Iż-​Żmien Meta Alla Mhux Se Jippermetti Iktar is-​Sofferenza Qed Joqrob

KULFEJN tħares, tara s-​sofferenza. Xi nies iġibuha b’idejhom stess. Huma jlaqqtu xi marda trasmessa sesswalment jew ibatu l-​konsegwenzi li jiġu mill-​abbuż tad-​drogi jew taʼ l-​alkoħol jew tat-​tipjip. Jistgħu wkoll jinqalgħulhom problemi tas-​saħħa minħabba li ma jkollhomx drawwiet tajbin taʼ l-​ikel. Madankollu, ħafna mis-​sofferenza tiġi minn fatturi jew ġrajjiet li l-​bniedem normali m’għandux kontroll fuqhom: gwerer, vjolenza etnika, kriminalità, faqar, ġuħ, mard. Xi ħaġa oħra li l-​bnedmin bażikament m’għandhomx kontroll fuqha hija s-​sofferenza marbuta max-​xjuħija u l-​mewt.

Il-Bibbja tassigurana li “Alla hu mħabba.” (1 Ġwann 4:8) Mela allura għala ppermetta li għal sekli sħaħ ikun hawn din is-​sofferenza kollha? Meta se jirranġaha s-​sitwazzjoni? Biex inwieġbu dawn il-​mistoqsijiet, għandna bżonn neżaminaw x’inhu l-​iskop t’Alla għall-​bnedmin. Dan se jgħinna nifhmu għala Alla ppermetta s-​sofferenza u x’se jagħmel dwarha.

Ir-​Rigal tar-​Rieda Ħielsa

Meta Alla ħalaq l-​ewwel bniedem, hu m’għamilx biss ġisem bil-​moħħ. Iżjed minn hekk, lil Adam u Eva, Alla ma ħalaqhomx biex ikunu robots bla moħħ. Hu poġġa fihom il-​fakultà tar-​rieda ħielsa. Dan kien rigal mill-​isbaħ, għax ‘Alla ħares lejn kull ma kien għamel, u, ara, kollox kien tajjeb ħafna.’ (Ġenesi 1:31) Iva, “perfett għemilu.” (Dewteronomju 32:4) Ilkoll kemm aħna napprezzawh dan ir-​rigal tar-​rieda ħielsa. Dan għaliex ma rridux li jkollna lil xi ħaddieħor jgħidilna x’għandna naħsbu u nagħmlu mingħajr ma qatt ikollna xi għażla fi kwalunkwe ħaġa.

Madankollu, kellu dan ir-​rigal mill-​isbaħ tar-​rieda ħielsa jintuża mingħajr restrizzjonijiet? Il-​Kelma t’Alla twieġeb permezz taʼ l-​istruzzjonijiet li ngħataw lill-​Kristjani bikrin: “Għixu bħala nies ħielsa, mhux li tinqdew bil-​ħelsien tagħkom biex bħallikieku tgħattu l-​ħażen, imma bħala qaddejja taʼ Alla.” (1 Pietru 2:16) Għall-​ġid taʼ kulħadd, irid ikun hemm limitu. Għaldaqstant, ir-​rieda ħielsa kellha tiġi kontrollata bir-​regola tal-​liġi. Inkella jkun hemm ħafna taħwid.

Il-​Liġi taʼ Min?

Il-​Liġi taʼ min kellha tiddetermina safejn kien xieraq li tasal il-​libertà? It-​tweġiba għal din il-​mistoqsija għandha x’taqsam mar-​raġuni ewlenija għala Alla ppermetta s-​sofferenza. Ladarba huwa Alla li ħalaq il-​bniedem, hu jaf l-​aħjar x’liġijiet għandhom bżonn jobdu l-​bnedmin kemm għall-​ġid tagħhom u kemm għall-​ġid t’oħrajn. Il-​Bibbja tpoġġiha hekk: “Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi.”—Isaija 48:17.

B’mod ċar, punt vitali huwa dan: Il-​bnedmin ma nħalqux biex ikunu indipendenti minn Alla. Hu għamilhom b’tali mod li s-​suċċess u l-​ferħ tagħhom ikunu jiddependu minn kemm jobdu l-​liġijiet taʼ tjieba tiegħu. Ġeremija, il-​profeta t’Alla, qal: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.”—Ġeremija 10:23.

Alla għamel lill-​bnedmin suġġetti għal-​liġijiet fiżiċi tiegħu, bħal ngħidu aħna l-​liġi tal-​gravità. Bl-​istess mod, hu għamel lill-​bnedmin suġġetti għal-​liġijiet morali tiegħu li huma mfasslin biex jipproduċu soċjetà paċifika. Mela mhux taʼ b’xejn li l-​Kelma t’Alla tħeġġeġ: “Ittama fil-Mulej b’qalbek kollha, u tafdax fl-​għaqal tiegħek.”—Proverbji 3:5.

