L-​Aqwa Ġugarelli

X’tip taʼ ġugarell għandi nixtrilu lit-​tifel? Kemm għandi nonfoq flus fih? Jekk int ġenitur, x’aktarx li ħafna drabi għamilt dawn il-​mistoqsijiet. Madankollu, żgur tieħu pjaċir tkun taf li l-​aqwa ġugarelli jistgħu jkunu dawk li jqumu l-​inqas flus.

“It-​tfal jibbenefikaw iktar jekk jipparteċipaw u jesploraw b’mod attiv milli sempliċement josservaw bla ma jieħdu sehem. Għalhekk, ġugarelli sempliċi li jirrikjedu l-​immaġinazzjoni huma aħjar minn xi karozza sabiħa li tiswa ħafna flus u li taħdem bil-​batterija jew minn xi pupa li titkellem, għax dawn jillimitaw dak li jistgħu jagħmlu t-​tfal,” jgħid il-​ktieb Motivated Minds​—Raising Children to Love Learning. Dawn il-​ġugarelli forsi “għall-​ewwel it-​tfal jieħdu pjaċir bihom, imma normalment malajr jitilfu l-​interess fihom għax ma jħalluhomx jesperimentaw, jesploraw, jew joħolqu.”

Skond l-​età tat-​tfal, il-​ġugarelli li jistimulaw il-​moħħ jinkludu affarijiet li huma sempliċi bħalma huma bloks, kaxxi vojta, karti, materjal taʼ larti, u saħansitra ramel u ilma. “Ġugarelli żgħar, bħal annimali tar-​razzett,” jgħid Motivated Minds, “jagħtu ċans [lit-tfal] biex jgħaqqdu, jagħżlu, u jqabblu, u biex jiżviluppaw il-​kapaċità lingwistika tagħhom billi jivvintaw stejjer.” Il-​ktieb jissuġġerixxi wkoll strumenti mużikali sempliċi​—jekk tkun lest li tissaporti l-​ħsejjes​—għax dawn jippermettu lit-​tfal jesploraw il-​ħsejjes u l-​forom tagħhom.

It-tfal għandhom immaġinazzjoni ħajja, u huma ħerqana biex jitgħallmu u jilagħbu. Għalhekk, għax ma tgħinhomx f’dawn it-​tliet oqsma billi tagħżlilhom il-​ġugarelli bil-​għaqal.