Nistgħu Nibbenefikaw Billi Nissaportu t-Tbatija
“Niddikjaraw henjin lil dawk li ssaportew.”—ĠAKBU 5:11.
1, 2. X’juri li Ġeħova ma riedx li l-bniedem ibati?
EBDA individwu normali ma jrid ibati; lanqas il-Ħallieq tagħna, Alla Ġeħova, ma jrid li l-bnedmin ibatu. Dan nistgħu narawh meta neżaminaw il-Kelma ispirata tiegħu u ninnotaw x’seħħ wara li ħalaq ir-raġel u l-mara. L-ewwel, Alla għamel lir-raġel. “Il-Mulej Alla sawwar il-bniedem mit-trab taʼ l-art u nefaħlu fi mnifsejh nifs il-ħajja, u l-bniedem sar ħlejqa ħajja.” (Ġenesi 2:7) Adam kellu ġisem u moħħ perfett, u ma kellux għalfejn jimrad jew imut.
2 Xi ngħidu għall-kundizzjonijiet li kien jgħix fihom Adam? “Il-Mulej Alla ħawwel ġnien fl-Għeden, in-naħa tal-lvant, u qiegħed hemm il-bniedem li kien sawwar. U l-Mulej Alla nibbet mill-art is-siġar kollha li jpaxxu l-għajn u bnina għall-ikel.” (Ġenesi 2:8, 9) Iva, Adam kellu dar meraviljuża. Ma kienx hemm tbatija fl-Għeden.
3. Liema prospetti kellha l-ewwel koppja umana?
3 Ġenesi 2:18 jgħidilna: “Il-Mulej Alla qal: ‘M’hux sewwa li l-bniedem jibqaʼ waħdu. Ħa nagħmillu għajnuna tgħodd għalih.’” Ġeħova ħalaq mara perfetta għal Adam, u għamillu possibbli l-prospett taʼ ħajja tal-familja ferħana. (Ġenesi 2:21-23) Il-Bibbja tkompli tgħidilna: “Berikhom Alla u qalilhom: ‘Nisslu u oktru, u imlew l-art, u aħkmuha.’” (Ġenesi 1:28) L-ewwel koppja umana kien se jkollhom il-privileġġ meraviljuż li jkabbru l-Ġenna taʼ l-art taʼ l-Għeden sakemm, maż-żmien, din kienet se tkopri l-art kollha, u b’hekk issir ġenna globali. U huma kellhom jipproduċu nisel hieni, li kien se jkun ħieles mit-tbatija. X’bidu meraviljuż!—Ġenesi 1:31.
Tibda t-Tbatija
4. Meta nħarsu lejn l-istorja, x’jidher ċar dwar l-umanità?
4 Madankollu, meta nħarsu lejn il-kundizzjoni tal-familja umana matul l-istorja, jidher ċar li xi ħaġa marret tassew ħażin. Seħħew affarijiet ħżiena, u l-familja umana batiet bil-kbir. Matul is-sekli, id-dixxendenti kollha taʼ Adam u Eva mardu, xjaħu, u maż-żmien mietu. Id-dinja żgur li m’hijiex ġenna taʼ l-art mimlija b’nies henjin. Is-sitwazzjoni hija deskritta bir-reqqa f’Rumani 8:22: “S’issa l-ħolqien kollu għadu jokrob u jħoss l-uġigħ flimkien.”
5. L-ewwel ġenituri tagħna kif kienu involuti f’li jintroduċu t-tbatija lill-familja umana?
5 M’għandniex inwaħħlu f’Ġeħova għat-tbatija kbira li eżistiet għal daqshekk żmien. (2 Samwel 22:31) Ftit mit-tort irid jingħata lill-bnedmin. “Tħassru l-bnedmin, għamlu ħwejjeġ taʼ min jistmellhom.” (Salm 14:1) L-ewwel ġenituri tagħna ngħataw kollox tajjeb fil-bidu. Kulma kien meħtieġ biex kollox jibqaʼ tajjeb kienet l-ubbidjenza lejn Alla, imma Adam u Eva għażlu li jkunu indipendenti minn Ġeħova. Ladarba l-ewwel ġenituri tagħna telqu lil Ġeħova, huma ma kinux se jibqgħu perfetti. Huma kienu se jiddeterjoraw sakemm imutu. L-imperfezzjoni ġiet mgħoddija lilna.—Ġenesi 3:17-19; Rumani 5:12.