Għalhekk, mingħajr il-​ħakma t’Alla, il-​familja umana ma tistaʼ qatt tikkontrolla lilha nfisha b’suċċess. Biex jipprovaw ikunu indipendenti minn Alla, in-​nies jivvintaw sistemi soċjali, ekonomiċi, politiċi, u reliġjużi li jmorru kontra xulxin, u “bniedem jaħkem fuq ieħor u jagħmillu l-​ħsara.”—Koħèlet 8:9.

X’Mar Ħażin?

Alla ta lill-​ewwel ġenituri tagħna, Adam u Eva, bidu perfett. Huma kellhom ġisem u moħħ perfetti u ġnien ġenna bħala d-​dar tagħhom. Li kieku qagħdu għall-​ħakma t’Alla, kienu jibqgħu perfetti u ferħanin. Maż-​żmien, kienu jkunu l-​ġenituri taʼ familja umana, perfetta, u ferħana li tgħix f’art magħmula ġenna. Dan kien l-​iskop t’Alla għall-​bnedmin.—Ġenesi 1:​27-​29; 2:​15.

Madankollu, l-​antenati oriġinali tagħna m’użawhiex tajjeb ir-​rieda ħielsa tagħhom. B’mod żbaljat ħasbu li setaʼ jkollhom suċċess jekk jinqatgħu minn Alla. Bir-​rieda ħielsa tagħhom għażlu li jaqbżu l-​limiti tal-​liġijiet tiegħu. (Ġenesi, kapitlu 3) Minħabba li ċaħdu l-​ħakma tiegħu, hu ma baqax iktar obbligat li jsostnihom fil-​perfezzjoni. ‘Huma mxew ħażin miegħu, ma baqgħux uliedu, id-​difett huwa tagħhom.’—Dewteronomju 32:​5, Karm Żammit.

Minn meta m’obdewx lil Alla, Adam u Eva bdew jitħassru f’ġisimhom u f’moħħhom. Jehovah hu s-​sors tal-​ħajja. (Salm 36:10 [36:​9, NW]) Għalhekk, billi nqatgħu minn Jehovah, l-​ewwel tnejn min-​nies saru imperfetti u maż-​żmien mietu. (Ġenesi 3:19) Fi qbil mal-​liġijiet tal-​wirt ġenetiku, it-​tfal tagħhom setgħu jirċievu biss dak li kellhom il-​ġenituri tagħhom. U x’kien dan? L-​imperfezzjoni u l-​mewt. Għalhekk l-​appostlu Pawlu kiteb: “Kien permezz taʼ bniedem wieħed [Adam] li fid-​dinja daħal id-​dnub, u permezz tad-​dnub il-​mewt, u hekk il-​mewt laħqet il-​bnedmin kollha, għax kollha dinbu.”—Rumani 5:12.

Il-​Kwistjoni Prinċipali—Is-​Sovranità

Meta Adam u Eva rribellaw kontra Alla, huma sfidaw is-​sovranità tiegħu, jiġifieri, id-​dritt li għandu biex jaħkem. Jehovah setaʼ qeridhom u reġaʼ beda b’koppja oħra. B’dan, iżda, ma kienx se jsolvi l-​kwistjoni taʼ min kellu d-​dritt li jaħkem u liema ħakma kienet sewwa u l-​aħjar għan-​nies. Billi ngħataw iż-​żmien biex jiżviluppaw is-​soċjetajiet tagħhom skond l-​ideat tagħhom, il-​bnedmin setgħu juru mingħajr ebda dubju jekk ħakma indipendenti minn Alla setgħetx qatt tirnexxi.

X’juruna l-​eluf taʼ snin li għaddew fl-​istorja tal-​bniedem? Għal dawn is-​sekli kollha, in-​nies ipprovaw ħafna tipi taʼ sistemi soċjali, ekonomiċi, politiċi, u reliġjużi. Madankollu, il-​ħażen u s-​sofferenza baqgħu. Fil-​fatt, ‘in-​nies il-​ħżiena marru mill-​ħażin għall-​agħar,’ speċjalment fi żmienna.—2 Timotju 3:13.

Is-seklu 20 ra quċċata f’dawk li huma kisbiet xjentifiċi u industrijali. Imma ra wkoll l-​agħar sofferenzi li qatt kien hawn fl-​istorja tar-​razza umana. Barra minn hekk, minkejja l-​avvanzi li saru fil-​mediċina, il-​liġi t’Alla għadha tgħodd: Il-​bnedmin separati minn Alla—is-​sors tal-​ħajja—jimirdu, jixjieħu, u jmutu. Kemm intwera ċar li l-​bnedmin ma jistgħux ‘jidderieġu l-​passi tagħhom’!

