Għala Ħafna Jħossuhom Bla Tama

Madwar id-​dinja, żviluppi inkwetanti qed jikkaġunaw biżaʼ dwar il-​futur. F’għadd li dejjem jiżdied taʼ bliet qed jintużaw vidjo kameras biex jgħassu mill-​qrib liċ-​ċittadini. Minħabba l-​biżaʼ mit-​terroristi, bosta ajruporti li jintużaw ħafna kważi saru kampijiet militari. Għadd li dejjem jiżdied taʼ ħallelin u pedofili jħufu fuq l-​Internet biex isibu vittmi li ma jissuspettawx dwar l-​intenzjonijiet mill-​agħar tagħhom. Fejn jidħol l-​ambjent, il-​ħajja futura tal-​pjaneta tagħna qed tiġi mhedda mit-​tinġis, mit-​tqaċċit tas-​siġar, mill-​estinzjoni, u mis-​sħana globali.

WAQT li dawn l-​affarijiet lanqas biss konna nimmaġinawhom żewġ jew tliet ġenerazzjonijiet ilu, illum saru xi ħaġa globali. Ħafna nies għandhom raġun jistaqsu x’qed jiġrilha d-​dinja u x’tip taʼ ħajja hemm jistenna lilhom u lil uliedhom. Se jiġi ż-​żmien meta n-​nies ikunu beżgħanin wisq biex jitilgħu fuq xarabank, ferrovija, jew ajruplan? Bil-​prezzijiet dejjem jogħlew u b’iktar u iktar nies jużaw ir-​riżorsi taʼ l-​art, se jkunu jistgħu l-​ġenerazzjonijiet tal-​futur jaffordjaw kura medika tajba, ikel taʼ kwalità, u biżżejjed fuel?

“Il-​futur jidher tassew tal-​biżaʼ,” qal ministru tas-​saħħa Kanadiż rigward l-​ispejjeż tas-​saħħa li dejjem jogħlew. Is-​sitwazzjoni hi allarmanti wkoll rigward l-​ikel u l-​fuel. Għala? Xi pajjiżi qed jinvestu ħafna flus biex jiżviluppaw il-​fuel bijoloġiku, bħall-​ethanol, li jittieħed mill-​ħxejjex, sabiex ma jibqgħux jiddependu daqshekk mill-​fuel li jittieħed mill-​fossili. Għalhekk, għall-​ewwel darba fl-​istorja, żaqq il-​bniedem qed tikkompeti mat-​tank tal-​fuel tal-​karozza għal dak li tipproduċi l-​art disponibbli. Minħabba f’hekk, diġà qed tinħass l-​inflazzjoni fil-​prezzijiet taʼ l-​ikel.

Sadanittant, id-​differenza bejn is-​sinjuri u l-​foqra qed tikber u qed iżżid it-​tensjoni soċjali. “F’dawn l-​ewwel għaxar snin tas-​seklu 21 issib titjib kbir ħafna fil-​benesseri tal-​bniedem kif ukoll ċaħda estrema,” jgħid rapport taʼ l-​Organizzazzjoni Dinjija tas-​Saħħa. “F’xi wħud mill-​iktar pajjiżi fqar, in-​nies jgħixu nofs l-​età taʼ dawk li jgħixu fl-​iktar pajjiżi sinjuri.” Il-​kaġuni primarji huma l-​mard u t-​taħwid soċjali u ekonomiku fi stati fejn il-​gvernijiet m’humiex stabbli.

Biex tkompli tgħaxxaqha hemm it-​theddida inkwetanti tas-​sħana globali, li tistaʼ tikkaġuna li iktar art issir deżert u t-​temp isir iktar estrem, u mhux taʼ b’xejn li ħafna nies informati jibżgħu mill-​futur. Il-​Bulletin of the Atomic Scientists, li jistabbilixxi l-​hekk imsejjaħ Arloġġ taʼ Jum il-​Kundanna, jitkellem dwar biżaʼ minn futur ikrah “hekk kif ix-​xjenzati jkomplu jaraw l-​effetti [tas-sħana globali] fuq diversi aspetti taʼ l-​ekosistemi komplikati taʼ l-​Art.”

Huma l-​prospetti tagħna koroh daqskemm jidhru li huma? Tiddependi l-​unika tama tagħna għal futur hieni mill-​mexxejja tan-​negozju, tal-​politika, tar-​reliġjon, u tax-​xjenza? ‘Liema għażla oħra għandna?’ jistaqsu xi wħud. ‘Aħna stess għamilna din il-​balbuljata u aħna stess irridu nsolvuha.’ Oħrajn iħossu li l-​bnedmin sempliċement ma jistgħux isibu soluzzjoni u li l-​unika tama tagħna għal futur fis-​sigurtà tinsab f’idejn Alla. Jekk inhu hekk, kif nistgħu nkunu ċerti li Alla hu interessat fina u li mhux se jħallina neqirdu lilna nfusna? L-​artikli li ġejjin se jwieġbu dawn il-​mistoqsijiet.

[Kumment f’paġna 3]

Tiddependi l-​unika tama tagħna għal futur hieni mill-​mexxejja tan-​negozju, tal-​politika, tar-​reliġjon, u tax-​xjenza?