Iċ-​Ċavetta għal Dinja Ferħana

“L-​IKTAR persunaġġ setgħan—mhux biss f’dawn l-​aħħar żewġ millennji imma fl-​istorja kollha tal-​bniedem—kien Ġesù taʼ Nazaret,” tgħid ir-​rivista Time. Meta Ġesù kien fuq l-​art, eluf taʼ nies taʼ qalb onesta fehmu li hu ma kienx biss setgħan imma kien jinteressa ruħu wkoll f’oħrajn. Għalhekk, m’għandniex għalfejn niskantaw li riedu jagħmluh sultan. (Ġwann 6:​10, 14, 15) Madankollu, bħalma semmejna fl-​artiklu taʼ qabel, Ġesù rrifjuta li jinvolvi ruħu fil-​politika.

IT-​TWEĠIBA taʼ Ġesù kienet ibbażata fuq tliet fatturi: il-​ħarsa taʼ Missieru lejn il-​mod kif il-​bniedem juri l-​libertà taʼ l-​għażla tiegħu, inkluż it-​tmexxija umana; il-​fatt li Ġesù kien konxju li hemm forzi qawwija u moħbija li qed jaħdmu kontra saħansitra l-​aħjar sforzi li l-​bniedem qed jagħmel biex imexxi; u l-​iskop t’Alla li jistabbilixxi gvern tas-​sema sabiex jaħkem fuq l-​art kollha. Hekk kif neżaminaw dawn it-​tliet punti iktar mill-​qrib, se naraw għala l-​isforzi kollha li jagħmel il-​bniedem biex din id-​dinja ssir post aħjar huma kollha għal xejn. Se naraw ukoll kif se jinkiseb is-​suċċess.

Jistgħu l-​Bnedmin Jaħkmu Lilhom Infushom?

Meta Alla ħalaq lill-​bnedmin, hu tahom awtorità fuq ir-​renju taʼ l-​annimali. (Ġenesi 1:26) Imma l-​bniedem kien taħt is-​sovranità t’Alla. L-​ewwel raġel u mara kellhom jikkonfermaw is-​sottomissjoni tagħhom lejn Alla billi jobdu u ma jiħdux mill-​frott taʼ ċertu siġra, “mis-​siġra taʼ tagħrif it-​tajjeb u l-​ħażin.” (Ġenesi 2:17) B’sogħba, Adam u Eva abbużaw mill-​pożizzjoni tagħhom bħala persuni morali ħielsa u m’obdewx ’l Alla. Il-​fatt li ħadu mill-​frott projbit ma kienx sempliċi każ taʼ serq. Dan kien att taʼ ribelljoni kontra s-​sovranità t’Alla. Nota taʼ taħt għal Ġenesi 2:17 f’The New Jerusalem Bible tgħid li Adam u Eva sostnew li kellhom “indipendenza morali totali li biha l-​bniedem jirrifjuta li jirrikonoxxi l-​pożizzjoni tiegħu bħala ħlejqa maħluqa . . . L-​ewwel dnub kien attakk fuq is-​sovranità t’Alla.”

Minħabba li kien hemm kwistjonijiet morali serji involuti, Alla ħalla lil Adam u Eva u d-​dixxendenti tagħhom jagħżlu l-​mod kif riedu jgħixu, u huma stabbilew il-​livelli tagħhom taʼ x’inhu tajjeb u x’inhu ħażin. (Salm 147:19, 20; Rumani 2:​14) Bażikament, dak iż-​żmien beda l-​esperiment tal-​bniedem bil-​libertà taʼ l-​għażla tiegħu. Kellu suċċess? Issa li għandna eluf taʼ snin taʼ storja lejn xiex inħarsu, nistgħu ngħidu li le! Koħèlet 8:9 jgħid: “Bniedem jaħkem fuq ieħor u jagħmillu l-​ħsara.” Dan ir-​rekord tal-​biki li għandna tal-​ħakma mill-​bniedem jikkonferma kemm huwa minnu l-​kliem li nsibu f’Ġeremija 10:23: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” L-​istorja wriet biċ-​ċar li l-​bnedmin m’għandhomx il-​ħila jaħkmu b’suċċess mingħajr il-​Ħallieq tagħhom.

