Il-​Vjolenza Fuq in-​Nisa—Problema Globali

IL-​25 taʼ Novembru huwa l-​Jum Internazzjonali għall-​Eliminazzjoni tal-​Vjolenza fuq in-​Nisa. Dan il-​jum ġie rikonoxxut mill-​Assemblea Ġenerali tal-​Ġnus Magħquda fl-​1999 sabiex il-​pubbliku jsir konxju tal-​ksur tad-​drittijiet tan-​nisa. Għala kien hemm bżonn li jittieħed dan il-​pass?

F’ħafna kulturi, in-​nisa huma meqjusin u trattati bħala ċittadini inferjuri jew inqas importanti. Il-​preġudizzji kontrihom għandhom għeruqhom fil-​fond. Kwalunkwe forma taʼ vjolenza bbażata fuq il-​fatt li huma nisa hija problema kontinwa, saħansitra fl-​hekk imsejħa pajjiżi żviluppati. Skond Kofi Annan, li qabel kien is-​Segretarju Ġenerali tal-​ĠM, “il-​vjolenza fuq in-​nisa hi mifruxa mal-​globu kollu, u sseħħ f’kull soċjetà u kultura. Din teffettwa lin-​nisa taʼ kwalunkwe razza, etniċità, oriġini soċjali, twelid jew stat ieħor li jistaʼ jkollhom.”

Radhika Coomaraswamy, li qabel kienet Riporter Speċjali għall-​Kummissjoni tal-​ĠM għad-​Drittijiet tal-​Bniedem rigward il-​vjolenza fuq in-​nisa, tgħid li l-​maġġuranza min-​nisa jqisu l-​vjolenza fuqhom bħala “tabù, inviżibbli għas-​soċjetà u li hi realtà taʼ mistħija.” L-​istatistika maħruġa minn istituzzjoni fl-​Olanda, li tistudja aspetti fl-​imġiba tal-​vittmi li setgħu wasslu biex issirilhom vjolenza fuqhom, tindika li 23 fil-​mija min-​nisa f’pajjiż wieħed fl-​Amerika t’Isfel, jew madwar 1 minn kull 4, isofru xi forma taʼ vjolenza domestika. Bl-​istess mod, il-​Kunsill taʼ l-​Ewropa jikkalkula li waħda minn kull erbaʼ nisa Ewropej issofri vjolenza domestika matul ħajjitha. Skond il-​British Home Office (id-Dipartiment taʼ l-​Affarijiet Interni Britanniku), fl-​Ingilterra u Wales f’sena waħda reċenti, bejn wieħed u ieħor inqatlu żewġ nisa kull ġimgħa mill-​irġiel li kienu jew ma kinux għadhom magħhom. Ir-​rivista India Today International irrapportat li “għan-​nisa minn madwar l-​Indja kollha, il-​biżaʼ huwa bħal sieħeb dejjem preżenti u l-​istupru hu bħal stranġier li jistgħu jħabbtu wiċċhom miegħu f’kull kantuniera, fi kwalunkwe triq, f’kull post pubbliku, fi kwalunkwe ħin.” L-​Amnesty International tiddeskrivi l-​vjolenza fuq in-​nisa u t-​tfajliet bħala “l-​iktar problema mifruxa tad-​drittijiet tal-​bniedem” li teżisti llum.

Qegħdin l-​istatistiki msemmijin hawn fuq jirriflettu l-​attitudni t’Alla lejn in-​nisa? Din il-​kwistjoni se tiġi diskussa fl-​artiklu li jmiss.