Jistaʼ l-​Bniedem Jiggarantixxi Futur Hieni?

Għadek kif mort toqgħod f’dar ġdida li tidher li hi mibnija fis-​sod u sabiħa. Minn dejjem xtaqt dar bħal din. Jidher li għandek futur sabiħ quddiemek! Imma wara biss ftit snin jibdew ħerġin difetti serji fl-​istruttura tad-​dar u jkollok twaqqagħha. Tassew jiddispjaċik. Imma m’intix waħdek. Djar oħrajn fl-​inħawi tiegħek għandhom l-​istess problemi. L-​investigazzjoni tikxef li dawn il-​problemi ġew kaġunati minn difetti fid-​disinn, fil-​bini, u fil-​ġebel.

ID-​DINJA tinsab f’inkwiet kbir bħal din id-​dar. Minkejja esperimenti soċjali u politiċi bla għadd u avanzi taʼ l-​għaġeb fix-​xjenza u fit-​teknoloġija, l-​istruttura bażika tas-​soċjetà donnha qed tisfaxxa. F’diversi pajjiżi, il-​ksur tal-​liġi u l-​anarkija huma diġà komuni. Se jiġu l-​bnedmin sforzati mid-​disprament biex isolvu l-​problemi tagħhom, u fl-​aħħar mill-​aħħar joħolqu gvern tajjeb? Ikkunsidra x’qalu xi awtoritajiet dwar l-​istorja tal-​bniedem.

“Għamilna Minn Kollox”

Nies intellettwali bħall-​filosfu Grieg Platun u l-​filosfu politiku u soċjalist Ġermaniż Karl Marx għamlu sforz biex itejbu d-​dinja billi pproponew diversi tipi taʼ gvernijiet. B’liema riżultat? Artiklu fil-​ġurnal New Statesman kien jgħid: “Aħna la neħħejna l-​faqar u lanqas ġibna l-​paċi dinjija. Minflok, donnu għamilna eżatt l-​oppost. Mhux għax ma pprovajniex. Għamilna minn kollox biex il-​gwerra tiġi evitata, mill-​komuniżmu sas-​suq ħieles; mil-​Lega tan-​Nazzjonijiet sal-​ġbir taʼ ħażna nukleari. Iġġilidna wisq ‘gwerer biex intemmu l-​gwerra’ biex mingħalina nkunu nafu kif intemmu l-​gwerra, u l-​bliet interni tagħna donnhom għaddejjin minn attakk militari kontinwu.” L-​artiklu kompla jgħid: “Bdejna s-​seklu [20] b’tama qawwija li x-​xjenzati jistgħu jsalvawna u spiċċajnieh ma nemmnux kelma waħda milli jgħidu.”

Fl-2001, Eric Hobsbawm, professur taʼ l-​ekonomija u l-​istorja soċjali fl-​Università taʼ Londra, li issa hu rtirat imma għad għandu t-​titlu taʼ professur, kiteb li s-​sistemi politiċi tal-​bnedmin “qed jiffaċċjaw era meta l-​effett taʼ l-​għemejjel tal-​bniedem fuq in-​natura u l-​globu huwa kbir ħafna.” Biex insolvu, jew intaffu, dawn il-​problemi “hemm bżonn li jittieħdu miżuri li kważi żgur li m’humiex se jiġu appoġġati mill-​għadd tal-​voti jew billi jitkejlu l-​preferenzi tal-​konsumaturi. Dawn żgur li m’humiex prospetti fit-​tul pożittivi la għad-​demokrazija u lanqas għall-​globu.”

Peress li qed jara li l-​umanità qed tiffaċċja katastrofi, Stephen Hawking staqsa: “F’dinja li tinsab f’kaos politiku, soċjali, u ambjentali, kif tistaʼ r-​razza umana tibqaʼ 100 sena oħra?”

Il-​Bnedmin Għala Ma Rnexxewx?

Il-​Bibbja biss tagħti spjegazzjoni sodisfaċenti għala l-​bniedem assolutament ma rnexxilux jaħkem lilu nnifsu b’suċċess. Raġuni waħda hi li l-​Bibbja turina ċar u tond x’inhi l-​kundizzjoni tal-​bniedem. Per eżempju, ikkunsidra l-​erbaʼ veritajiet bażiċi li ġejjin.