6. Satana liema sehem kellu biex jintroduċi t-tbatija?
6 Ukoll, involut fil-bidu tat-tbatija kollha hu l-ħliqa spirtu li sar jissejjaħ Satana x-Xitan. Hu kien imżejjen bil-libertà taʼ l-għażla. Madankollu, hu uża ħażin din l-abbiltà biex jipprova jieħu l-qima hu. Madankollu, Ġeħova biss għandu jingħata qima, mhux il-ħolqien tiegħu. Kien Satana li ħajjar lil Adam u Eva biex jipprovaw ikunu indipendenti minn Ġeħova, bħallikieku huma setgħu b’dan il-mod ‘isiru bħal allat, li jafu t-tajjeb u l-ħażin.’—Ġenesi 3:5.
Ġeħova Biss Għandu d-Dritt li Jaħkem
7. X’juru l-konsegwenzi tar-ribelljoni kontra Ġeħova?
7 Il-konsegwenzi ħżiena tar-ribelljoni juru li Ġeħova biss, is-Sovran Universali, għandu d-dritt li jaħkem u li l-ħakma tiegħu biss hi sewwa. Dawn l-aħħar eluf taʼ snin urew li Satana, li sar “il-ħakkiem taʼ din id-dinja,” żviluppa ħakma mill-agħar, inġusta, u vjolenti li żgur ma tagħti ebda sodisfazzjon. (Ġwanni 12:31) Il-ħakma fit-tul u miżerabbli tal-bnedmin fil-kontroll taʼ Satana wriet li huma m’għandhomx l-abbiltà li jaħkmu bis-sewwa. (Ġeremija 10:23) Għalhekk, kwalunkwe ħakma li l-bnedmin jistgħu jimmaġinaw minbarra l-ħakma taʼ Ġeħova żgur li se tfalli. L-istorja wriet li m’hemmx dubju dwar dan.
8.X’inhu l-iskop taʼ Ġeħova għall-forom kollha tal-ħakmiet umani, u kif se jwettaq dan l-iskop?
8 Issa li Ġeħova ppermetta eluf taʼ snin biex il-bnedmin jesperimentaw bil-ħakma indipendenti minnu, hu ġustifikat li jneħħi mill-art dawn il-forom kollha taʼ ħakmiet u minflokhom ipoġġi l-gvern tiegħu. Profezija dwar dan tgħid: “Fi żmien dawn is-slaten [il-ħakmiet umani], Alla tas-sema jqajjem saltna [il-gvern tiegħu tas-sema f’idejn Kristu] li ma tinqered qatt . . . Hija tfarrak u ttemm is-saltniet l-oħra kollha, waqt li hi tibqaʼ wieqfa għal dejjem.” (Danjel 2:44) Il-ħakma demonika u umana se tintemm, u l-gvern tas-sema t’Alla biss se jeżisti u jaħkem fuq l-art. Kristu se jkun is-Sultan, u se jkollu 144,000 uħud leali ħakkiema sħab miegħu meħudin mill-art.—Rivelazzjoni 14:1.
Ibbenefika mit-Tbatija
9, 10. Ġesù kif ibbenefika mill-affarijiet li bata?
9 Huwa interessanti li neżaminaw il-kwalifiki taʼ dawk li se jaħkmu fis-Saltna tas-sema. L-ewwelnett, Kristu Ġesù wera kemm hu kwalifikat għall-irwol tiegħu bħala Sultan. Hu qattaʼ żmien bla għadd maġenb Ġeħova jagħmel ir-rieda taʼ Missieru, bħala l-“ħaddiem tas-sengħa” (NW) Tiegħu. (Proverbji 8:22-31) Meta Ġeħova rranġalu biex jiġi fuq l-art, Ġesù aċċetta minn jeddu. Hemmhekk hu ffoka fuq li jgħid lil oħrajn dwar is-sovranità u s-Saltna taʼ Ġeħova. Ġesù ħalla eżempju mill-aqwa għalina lkoll billi kien sottomess għalkollox għal dik is-sovranità.—Mattew 4:17; 6:9.