Is-​Sovranità t’Alla Stabbilita

Dan l-​esperiment traġiku taʼ indipendenza minn Alla wera darba għal dejjem li l-​bniedem qatt ma jistaʼ jaħkem b’suċċess jekk ikun indipendenti minn Alla. Il-​ħakma t’Alla biss tistaʼ ġġib il-​ferħ, l-​unità, is-​saħħa, u l-​ħajja. Iktar minn hekk, il-​Kelma infallibbli t’Alla Jehovah, il-​Bibbja Mqaddsa, turi li qed ngħixu fl-​aħħar jiem li l-​bniedem qed jaħkem indipendenti minn Alla. (2 Timotju 3:​1-5) Iż-​żmien li Jehovah għamel jittollera dan flimkien mal-​ħażen u s-​sofferenza riesaq lejn tmiemu.

Alla dalwaqt se jintervieni fil-​ħakma umana. L-​Iskrittura tgħidilna: “Mbagħad, fi żmien dawn is-​slaten [il-ħakmiet mill-​bniedem li jeżistu bħalissa], Alla tas-​sema jqajjem saltna [fis-sema] li ma tinqered qatt, u li l-​ħakma tagħha ma tgħaddix għal poplu ieħor [il-bnedmin qatt m’huma se jerġgħu jaħkmu d-​dinja]. Hija tfarrak u ttemm is-​saltniet l-​oħra kollha [il-ħakmiet preżenti], waqt li hi tibqaʼ wieqfa għal dejjem.”—Danjel 2:44.

Il-vindikazzjoni tas-​sovranità t’Alla Jehovah permezz tas-​Saltna tas-​sema hija t-​tema tal-​Bibbja. Ġesù dan għamlu t-​tagħlim prinċipali tiegħu. Hu qal: “Dan l-​Evanġelju tas-​Saltna jixxandar fid-​dinja kollha, biex il-​ġnus kollha jkollhom xhieda. Mbagħad jiġi t-​tmiem.”—Mattew 24:14.

Meta l-​ħakma minn Alla tieħu post il-​ħakma mill-​bniedem, min se jsalva u min m’huwiex? Fi Proverbji 2:​21, 22 ningħataw din l-​assiguranza: “It-​tajbin [dawk li jappoġġaw il-​ħakma t’Alla] jgħammru fl-​art, u n-​nies sewwa joqogħdu fiha; imma l-​ħżiena [dawk li ma jappoġġawx il-​ħakma t’Alla] mill-​art jitqaċċtu, u l-​qarrieqa jinqalgħu minnha.” Is-​salmista, ispirat b’mod divin, kanta: “Ftit ieħor, u l-​ħażin ma jkunx aktar . . . Imma l-​ġwejdin għad jirtu l-​art, u bi sliem kotran jitgħaxxqu. Il-​ġusti jirtu l-​art, u jgħammru fiha għal dejjem.”—Salm 37:​10, 11, 29.

Dinja Ġdida Meraviljuża

Taħt il-​ħakma tas-​Saltna t’Alla, dawk li jgħaddu mit-​tmiem tas-​sistema preżenti t’affarijiet se jidħlu f’art imnaddfa mill-​ħażen u s-​sofferenza. Il-​bnedmin se jingħataw istruzzjonijiet minn Alla, u maż-​żmien ‘l-​art se timtela bl-​għarfien tal-​Mulej bħalma l-​baħar hu miksi bl-​ilmijiet.’ (Isaija 11:9) Dan it-​tagħlim li jibni u jsaħħaħ moralment se jagħmel lis-​soċjetà umana waħda verament paċifika fejn kulħadd jaqbel maʼ xulxin. Għaldaqstant, mhux se jkun hemm iktar gwerer, qtil, vjolenza, stupru, serq, jew għemejjel faħxin oħrajn.

Il-benefiċċji fiżiċi u meraviljużi se jgelglu bħal xmara għall-​bnedmin ubbidjenti li se jkunu jgħixu fid-​dinja l-​ġdida t’Alla. Il-​konsegwenzi koroh li ġabet magħha r-​ribelljoni kontra l-​ħakma t’Alla se jitneħħew għalkollox. L-​imperfezzjoni, il-​mard, ix-​xjuħija, u l-​mewt se jkunu affarijiet tal-​passat. Il-​Bibbja taċċertana: “Ħadd minn min jgħammar hemm ma jgħid: ‘Jien marid.’” Barra minn hekk, l-​Iskrittura twiegħed: “Mbagħad jinfetħu għajnejn l-​għomja, jinfetħu widnejn it-​torox. Mbagħad iz-​zopp jaqbeż bħal għażżiela u lsien l-​imbikkma jinħall bil-​ferħ.” (Isaija 33:24; 35:​5, 6) X’gost li tkun mimli saħħa u enerġija kuljum—għal dejjem!

