Tistaʼ Tagħmel Din id-Dinja Post Aħjar? — LIBRERIJA ONLAJN tat-Torri tal-Għassa

Tistaʼ Tagħmel Din id-Dinja Post Aħjar?

“Il-politika m’hijiex kapaċi tistabbilixxi mill-ġdid l-istruttura bażika tas-soċjetà. M’hijiex imħejjija biżżejjed biex treġġaʼ l-valuri morali tradizzjonali għal li kienu qabel. L-aqwa proċeduri ma jistgħux iġibu lura l-valuri marbutin man-namur jew iż-żwieġ, iġagħlu l-missirijiet iħossuhom responsabbli għal uliedhom, iġagħlu lin-nies jerġgħu jħossu dik iċ-ċerta rabja u mistħija bħal fl-imgħoddi . . . Il-liġi ma tistax teħlisna għalkollox mill-biċċa l-kbira tal-problemi morali li jifilġuna.”

DAN il-kliem qalu wieħed li kien jaqdi bħala uffiċjal tal-gvern taʼ l-Istati Uniti. Taqbel miegħu int? Jekk iva, x’inhi s-soluzzjoni għal ħafna mill-problemi taʼ llum li ġejjin mir-regħba, min-nuqqas taʼ mħabba fil-familji, mill-morali laxki, mill-injoranza, u minn fatturi taʼ ħsara oħrajn li qed jgħawru l-qafas tas-soċjetà? Xi nies iħossu li m’hemm ebda soluzzjoni, u għalhekk ikomplu għaddejjin bl-aħjar mod li jistgħu b’ħajjithom. Oħrajn jittamaw li xi darba jitfaċċa mexxej brillanti, forsi saħansitra xi mexxej reliġjuż, li b’kariżma jmexxihom fit-triq it-tajba.

Fil-fatt, elfejn sena ilu, in-nies riedu jagħmlu lil Ġesù Kristu s-sultan tagħhom għaliex għarfu li hu kien intbagħat minn Alla u setaʼ jkun l-iktar mexxej kapaċi. Madankollu, meta Ġesù fehem x’kienu l-intenzjonijiet tagħhom, hu telaq minn dak il-post malajr malajr. (Ġwann 6:14, 15) “Is-saltna tiegħi m’hijiex taʼ din id-dinja,” hu spjega iktar tard lil ċertu gvernatur Ruman. (Ġwann 18:36) Madankollu, illum il-ġurnata ftit huma dawk li jieħdu l-waqfa li ħa Ġesù—anki fost il-mexxejja reliġjużi li jistqarru li huma s-segwaċi tiegħu. Xi ftit minn dawn ipprovaw jagħmlu din id-dinja post aħjar, jew billi jinfluwenzaw lill-mexxejja sekulari jew billi jokkupaw kariga politika huma stess. Dan nistgħu narawh billi nagħtu daqqa t’għajn lejn dak li ġara fis-snin 60 u 70 tas-seklu li għadda.

Sforzi Reliġjużi biex Itejbu d-Dinja

Lejn l-aħħar tas-snin sittin, ċerti teoloġi f’pajjiżi taʼ l-Amerika Latina bdew il-ġlieda tagħhom favur l-imgħakksin u l-fqar. Għal dan l-għan, huma żviluppaw it-teoloġija tal-liberazzjoni, li fiha Kristu ma baqax meqjus biss bħala s-salvatur f’sens Bibliku, iżda wkoll fl-aspett politiku u ekonomiku. Fl-Istati Uniti, numru taʼ mexxejja tal-knisja, li kienu mħassbin sew dwar il-mod kif il-valuri morali kienu sfaw fix-xejn, ifformaw organizzazzjoni msejħa l-Maġġuranza Morali. L-għan tagħha kien li ttellaʼ fil-kariga politika nies li jagħmlu liġijiet biex idaħħlu valuri li jsaħħu lill-familja. Bl-istess mod, f’ħafna pajjiżi Musulmani, xi gruppi pprovaw irażżnu l-korruzzjoni u l-eċċessi billi ħeġġew lin-nies jgħixu iktar fi qbil mal-Koran.

Temmen int li d-dinja saret post aħjar minħabba sforzi bħal dawn? Minkejja kollox, il-fatti juru li l-valuri morali jkomplu sejrin għan-niżla u d-differenza bejn il-fqir u s-sinjur qed tkompli tikber, inkluż f’dawk il-pajjiżi fejn kienet tispikka t-teoloġija tal-liberazzjoni.

Minħabba li l-Maġġuranza Morali fl-Istati Uniti ma laħqitx l-objettivi fundamentali tagħha, il-fundatur tagħha, Jerry Falwell, xolja l-organizzazzjoni fl-1989. Organizzazzjonijiet oħrajn ħadulha postha. Minkejja dan, Paul Weyrich, l-ewwel wieħed li uża t-terminu “maġġuranza morali,” kiteb fir-rivista Christianity Today: “Anki meta nirbħu fil-politika, ir-rebħiet tagħna jonqsu li jirriżultaw fit-tip taʼ politika li nemmnu li hu importanti.” Hu kiteb ukoll li l-kultura nieżla dejjem iżjed fil-ħama, u li aħna nqbadna f’sitwazzjoni meta l-kultura ġarrbet kollass taʼ proporzjonijiet impressjonanti, kollass li hu kbir wisq biex il-politika tkun tiflaħ għalih.

Il-ġurnalist u kittieb Cal Thomas kixef dak li fl-opinjoni tiegħu hu nuqqas fundamentali fl-isforz politiku biex is-soċjetà tqum fuq saqajha: “Il-vera bidla tiġi b’individwu wara l-ieħor, mhux b’elezzjoni wara l-oħra, għaliex il-problemi ewlenin tagħna m’humiex ekonomiċi u politiċi imma morali u spiritwali.”

Imma kif tistaʼ ssolvi l-problemi morali u spiritwali f’dinja fejn ma jeżistu l-ebda regoli, fejn in-nies jiddeċiedu huma stess x’inhu tajjeb u x’inhu ħażin għalihom? Jekk nies influwenti u b’intenzjonijiet tajbin—sew jekk reliġjużi u sew jekk le—m’humiex kapaċi jagħmlu din id-dinja verament post aħjar, min jistaʼ? Bħalma se naraw fl-artiklu li jmiss, hemm tweġiba. Fil-fatt, din it-tweġiba hija r-raġuni ewlenija għala Ġesù qal li s-Saltna tiegħu ma kinitx taʼ din id-dinja.

[Sors tal-Istampas on page 2]

[Sors tal-Istampa f’paġna 3]