10 Ġesù bata l-persekuzzjoni, u finalment inqatel. Matul il-ministeru tiegħu, hu setaʼ jinnota l-qagħda msejkna li tinsab fiha l-umanità kulfejn kien iħares. Kiseb hu xi benefiċċju minħabba li ra dan u minħabba li bata personalment? Iva. Ebrej 5:8 jgħid: “Għalkemm kien Iben [Alla], tgħallem l-ubbidjenza minn dak li sofra.” L-esperjenza taʼ Ġesù meta kien fuq l-art għamlitu jifhem u jagħder iktar. Hu esperjenza personalment il-kundizzjoni tal-familja umana. Hu setaʼ jagħder lil dawk li kienu qed ibatu u setaʼ jifhem aħjar l-irwol tiegħu bħala s-salvatur tagħhom. Innota kif l-appostlu Pawlu jenfasizza dan fil-ktieb taʼ l-Ebrej: “Kellu jsir bħal ħutu f’kollox, biex isir qassis il-kbir ħanin u leali fis-servizz lil Alla, sabiex joffri sagrifiċċju propizjatorju għad-dnubiet tan-nies. Għax billi hu stess sofra meta kien imġarrab, jistaʼ jidħol għal dawk li qed jiġu mġarrbin.” “Bħala qassis il-kbir m’għandniex wieħed li ma jistax jagħder id-dgħjufijiet tagħna, imma wieħed li ġie mġarrab fl-aspetti kollha bħalna, iżda baqaʼ mingħajr dnub. Għalhekk, ħa nersqu bil-libertà tal-kelma lejn it-tron tal-qalb tajba mhix mistħoqqa, sabiex insibu ħniena u qalb tajba mhix mistħoqqa għall-għajnuna f’waqtha.”—Ebrej 2:17, 18; 4:14-16; Mattew 9:36; 11:28-30.
11. L-esperjenza li s-slaten u l-qassisin futuri kellhom fuq l-art kif se tkun taʼ ġid għalihom bħala ħakkiema?
11 Nistgħu ngħidu l-istess dwar il-144,000, li “nxtraw” mill-art biex ikunu ħakkiema sħab maʼ Kristu Ġesù fis-Saltna tas-sema. (Rivelazzjoni 14:4) Ilkoll twieldu bħala bnedmin fuq l-art, trabbew f’dinja mimlija tbatija, u batew huma stess. Ħafna ġew persegwitati, u xi wħud saħansitra nqatlu minħabba li żammew l-integrità tagħhom lejn Ġeħova u kienu lesti li jsegwu lil Ġesù. Imma huma ‘ma stħawx minħabba x-xiehda dwar il-Mulej tagħhom, imma aċċettaw li jsofru l-ħażen huma wkoll għall-aħbar tajba.’ (2 Timotju 1:8) L-esperjenza tagħhom fuq l-art għamlithom partikolarment kwalifikati biex jiġġudikaw lill-familja umana mis-sema. Huma tgħallmu juru iktar mogħdrija, qalb tajba, u jkunu iktar ħerqanin biex jgħinu lin-nies.—Rivelazzjoni 5:10; 14:2-5; 20:6.
L-Hena taʼ Dawk bit-Tama għall-Art
12, 13. Dawk bit-tama għall-art kif jistgħu jibbenefikaw mit-tbatija?
12 Tistaʼ t-tbatija tal-preżent tipproduċi xi ħaġa tajba f’dawk li jittamaw li jgħixu għal dejjem f’art magħmula ġenna ħielsa mill-mard, in-niket, u l-mewt? L-uġigħ u n-niket li ġġib it-tbatija fihom infushom m’humiex affarijiet taʼ min jixtieqhom. Imma meta nissaportu tbatija bħal din, kwalitajiet persunali tajbin jistgħu jitjiebu u dan jirriżulta f’hena.