Ġesù qabel mija fil-​mija maʼ dan. L-​indipendenza minn Alla kienet xi ħaġa taʼ stmerrija għalih. Hu qal: “Minn rajja ma nagħmel xejn. . . . Jiena dejjem nagħmel dak li jogħġob [lil Alla].” (Ġwann 4:34; 8:28, 29) Għaldaqstant, ladarba ma kellux l-​awtorizzazzjoni t’Alla, Ġesù lanqas biss daħallu f’moħħu li jaċċetta l-​kariga taʼ sultan mingħand il-​bnedmin. Madankollu, dan ma jfissirx li hu ma kienx lest li jgħin lill-​proxxmu tiegħu. Għall-​kuntrarju, hu għamel dak kollu li setaʼ biex jgħin lin-​nies isibu l-​aqwa ferħ dakinhar u fil-​futur. Hu saħansitra ta ħajtu għall-​bnedmin. (Mattew 5:​3-​11; 7:​24-​27; Ġwann 3:​16) Imma Ġesù kien jaf li “kollox għandu żmienu,” inkluż iż-​żmien meta Alla se jiddefendi s-​sovranità tiegħu fuq il-​bnedmin. (Koħèlet 3:1; Mattew 24:14, 21, 22, 36-39) Ftakar, iżda, li fl-​Għeden il-​ġenituri oriġinali tagħna ċedew għar-​rieda taʼ ħliqa spirtu mill-​agħar li tkellem permezz taʼ serp. Dan iġibna għat-​tieni raġuni għala Ġesù ma ndaħalx fil-​politika.

Il-​Ħakkiem Sigriet tad-​Dinja

Il-​Bibbja tgħidilna li Satana offra lil Ġesù “s-​saltniet kollha tad-​dinja u l-​glorja tagħhom” għal att wieħed taʼ qima. (Mattew 4:8-10) Bażikament, Ġesù ġie offrut ħakma fuq id-​dinja—imma bil-​kundizzjonijiet tax-​Xitan. Ġesù ma waqax vittma taʼ din it-​tentazzjoni. Iżda kienet din it-​tentazzjoni taʼ veru? Setaʼ Satana tassew jagħmel offerta grandjuża bħal din? Iva, għaliex Ġesù nnifsu sejjaħ lix-​Xitan “il-​Prinċep tad-​dinja,” u l-​appostlu Pawlu ddeskrivieh bħala “l-​alla taʼ din id-​dinja.”—Ġwann 14:30; 2 Korintin 4:4; Efesin 6:12.

M’għandniex xi ngħidu, Ġesù kien jaf li x-​Xitan ma jimpurtahx x’inhu l-​aħjar għall-​bniedem. Hu ddeskriva lil Satana bħala “qattiel” u “missier il-​gideb u dak kollu li hu falz.” (Ġwann 8:44, The Amplified Bible) Ovvjament, dinja li tkun “taħt idejn” spirtu mill-​agħar bħal dan qatt ma tistaʼ tkun verament ferħana. (1 Ġwann 5:19) Imma x-​Xitan mhux se jkollu din l-​awtorità għal dejjem. Ġesù, li issa hu ħliqa spirtu setgħan, dalwaqt se jneħħi lil Satana min-​nofs u jeqred għalkollox l-​influwenza tiegħu.—Lhud 2:14; Apokalissi 20:1-3.

Satana nnifsu jaf li ż-​żmien li għad fadallu bħala ħakkiem tad-​dinja dalwaqt se jintemm. Għaldaqstant, b’ħiltu kollha qed jagħmel sforz iddisprat biex iħassar lill-​bnedmin b’tali mod li ma jkunx hemm tama li jinbidlu, sewwa sew bħalma għamel qabel id-​Dilluvju taʼ żmien Noè. (Ġenesi 6:​1-5; Ġuda 6) “Ħażin għalikom, art u baħar,” jgħid Apokalissi 12:12, “għax fikom niżel id-​Demonju, b’korla kbira fuqu, għax jaf li żmien ftit baqagħlu.” Il-​profeziji tal-​Bibbja u l-​ġrajjiet tad-​dinja juru biċ-​ċar li aħna qed ngħixu viċin it-​tmiem taʼ dan ‘il-​ftit żmien.’ (2 Timotju 3:1-5) Issa l-​ħelsien huwa fil-​qrib.

Gvern li Jġib Ferħ

It-​tielet raġuni għala Ġesù ma ndaħalx fil-​politika kienet li hu kien jaf li f’xi żmien stabbilit fil-​futur, Alla kien se jwaqqaf gvern fis-​sema biex jaħkem fuq id-​dinja. Il-​Bibbja ssejjaħ dan il-​gvern is-​Saltna t’Alla. Din kienet it-​tema ewlenija tat-​tagħlim taʼ Ġesù. (Luqa 4:​43; Apokalissi 11:15) Ġesù għallem lid-​dixxipli tiegħu jitolbu sabiex tiġi dik is-​Saltna, għax taħt il-​ħakma tagħha biss ir-​rieda t’Alla tkun tistaʼ sseħħ fuq l-​art bħalma sseħħ fis-​sema. (Mattew 6:​9, 10) Int forsi tgħid bejnek u bejn ruħek, ‘Jekk din is-​Saltna se taħkem fuq l-​art kollha, x’se jiġri mill-​gvernijiet magħmulin mill-​bniedem?’

