Il-​Ħarsa tal-​Bibbja

Tindika l-​Ansjetà Nuqqas taʼ Fidi?

“L-​ANSJETÀ PROJBITA.” Kmieni fis-​seklu 20, wieħed saċerdot kiteb taħt dan it-​titlu li l-​ansjetà li tiġi minħabba affarijiet materjali mhux talli hi ħażina, talli hi “dnub gravi ħafna.” Iktar reċenti, kummentatur li kiteb dwar li tieqaf tinkwieta u tkun ansjuż qal, “Meta noqogħdu ninkwetaw nuru li ma nafdawx f’Alla.”

Fiż-żewġ każijiet l-​awturi waslu għall-​konklużjonijiet tagħhom mill-​Priedka taʼ fuq il-​Muntanja, fejn Ġesù qal: “Tinkwetawx ruħkom.” (Mattew 6:25) Ladarba l-​ansjetà teffettwa lil ħafna llum, nistgħu nistaqsu: Għandu Kristjan iħossu ħati jekk ikun ansjuż? Veru li sentimenti taʼ ansjetà jindikaw nuqqas taʼ fidi?

Alla Jifhem l-​Imperfezzjonijiet Tagħna

Il-​Bibbja ma tgħallimx li n-​nuqqas taʼ fidi huwa l-​kaġun taʼ l-​ansjetà kollha. Minħabba l-​fatt li qegħdin ngħixu fi “żmien iebes,” huwa kważi impossibbli li ma tesperjenzax xi ftit ansjetà. (2 Timotju 3:1) Il-​Kristjani leali jkampaw kuljum maʼ ansjetajiet minħabba  l-​mard, ix-​xjuħija, il-​pressjonijiet ekonomiċi, l-​inkwiet fil-​familja, il-​kriminalità, u problemi oħrajn. Anki fiż-​żminijiet tal-​qedem, il-​qaddejja t’Alla ffaċċjaw biżaʼ u inkwiet.

Ikkunsidra r-​rakkont fil-​Bibbja dwar Lot. Alla qallu biex jaħrab lejn l-​għoljiet ħalli jevita li jinqered maʼ Sodoma u Gomorra. Madankollu, Lot sar ansjuż. Hu qal: “Le, ja Sidi.” B’inċertezza hu kompla: “Imma jiena ma nistax naħrab lejn l-​għoljiet bla ma tilħaqni l-​ħsara u mmut.” Lot għala beżaʼ mill-​għoljiet? Il-​Bibbja ma tgħidx għala. Kienet x’kienet ir-​raġuni, Lot ħassu tassew imbeżżaʼ. Kif irreaġixxa Alla? Iddixxiplina Alla lil Lot minħabba nnuqqas taʼ fidi li wera Fih? Le. Għall-​kuntrarju, Jehovah wera konsiderazzjoni, billi ppermetta li Lot jaħrab lejn belt fil-​qrib.​—Ġenesi 19:​18-22.

Hemm eżempji Bibliċi oħra taʼ qaddejja leali li xi drabi saru ansjużi ħafna. Il-​profeta Elija beżaʼ u ħarab wara li ġie mhedded li se jinqatel. (1 Slaten 19:​1-4) Mosè, Anna, David, Ħabakkuk, Pawlu, u rġiel u nisa oħra taʼ fidi kbira wkoll esprimew l-​ansjetajiet tagħhom. (Eżodu 4:​10; 1 Samwel 1:6; Salm 55:6 [55:​5, NW ]; Ħabakkuk 1:​2, 3; 2 Korintin 11:28) Madankollu, Alla wera ħniena u kompla jużahom fis-​servizz tiegħu, u b’hekk wera li hu tassew jifhem il-​bnedmin imperfetti.

Id-​“Dnub li Malajr Ifixkilna”

Madankollu, jekk nibqgħu ansjużi nistgħu niddgħajfu fil-​fidi tagħna u naslu biex ma nibqgħux nafdaw f’Alla. L-​appostlu Pawlu rrefera għan-​nuqqas taʼ fidi bħala “dnub li malajr ifixkilna.” (Lhud 12:​1) Billi inkluda lilu nnifsu, wisq probabbli Pawlu kien qed jammetti t-​tendenza naturali li ‘jitfixkel malajr’ meta xi drabi kienet tonqoslu l-​fidi.