13 Ikkunsidra x’tgħid il-Kelma ispirata t’Alla dwar dan: “Anki jekk ikollkom issofru minħabba s-sewwa, tkunu henjin.” “Jekk qed jgħajrukom minħabba isem Kristu, henjin intom.” (1 Pietru 3:14; 4:14) “Henjin intom meta n-nies iżebilħukom u jippersegwitawkom u bil-gideb jgħidu kull xorta taʼ ħażen kontrikom minħabba fija. Thennew u aqbżu bil-ferħ, għax il-premju tagħkom hu kbir fis-smewwiet.” (Mattew 5:11, 12) “Hieni l-bniedem li jibqaʼ jissaporti t-tiġrib, għaliex meta jiġi approvat jirċievi l-kuruna tal-ħajja.”—Ġakbu 1:12.
14. F’liema sens it-tbatija tagħmel lill-aduraturi taʼ Ġeħova henjin?
14 Żgur li m’hijiex it-tbatija li nġarrbu fiha nfisha li tagħmilna henjin. L-hena, jew is-sodisfazzjon, jiġi milli nkunu nafu li qed inbatu minħabba li qed nagħmlu r-rieda taʼ Ġeħova u għax qed insegwu l-eżempju taʼ Ġesù. Per eżempju, fl-ewwel seklu, xi wħud mill-appostli ntefgħu l-ħabs, u mbagħad ittieħdu quddiem il-qorti superjuri Lhudija u ġew akkużati minħabba li kienu qed jippridkaw dwar Ġesù Kristu. Huma ġew imsawtin, u mbagħad ġew meħlusin. X’kienet l-attitudni tagħhom? Ir-rakkont tal-Bibbja jgħid li “dawn telqu minn quddiem is-Sinedriju, ferħanin għax kienu tqiesu denji li jiġu diżonorati minħabba ismu.” (Atti 5:17-41) Huma kienu henjin, mhux għax ġew imsawtin jew minħabba l-uġigħ fiżiku li ħassew wara, imma għaliex kienu fehmu li dan kien seħħ minħabba li huma żammew l-integrità tagħhom lejn Ġeħova u għax segwew il-passi taʼ Ġesù.—Atti 16:25; 2 Korintin 12:10; 1 Pietru 4:13.
15. Kif tistaʼ t-tbatija li nissaportu issa tkun taʼ benefiċċju fil-futur?
15 Jekk nissaportu l-oppożizzjoni u l-persekuzzjoni b’attitudni xierqa, dawn jistgħu jgħinuna nikkultivaw is-sabar. Dan il-fatt se jgħinna nissaportu t-tbatijiet tal-futur. Naqraw: “Qisuh bħala ferħ mill-akbar, ħuti, meta tiltaqgħu maʼ diversi provi, għax bħalma tafu, meta l-fidi tagħkom tgħaddi mill-provi tipproduċi s-sabar.” (Ġakbu 1:2, 3) B’mod simili, Rumani 5:3-5 jgħidilna: “Ħa nifirħu meta nkunu f’xi tribulazzjoni, ladarba nafu li t-tribulazzjoni tipproduċi s-sabar; imbagħad, is-sabar jipproduċi l-approvazzjoni t’Alla, u l-approvazzjoni t’Alla tipproduċi t-tama, u t-tama ma twassalx għal diżappunt.” Allura iktar ma nissaportu l-provi issa minħabba l-ħajja Kristjana tagħna, iktar se nkunu armati sew biex nissaportu provi fil-futur f’din is-sistema mill-agħar.
Ġeħova Se Jippremja
16. Ġeħova x’se jagħmel għas-slaten u l-qassisin tal-futur biex jippremja t-tbatija tagħhom?
