L-​isfida: Qed jintalab wisq minnek

ULIEDEK għandhom bżonnok—issa. Anki l-​imgħallem. Qed isejjaħlek żewġek jew martek. Dan kollu waqt li qed tipprova tieħu ħsieb ġenitur li ma jiflaħx. Din mhix il-​ħajja li kellek pjanata, imma tixroblok saħħtek kuljum. “X’nistaʼ nagħmel?” tgħid bejnek u bejn ruħek. “Għandhom bżonni!” Li tirreaġixxi għal kull bżonn li jkollhom mhux bilfors hu fl-​aħjar interessi tiegħek—jew tagħhom. Kif jistaʼ jerġaʼ jkollok kontroll?

EŻEMPJU BIBLIKU: MOSÈ

Peress li kien l-​uniku mħallef fl-​Iżrael fi żminijiet Bibliċi, Mosè forsi ħass li kien qiegħed sempliċement jagħmel li kien hemm bżonn. Imma l-​kunjatu qallu: “Mhux tajjeb kif qed tagħmel. Żgur li se tegħja.” Hu ssuġġerixxa li Mosè jiddelega l-​biċċa l-​kbira tal-​iġġudikar lil irġiel kapaċi u li huma jressqu l-​każijiet diffiċli biss quddiem Mosè. Ir-​riżultat? Il-​kunjatu taʼ Mosè assigurah: “Tkun tistaʼ żżomm sħiħ u, barra minn hekk, dan il-​poplu kollu jasal f’postu bis-​sliem.”—Eżodu 18:17-​23.

X’TAGĦMEL DELINA

Kif issemma fl-​ewwel artiklu, Delina tbati bid-​distonja, marda newromuskolari. Hi tieħu ħsieb ukoll lit-​tliet ħutha b’diżabilità. “Jien sibt li jekk nieħu l-​affarijiet ġurnata b’ġurnata u jekk nevita t-​tnikkir inaqqas l-​istress,” tgħid hi. “Li ngħid lil oħrajn dwar is-​sitwazzjoni tiegħi rriżulta f’li jkolli l-​għajnuna mingħand oħrajn, inkluż żewġi. Ukoll, inqattaʼ ftit ħin kuljum fil-​ġnien—ħaġa li ttini ħafna sodisfazzjon.”

DAK LI TISTAʼ TAGĦMEL

Jekk dak li jintalab wisq minnek qed jikkontrollalek ħajtek, ipprova dan li ġej:

• Ipprova sib lil xi ħadd biex jgħinek. Pereżempju, għandek tfal li jgħixu miegħek u li jistgħu jgħinu? Għandek membri tal-​familja jew ħbieb li jgħixu fil-​qrib u li jistgħu jagħtu daqqa t’id?

• Għid lil oħrajn xi jkollok bżonn. Pereżempju, tkellem mal-​imgħallem jekk dak li qed jitlob minnek ma jkunx raġunevoli. Dan ma jfissirx li trid tagħti n-​notice. Sempliċement għidlu b’dak li tkun għaddej minnu. Forsi jkun lest inaqqaslek l-​ammont taʼ xogħol li jkollok x’tagħmel.

• Żomm amment taʼ x’jintalab minnek f’ġimgħa. Tistaʼ tiddelega xi ħaġa lil ħaddieħor?

• Kun selettiv meta taċċetta stediniet soċjali. Jekk ma tistax tattendi minħabba li ma jkollokx ħin jew enerġija, bil-​ħlewwa għid le.

L-​iktar ħaġa importanti: Jekk tipprova tagħmel kollox, għandu mnejn tispiċċa ma tkun tistaʼ tagħmel xejn.