Kindergardin bla Ġugarelli

MINN KITTIEB GĦAL STENBAĦ! FIL-​ĠERMANJA

Għodwa waħda meta t-​tfal daħlu fil-​klassijiet taʼ l-​iskola tal-​kindergardin, sabu li fil-​kmamar ma kien hemm xejn ħlief l-​għamara. Kien għalxejn li bdew ifittxu l-​pupi, il-​logħob, u s-​soft toys. U lanqas ma kien hemm kotba jew bloks. Lanqas il-​karti u l-​imqass ma kienu jidhru. Il-​ġugarelli kollha tneħħew u ma kinux se jerġgħu jitpoġġew f’posthom qabel jgħaddu tliet xhur. X’kien ġara?

Din l-​iskola tal-​kindergardin hi waħda minn għadd taʼ skejjel li dejjem qed jiżdiedu fl-​Awstrija, il-​Ġermanja, u l-​Isvizzera u li qed jipparteċipaw fi proġett ġdid u straordinarju msejjaħ Kindergardin bla Ġugarelli. Għalkemm forsi tistaʼ tinstemaʼ xi ħaġa stramba, dan il-​proġett, li kien rikkmandat ħafna minn esperti tas-​saħħa taʼ l-​Unjoni Ewropea, għandu l-​iskop li jgħin biex jiġu evitati l-​vizzji. Fi snin reċenti, ir-​riċerkaturi bdew jirrealizzaw li n-​nies inqas għandhom ċans jaqgħu f’xi vizzji jekk jiżviluppaw abbiltajiet soċjali kmieni f’ħajjithom. Rapport f’gazzetta jgħid li dawn jinkludu “abbiltajiet li jikkomunikaw u li jagħmlu kuntatt faċilment, li jkunu kapaċi jittrattaw maʼ opinjonijiet differenti u li jieħdu r-​responsabbiltà t’għemilhom, li jagħmlu miri għalihom infushom, li jagħrfu l-​problemi, li jiksbu l-​għajnuna, u li jsibu soluzzjoni.” Skond dawk li pproponew il-​programm, dawn l-​abbiltajiet għandhom jiġu żviluppati kmieni kemm jistaʼ jkun, u perijodi bla ġugarelli jaqdu dan l-​iskop għax jinkuraġġixxu l-​kreattività tat-​tfal u l-​fiduċja fihom infushom.

Dan iI-proġett taʼ tliet xhur bla ġugarelli kien pjanat bir-​reqqa u diskuss kemm mal-​ġenituri u kemm mat-​tfal. Għall-​ewwel, xi tfal iħossuhom mitlufin mingħajr ġugarelli. “Hemm skejjel taż-​żgħar fejn lit-​tfal ma jkunux jistgħu jikkontrollawhom għall-​ewwel erbaʼ ġimgħat,” u dawk li ppjanaw dan il-​proġett ma jkunux jafu x’se jaqbdu jagħmlu, jinnota r-​rapport. Iżda t-​tfal jitgħallmu jaddattaw u jitgħallmu jkunu kreattivi. Mingħajr ġugarelli biex jilagħbu bihom, it-​tfal jikkonsultaw, jippjanaw, u jilagħbu flimkien iktar, u b’hekk itejbu l-​abbiltajiet soċjali u lingwistiċi tagħhom. Xi wħud li qabel kienu jevitaw tfal oħra u kienu jippreferu jilagħbu bil-​ġugarelli tagħhom, issa qed jagħmlu l-​ħbieb. Il-​ġenituri wkoll innotaw bidliet pożittivi. Huma qalu li t-​tfal kienu qed iġibu ruħhom aħjar meta jilagħbu u kienu iktar kreattivi minn qabel.