Aħna lkoll imperfetti. “Kollha dinbu u jonqsu milli jilħqu l-​glorja t’Alla.” (Rumani 3:23) Sewwasew bħalma d-​difetti fil-​ġebel jistgħu jġiegħlu bini jiddgħajjef u jiġġarraf, hekk ukoll l-​imperfezzjoni li wirtu l-​bnedmin tidher f’modi li jistgħu jdgħajfu s-​soċjetà. Dawn jinkludu tendenzi lejn il-​korruzzjoni, id-​diżonestà, ir-​regħba, u l-​abbuż tal-​poter. Dawn m’humiex affarijiet ġodda. Xi tlett elef sena ilu, kittieb għaref tal-​Bibbja osserva: “Bniedem jaħkem fuq ieħor u jagħmillu l-​ħsara.”—Koħèlet 8:9.

Il-ħakkiema tal-​gvern u l-​qrati tal-​liġi jirrikonoxxu l-​imperfezzjonijiet u d-​dgħjufijiet tagħna u jipprovaw ipattu għalihom b’ruxxmata liġijiet. Imma huma jagħmlu dan waqt li jafu sew li ma jistgħux joħorġu liġi biex jisforzaw lin-​nies iħobbu lil għajrhom jew biex ikunu jixtiequ jobdu l-​liġi.

Il-mewt tirbaħna. “La tittamawx fil-​kbarat, għax il-​bniedem ma jsalvakomx. Malli toħroġ ruħu [jew il-​forza tal-​ħajja tiegħu], lejn l-​art jerġaʼ jmur; jintemmu dakinhar ħsibijietu.” (Salm 146:3, 4) Kunsidrat bħala wieħed mill-​iktar ħakkiema għorrief li qatt eżistew, is-​Sultan Salamun taʼ Iżrael tal-​qedem ra kemm ix-​xogħol iebes tiegħu setaʼ jkollu riżultati fiergħa. Hu kiteb: “Stmerrejt ukoll ix-​xogħol kollu taħt ix-​xemx li fih tħabatt u li jkolli nħallih għal min jiġi warajja. U dan min jaf ikunx għaref inkella iblah? Ikun xi jkun hu jsir is-​sid taʼ xogħli kollu . . . Dan ukoll hu frugħa.”—Koħèlet 2:18, 19.

M’għandniex l-​abbiltà li naħkmu lilna nfusna sew. “Triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” (Ġeremija 10:23) Anki kieku konna perfetti, il-​Bibbja tgħallem li skond l-​iskop oriġinali t’Alla, il-​bnedmin la ngħataw id-​dritt mingħand Alla li jaħkmu lilhom infushom u lanqas għandhom l-​abbiltà li jagħmlu dan b’mod effettiv. Fil-​fatt, in-​nies għala għandhom it-​tendenza li jirritaw ruħhom jekk bniedem ieħor jew grupp taʼ bnedmin jgħidulhom x’għandhom jagħmlu jew ipoġġulhom livelli morali jew etiċi? It-​tweġiba hi li aħna konna maħluqin b’tali mod li nduru lejn awtorità ogħla minna nfusna għall-​gwida fil-​ħajja. Il-​Wieħed li għandu din l-​awtorità hu Alla.—Isaija 33:22; Atti 4:19; 5:29.

Il-bnedmin huma influwenzati minn ħakkiem li ma jidhirx. “Id-​dinja kollha qiegħda taħt il-​qawwa tal-​Ħażin”—Satana x-​Xitan. (1 Ġwanni 5:19) Jekk dawk li jmexxu kumpanija jkunu korrotti għalkollox—u ħadd ma jkollu awtorità fuqhom—x’jistaʼ jagħmel sempliċi impjegat biex jirranġa l-​affarijiet? Kważi xejn. L-​istess huwa minnu meta niġu biex nirranġaw il-​problemi li fl-​aħħar mill-​aħħar huma kaġunati mill-​ħakkiema li ma jidhrux taʼ din id-​dinja—ħlejjaq spirti inviżibbli u mill-​agħar li qed jaħdmu taħt it-​tmexxija taʼ Satana. Il-​Bibbja tiddeskrivi lil dawn il-​ħakkiema bħala “gvernijiet,” “awtoritajiet,” “ħakkiema dinjin taʼ dan id-​dlam,” u “forzi taʼ l-​ispirti mill-​agħar fil-​postijiet tas-​sema.”—Efesin 6:12.