16 Anki meta nesperjenzaw it-telfa t’affarijiet materjali minħabba l-oppożizzjoni jew il-persekuzzjoni li nesperjenzaw għaliex nipprovaw ngħixu ħajja Kristjana, nistgħu nkunu kuntenti minħabba li nafu li Ġeħova se jippremjana bis-sħiħ. Per eżempju, lil xi wħud li kellhom it-tama tas-sema, l-appostlu Pawlu kitbilhom: “Intom . . . issaportejtu bil-ferħ is-serq taʼ ġidkom, billi tafu li għandkom ġid aħjar u li jibqaʼ” bħala ħakkiema fis-Saltna t’Alla. (Ebrej 10:34) U immaġina l-ferħ li se jkollhom meta taħt id-direzzjoni taʼ Ġeħova u Kristu se jieħdu sehem biex isawbu barkiet meraviljużi fuq l-abitanti taʼ l-art fid-dinja l-ġdida. Kemm hu minnu l-kliem taʼ l-appostlu Pawlu lill-Kristjani leali: “Jien tal-fehma li t-tbatijiet taʼ dan iż-żmien stabbilit m’huma xejn meta tqabbilhom mal-glorja li se tiġi rivelata fina.”—Rumani 8:18.
17. Ġeħova x’se jagħmel għal dawk bit-tama għall-art li issa qed jaqduh lealment?
17 B’mod simili, minkejja dak li jitilfu jew iħallu warajhom fil-preżent dawk bit-tama għall-art sabiex jaqdu lil Ġeħova, hu se jippremjahom bil-wisq iżjed b’dak li se jagħmel fil-futur. Hu se jagħtihom ħajja perfetta u bla tmiem f’ġenna taʼ l-art. F’dik id-dinja l-ġdida, Ġeħova se “jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ.” (Rivelazzjoni 21:4) X’wegħda meraviljuża! Kwalunkwe ħaġa li nħallu warajna għal Ġeħova f’din id-dinja, kemm jekk minn jeddna u kemm jekk le, żgur li ma tistax titqabbel maʼ dak li se jkollna fil-ħajja meraviljuża li għandna quddiemna u li hu se jagħti lill-qaddejja leali tiegħu li jissaportu t-tbatija.
18. Liema wegħda taʼ faraġ jagħtina Ġeħova fil-Kelma tiegħu?
18 Kwalunkwe tbatija li għad għandna mnejn nissaportu mhix se teffettwa t-tgawdija tagħna tal-ħajja taʼ dejjem fid-dinja l-ġdida t’Alla. It-tbatija kollha se tiġi premjata bil-kundizzjonijiet taʼ l-għaġeb li se jkun hemm fid-dinja l-ġdida. Isaija 65:17, 18 jgħidilna: “Ma jitfakkarx iżjed l-imgħoddi, f’moħħ ħadd aktar ma jiġi. Imma għad jifirħu u jaqbżu bil-ferħ għal dejjem, minħabba f’dak li għad noħloq jien.” Għalhekk, kien xieraq li Ġakbu, ħu Ġesù mill-omm, iddikjara: “Aħna niddikjaraw henjin lil dawk li ssaportew.” (Ġakbu 5:11) Iva, jekk nissaportu lealment it-tbatija li nesperjenzaw bħalissa, nistgħu nibbenefikaw issa u fil-futur.
Int Kif Twieġeb?
• Il-bnedmin kif bdew jesperjenzaw it-tbatija?
• It-tbatija tistaʼ tkun taʼ liema benefiċċju għall-ħakkiema u l-abitanti futuri taʼ l-art?
• Għala nistgħu nkunu henjin minn issa minkejja t-tbatija?
[Stampa f’paġna 27]
L-ewwel ġenituri tagħna kellhom futur meraviljuż quddiemhom
[Stampa f’paġna 29]
Minħabba li Ġesù osserva t-tbatija, hu ġie mħejji biex ikun Sultan u Qassis il-Kbir mill-aqwa
[Stampa f’paġna 31]
L-appostli ‘ferħu għax kienu tqiesu denji li jiġu diżonorati’ minħabba l-fidi tagħhom