It-​tweġiba nsibuha f’Danjel 2:44: “Fi żmien dawn is-​slaten [li jkunu qed jaħkmu fi tmiem is-​sistema preżenti], Alla tas-​sema jqajjem saltna li ma tinqered qatt, u li l-​ħakma tagħha ma tgħaddix għal poplu ieħor. Hija tfarrak u ttemm is-​saltniet l-​oħra kollha [magħmulin mill-​bniedem], waqt li hi tibqaʼ wieqfa għal dejjem.” (Korsiv tagħna.) Is-​Saltna t’Alla għala se jkollha “tfarrak” il-​ħakmiet dinjin? Għaliex dawn jinsistu u jibqgħu jisfidaw lil Alla bl-​ispirtu taʼ indipendenza li kebbes Satana fil-​ġnien taʼ l-​Għeden. Dawk li jistinkaw biex jimxu skond dan l-​ispirtu mhux biss ikunu qed jaħdmu kontra dak li huwa taʼ ġid għall-​bniedem imma jkunu wkoll qed jiħduha direttament kontra l-​Ħallieq. (Salm 2:​6-​12; Apokalissi 16:14, 16) Għalhekk, irridu nistaqsu lilna nfusna, ‘Aħna favur jew kontra l-​ħakma t’Alla?’

Is-​Sovranità taʼ Min Se Tagħżel?

Sabiex ikun jistaʼ jgħin lin-​nies jagħmlu deċiżjoni bbażata fuq għarfien eżatt, Ġesù inkariga lid-​dixxipli tiegħu biex jippridkaw “l-​Evanġelju tas-​Saltna . . . fid-​dinja kollha, biex il-​ġnus kollha jkollhom xhieda” qabel ma jiġi t-​tmiem fuq din is-​sistema preżenti. (Mattew 24:14) Min huma dawk li llum huma magħrufin mad-​dinja kollha għall-​ippridkar tagħhom dwar is-​Saltna t’Alla? Huma x-​Xhieda taʼ Jehovah. Fil-​fatt, din ir-​rivista ilha żmien twil iġġib il-​kliem ‘Iħabbar is-​Saltna taʼ Jehovah’ fuq il-​qoxra taʼ quddiem. Illum, hemm xi sitt miljun Xhud f’iktar minn 230 pajjiż jgħinu lin-​nies jiksbu għarfien eżatt dwar din is-​Saltna.a

Barkiet għas-​Sudditi tas-​Saltna

Ġesù dejjem għamel l-​affarijiet kif ried Alla. Għalhekk, minflok ma għażel li jfendi għal rasu u jipprova jappoġġa jew itejjeb is-​sistema preżenti permezz taʼ mezzi politiċi, hu ħadem iebes biex javanza l-​interessi tas-​Saltna t’Alla, l-​unika soluzzjoni għall-​problemi tad-​dinja. Hu ġie premjat għal-​lealtà tiegħu bi tron glorjuż fis-​sema bħala s-​Sultan taʼ dik is-​Saltna. X’rigal mill-​isbaħ għas-​sottomissjoni tiegħu lejn Alla!—Danjel 7:13, 14.

Miljuni taʼ nies, li llum qed jimitaw lil Ġesù billi jpoġġu s-​Saltna t’Alla l-​ewwel u joqogħdu għar-​rieda t’Alla, se jgawdu wkoll barka taʼ l-​għaġeb—l-​opportunità prezzjuża li jgħixu fuq l-​art bħala sudditi tas-​Saltna t’Alla. (Mattew 6:33) Taħt il-​ħakma kollha mħabba tiegħu, huma se jsiru perfetti u se jkollhom il-​prospett taʼ ħajja taʼ dejjem. (Apokalissi 21:3, 4) L-​1 Ġwann 2:17 jgħid: “Id-​dinja bil-​ġibdiet tagħha tgħaddi, iżda min jagħmel ir-​rieda taʼ Alla jibqaʼ għal dejjem.” Meta Satana u s-​segwaċi tiegħu se jkunu ġew imneħħijin min-​nofs u l-​art se tkun ġiet mibdula f’ġenna globali ħielsa mill-​firda li jġib miegħu n-​nazzjonaliżmu, mis-​sistemi kummerċjali korrotti, u mir-​reliġjon falza, x’għaxqa se tkun li nibqgħu hawn għal dejjem!—Salm 37:29; 72:16.

Iva, is-​Saltna t’Alla hija l-​unika ċavetta għal dinja verament ferħana, u l-​messaġġ li jitkellem dwarha huwa msejjaħ b’mod xieraq bħala l-​aħbar tajba. Jekk għadek m’għamiltx hekk, għala ma toqgħodx tismaʼ din l-​aħbar tajba meta x-​Xhieda taʼ Jehovah jerġgħu jżuruk?

[Nota taʼ taħt]

[Stampi f’paġna 5]

L-​istorja turi ċar li l-​bniedem ma jistax jaħkem b’suċċess mingħajr Alla

[Stampi f’paġna 5]

Ladarba Satana jaħkem is-​sistema preżenti, hu setaʼ joffri lil Ġesù “s-​saltniet kollha tad-​dinja”

[Stampi f’paġna 7]

Ġesù għallem li taħt it-​tmexxija tas-​Saltna t’Alla, id-​dinja se tkun post mill-​isbaħ