Madankollu, il-​Bibbja tagħmel iktar milli sempliċement tikxef in-​nuqqasijiet tal-​bniedem u l-​ħakkiema tad-​dinja li ma jidhrux. Tipprovdi wkoll aħbar tajba li hi soluzzjoni ċerta għall-​problemi kollha tagħna, u b’hekk tagħtina bażi soda biex ikollna tama.

Il-​Ħallieq Tagħna Jsalvana!

Kieku kellna noqogħdu nipprovaw waħedna, qatt ma kien se jirnexxilna nsibu soluzzjoni għal dawn il-​problemi. Lanqas l-​iktar bniedem intelliġenti, taʼ qawwa, jew għani m’għandu l-​poter li jbiddel waħda mill-​erbaʼ realtajiet li semmejna f’dan l-​artiklu.a Imma bħalma se jiġi spjegat fl-​artiklu li jmiss, il-​Ħallieq tagħna la nsiena u lanqas abbandunana. Fil-​fatt, bħala s-​Sovran taʼ l-​art bi dritt, se jneħħi kull ostaklu li jtellfilna l-​ferħ. (1 Ġwanni 4:8) Iktar minn hekk, hu dalwaqt se jagħmel dan. Kif nafu?

Bħalma ġie spjegat fl-​aħħar ħarġa taʼ din ir-​rivista bl-​Ingliż, il-​ġrajjiet dinjin u l-​kundizzjonijiet soċjali jagħmluhielna ċara ħafna li qed ngħixu tassew “fl-​aħħar jiem” taʼ din id-​dinja. (2 Timotju 3:1; Mattew 24:3-7) Le, it-​tmiem mhux se jiġi fl-​għamla taʼ xi olokawst nukleari jew permezz taʼ xi ħabta maʼ xi asterojde jew b’xi mod ieħor li fih jinqerdu bl-​addoċċ kemm it-​tajbin u kemm il-​ħżiena. Minflok, se jkun ir-​riżultat taʼ intervent divin immirat b’mod speċifiku lejn il-​ħżiena, inkluż dawk li jinsistu biex il-​bniedem ikompli jaħkem. (Salm 37:10; 2 Pietru 3:7) Fl-​istess waqt, Alla se jtemm it-​tbatija kollha li kkaġunaw dawn l-​opponenti t’Alla.b—2 Tessalonikin 1:6-9.

Imbagħad il-​Ħallieq se jsolvi l-​problemi tagħna fejn tidħol it-​tmexxija billi jagħti awtorità sħiħa fuq l-​art lil ħakma msejħa s-​“saltna t’Alla.” (Luqa 4:43) Bħalma se naraw issa, dan il-​gvern dinji jgħinna nħarsu lejn il-​futur minn lenti totalment differenti.

[Noti taʼ taħt]

[Kaxxa/Stampa f’paġna 5]

‘DIFETTI FIL-​ĠEBEL’ FL-​ISTRUTTURA TAS-​SOĊJETÀ UMANA

◼ Aħna lkoll imperfetti.

◼ Il-​mewt tirbaħna.

◼ M’għandniex l-​abbiltà li naħkmu lilna nfusna sew.

◼ Il-​bnedmin huma influwenzati minn ħakkiem li ma jidhirx.

[Kaxxa f’paġna 6]

IL-​BNEDMIN M’HUMIEX SE JEQIRDU L-​ART!

Il-​Bibbja fiha ħafna evidenza li l-​iskop tal-​Ħallieq għall-​art hu li tkun dar paċifika u mingħajr perikli għall-​bnedmin li jibżgħu minn Alla. Ikkunsidra l-​iskritturi li ġejjin.

“Int waqqaft l-​art fuq is-​sisien tagħha, b’mod li qatt ma titħarrek.”—Salm 104:5.

“L-​art waqqaftha, u żammet fis-​sod.”—Salm 119:90.

“Ġenerazzjoni tmur u oħra tiġi, imma l-​art tibqaʼ għal dejjem.”—Koħèlet 1:4.

“Mimlija hi l-​art bl-​għarfien tal-​Mulej bħalma l-​baħar hu miksi bl-​ilmijiet.”—Isaija 11:9.

“[Ġeħova] sawwar l-​art, għamilha u wettaqha, ma ħalaqhiex għall-​baħħ, sawwarha biex jgħammru fiha.”—Isaija 45:18.