Taħt il-​gwida kollha mħabba t’Alla, l-​abitanti taʼ din id-​dinja l-​ġdida se jużaw l-​enerġiji u l-​abbiltajiet tagħhom biex l-​art jagħmluha ġenna globali. Il-​faqar u l-​ġuħ se jkunu spiċċaw u kulħadd se jkollu fejn joqgħod, għax il-​profezija taʼ Isaija tgħid: “Huma għad jibnu djarhom u jgħammru fihom, iħawwlu d-​dwieli u jieklu frotthom. Ma jibnux biex jgħammar ħaddieħor, u ma jħawwlux biex jiekol ħaddieħor.” (Isaija 65:​21, 22) Tabilħaqq, “kull wieħed jinsab taħt id-​dielja tiegħu, u taħt is-​siġra tat-​tin tiegħu; u ma jkunx hemm min iwerwirhom.”—Mikea 4:4.

L-art se tagħti l-​frott għall-​ħidma kollha mħabba t’Alla u tal-​bnedmin ubbidjenti. L-​Iskrittura twegħedna: “Ħa jifirħu d-​deżert u l-​art maħruqa; ħa jifraħ ix-​xagħri u jwarrad, ħa jwarrad bħar-​ranġis. . . . Iva, igelgel l-​ilma fid-​deżert, u l-​widien fix-​xagħri.” (Isaija 35:​1, 6) “Ikun kotran il-​qamħ fuq l-​art, jogħla sal-​qċaċet taʼ l-​għoljiet.”—Salm 72:16.

Xi ngħidu għall-​miljuni taʼ nies li mietu? Dawk li huma fil-​memorja t’Alla se jerġgħu jieħdu l-​ħajja, għax “kemm it-​tajbin u kemm il-​ħżiena [“dawk li m’humiex twajbin,” NW] għad iqumu minn bejn l-​imwiet.” (Atti 24:15) Iva, il-​mejtin se jerġgħu jieħdu l-​ħajja. Huma se jiġu mgħallmin il-​veritajiet meraviljużi dwar il-​ħakma t’Alla u se jingħataw l-​opportunità li jgħixu għal dejjem f’Ġenna taʼ l-​art.—Ġwann 5:​28, 29.

B’dan il-​mod, Alla Jehovah se jdawwar lura għalkollox il-​kundizzjoni tal-​biżaʼ li jassret lill-​umanità bis-​sofferenza, bil-​mard, u bil-​mewt għal eluf taʼ snin. Daqshekk mard! Daqshekk diżabilitajiet! Daqshekk mewt! Alla se “jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.”—Apokalissi 21:​3, 4.

Alla hekk se jtemmha s-​sofferenza. Hu se jeqred din id-​dinja korrotta u jagħti bidu għal sistema kompletament ġdida t’affarijiet li fiha “tgħammar il-​ġustizzja.” (2 Pietru 3:13) X’aħbar tajba hi din! Din id-​dinja l-​ġdida għandna bżonnha mill-​iktar fis possibbli. U ma rridux nistennew fit-​tul biex narawha. Mit-​twettiq tal-​profeziji tal-​Bibbja nafu li d-​dinja l-​ġdida qegħda fuq l-​għatba, u ż-​żmien meta Alla mhux se jippermetti iktar is-​sofferenza qed joqrob.—Mattew 24:​3-14.

[Kaxxa f’paġna 8]

Il-​Falliment tal-​Ħakma mill-​Bniedem

Helmut Schmidt, li għamel żmien jaqdi bħala l-​Kanċillier Ġermaniż, qal hekk dwar il-​ħakma mill-​bniedem: “Aħna l-​bnedmin . . . dejjem iggvernajna biss parti mid-​dinja, u fil-​biċċa l-​kbira dan għamilnieh ħażin ħafna. . . . Qatt ma ggvernajnieha b’paċi totali.” Il-​Human Development Report 1999 innota: “Il-​pajjiżi kollha jirrapportaw li l-​istruttura soċjali tagħhom qed titmermer minħabba inkwiet soċjali, żjieda fil-​kriminalità, iktar vjolenza fid-​djar. . . . It-​theddid globali qiegħed dejjem jiżdied b’mod li n-​nazzjonijiet m’għadhomx iktar kapaċi jlaħħqu miegħu, u r-​reazzjonijiet internazzjonali ma jistgħux iżommu iktar il-​pass tiegħu.”

[Stampi f’paġna 8]

“Bi sliem kotran jitgħaxxqu.” —Salm 37:11

[Stampa f’paġna 5]

It-​tielet minn fuq, omm u binha: FAO photo/B. Imevbore; isfel, splużjoni: U.S. National Archives photo