Forsi dan kien il-​każ taʼ Żakkarija meta ma emminx lill-​anġlu t’Alla x’ħin informah li martu kienet se toħroġ tqila. F’okkażjoni minnhom, l-​appostli taʼ Ġesù ma setgħux ifejqu lil xi ħadd minħabba l-​“fidi żgħira” li kellhom. Madankollu, dawn l-​individwi komplew igawdu l-​approvazzjoni t’Alla.​—Mattew 17:​18-20; Luqa 1:​18, 20, 67; Ġwanni 17:26.

Mill-banda l-​oħra, il-​Bibbja tinkludi wkoll eżempji taʼ wħud li tilfu l-​fidi tagħhom f’Alla u batew konsegwenzi serji. Per eżempju, ħafna Iżraelin li telqu mill-​Eġittu ma tħallewx jidħlu fl-​Art Imwiegħda minħabba n-​nuqqas taʼ fidi li kellhom. Fi ġrajja minnhom huma saħansitra tkellmu direttament kontra Alla, billi qalu: “Għala tellajtuna mill-​Eġittu biex immutu fid-​deżert? M’hawnx ħobż u lanqas ilma.” Minħabba li Alla ma ħax gost b’dan, hu bagħat sriep velenużi biex jikkastigahom.​—Numri 21:​5, 6.

Minħabba li ma kellhomx biżżejjed fidi, l-​abitanti taʼ Nazaret, fejn kien trabba Ġesù, ma kellhomx il-​privileġġ li jaraw iktar mirakli mwettqin fit-​territorju tagħhom. Iżjed minn hekk, il-​ġenerazzjoni mill-​agħar taʼ dak iż-​żmien irċiviet kundanna iebsa mingħand Ġesù minħabba n-​nuqqas taʼ fidi. (Mattew 13:58; 17:17; Lhud 3:​19) L-​appostlu Pawlu wissa b’mod xieraq: “Ħuti, araw li f’ebda wieħed minnkom ma jkun hemm qalb imħassra bin-​nuqqas taʼ twemmin li jwassal għall-​firda minn Alla l-​ħaj.”​—Lhud 3:12.

Iva, f’każijiet estremi n-​nuqqas taʼ fidi jistaʼ jirriżulta minn qalb imħassra. Iżda dan ma kienx il-​każ taʼ Żakkarija u l-​appostli taʼ Ġesù fl-​eżempji msemmijin iktar kmieni. In-​nuqqas taʼ fidi tagħhom kien minħabba dgħjufija tal-​mument. Matul ħajjithom b’mod ġenerali wrew li ‘qalbhom kienet safja.’—Mattew 5:8.

Alla Jaf il-​Bżonnijiet Tagħna

L-​Iskrittura tgħinna nagħmlu distinzjoni bejn l-​ansjetà taʼ kuljum u d-​dnub taʼ nuqqas taʼ fidi. Sentimenti t’ansjetà taʼ kuljum jew anki n-​nuqqas taʼ fidi tal-​mument minħabba dgħjufijiet umani m’għandhomx jitħalltu man-​nuqqas totali taʼ fidi f’Alla li joriġina minn qalb ħażina u indifferenti. Għalhekk, il-​Kristjani m’għandhomx għalfejn jibqgħu jħossuhom mifluġin bil-​ħtija minħabba li xi drabi jħossuhom ansjużi.

Minkejja dan, irridu noqogħdu attenti li lansjetà ma tikbirx sal-​punt li tikkontrollalna ħajjitna. Għalhekk, nistgħu naraw l-​għerf fil-​kliem taʼ Ġesù meta qal: “Tinkwetawx ruħkom għal ħajjitkom, x’se tieklu jew x’tixorbu, anqas għal ġisimkom x’se tilbsu.” Imbagħad kompla b’dan il-​kliem taʼ faraġ: “Missierkom li hu fis-​smewwiet jaf li dan kollu teħtiġuh. Mela fittxu l-​ewwel is-​Saltna u l-​ġustizzja taʼ Alla, u dan kollu jingħatalkom ukoll.”​—Mattew 6:​25-33.

[Stampa f’paġna 24]

L-​appostlu Pawlu għadda mill-​ansjetajiet