit-​twemmin tagħhom dwar min hu Alla u x’jitlob minna. Ukoll huma jgħixu fi qbil mal-​livelli morali ċari mniżżlin fil-​Kelma t’Alla. (1 Korintin 6:​9-11) B’dan il-​mod, il-​Kristjani jibqgħu magħqudin, kemm fid-​duttrina kif ukoll fil-​morali.

Nittrattaw man-​Nuqqas taʼ Qbil

Madankollu, dan ma jfissirx li kull Kristjan jintqallu bl-​eżatt kif għandu jaħseb jew xi jrid jagħmel fis-​sitwazzjonijiet kollha tal-​ħajja. F’ħafna każi tkun trid tagħmel għażla persunali. Ikkunsidra eżempju wieħed. Għadd taʼ Kristjani taʼ l-​ewwel seklu f’Korintu kellhom xi dubji dwar li jieklu laħam li setaʼ kien ġej minn tempju taʼ xi idolu. Xi wħud kellhom l-​opinjoni soda li jekk tiekol mil-​laħam tkun qisek qed tagħmel att taʼ qima falza, filwaqt li oħrajn ħassew li minfejn jiġi l-​laħam ma kienx importanti. Meta kien qed jittratta maʼ din il-​kwistjoni sensittiva, Pawlu m’għamilx xi regola li tgħid lill-​Kristjani x’kellhom jagħmlu. Minflok, hu għaraf li setgħu jittieħdu deċiżjonijiet differenti fuq dan il-​każ.a​—1 Korintin 8:​4-13.

Illum, il-​Kristjani jistgħu jieħdu deċiżjonijiet li jkunu differenti minn dawk taʼ Kristjani oħrajn fi kwistjonijiet bħal xogħol, saħħa, rikreazzjoni, jew xi aspett ieħor li jinvolvi għażla persunali. Din il-​varjetà fl-​għażliet tistaʼ tfixkel lil xi wħud. Jistgħu jitħassbu jekk opinjonijiet differenti jistgħux iwasslu għal tilwim jew firdiet fil-​kongregazzjoni. Madankollu, riżultat bħal dan ma jistax jiġi evitat għalkollox. Biex nagħtu eżempju: Il-​kompożituri tal-​mużika għandhom biss numru limitat taʼ noti biex jaħdmu bihom, imma l-​possibbiltajiet li għandhom biex jagħmlu mużika li tgħaxxaq ma jispiċċaw qatt. Bl-​istess mod, il-​Kristjani jagħmlu għażliet fil-​limiti tal-​prinċipji mogħtijin minn Alla. Madankollu, għandhom ammont taʼ libertà għall-​għażla meta jiġu biex jagħmlu deċiżjonijiet persunali.

Kif tistaʼ żżomm l-​għaqda Kristjana waqt li tirrispetta l-​għażliet individwali? Iċ-​ċavetta hija l-​imħabba. L-​imħabba għal Alla tqanqalna biex minn jeddna nobdu l-​kmandamenti tiegħu. (1 Ġwann 5:3) L-​imħabba għal sħabna l-​bnedmin tqanqalna biex nirrispettaw id-​dritt li għandhom l-​oħrajn biex jieħdu deċiżjonijiet skond il-​kuxjenza tagħhom fi kwistjonijiet persunali. (Rumani 14:​3, 4; Galatin 5:​13) Pawlu ħalla eżempju mill-​aħjar f’dan l-​aspett meta hu qagħad għall-​awtorità tal-​ġemgħa li tiggverna taʼ l-​ewwel seklu fi kwistjoni li tinvolvi d-​duttrina. (Mattew 24:​45-47; Atti 15:​1, 2) Fl-​istess ħin, hu inkuraġġixxa lil kulħadd biex jirrispetta l-​kuxjenza taʼ sħabu l-​Kristjani fi kwistjonijiet li tħallew għal deċiżjoni persunali.​—1 Korintin 10:​25-33.

Biċ-ċar, ħadd ma jrid jiġi kundannat għax jieħu deċiżjoni skond il-​kuxjenza li ma tkunx f’konflitt mal-​prinċipji tal-​Bibbja. (Ġakbu 4:12) Min-​naħa l-​oħra, Kristjani leali ma jinsistux fuq id-​drittijiet persunali tagħhom b’dannu għall-​kuxjenzi t’oħrajn jew għall-​għaqda fil-​kongregazzjoni. Lanqas m’għandhom jgħidu li għandhom il-​libertà biex jagħmlu xi ħaġa projbita b’mod ċar mill-​Kelma t’Alla. (Rumani 15:1; 2 Pietru 2:​1, 19) L-​imħabba għal Alla għandha tqanqalna biex inġibu l-​kuxjenza tagħna fi qbil maʼ kif jaħsibha Alla. Imbagħad, dan se jżommna magħqudin maʼ sħabna fit-​twemmin.​—Lhud 5:​14.

[Nota taʼ taħt]