Daħla

Għażiż Qarrej li Tħobb lil Ġeħova:

“Tkunu tafu l-​verità, u l-​verità teħliskom,” qal Ġesù. (Ġwanni 8:32) Kemm hu inkuraġġanti dan il-​kliem! Iva, huwa possibbli li tkun taf il-​verità, saħansitra f’dawn “l-​aħħar jiem” kritiċi meta l-​gideb u n-​nuqqas taʼ verità dejjem qed jiżdiedu. (2 Timotju 3:1) Tiftakar meta għall-​ewwel darba aċċettajt il-​verità bħalma hi spjegata fil-​Kelma t’Alla? X’esperjenza eċċitanti kienet din!

Madankollu, bħalma hu importanti li nieħdu għarfien eżatt dwar il-​verità u li jkollna sehem regulari f’li ngħidu lil oħrajn dwarha, hekk ukoll irridu nġibu ruħna fi qbil mal-​verità. Biex nagħmlu dan, irridu nżommu ruħna fl-​imħabba t’Alla. Dan x’jinvolvi? Il-​kliem taʼ Ġesù fil-​lejl taʼ qabel mewtu jwieġeb din il-​mistoqsija. Hu qal lill-​appostli leali tiegħu: “Jekk tosservaw il-​kmandamenti tiegħi, tibqgħu fi mħabbti, bħalma jien osservajt il-​kmandamenti tal-​Missier u nibqaʼ fi mħabbtu.”—Ġwanni 15:10.

Innota li Ġesù baqaʼ fl-​imħabba t’Alla billi osserva l-​kmandamenti taʼ Missieru. L-​istess japplika għalina llum. Biex nibqgħu fl-​imħabba t’Alla, irridu naġixxu fi qbil mal-​verità fil-​ħajja tagħna taʼ kuljum. F’dik l-​istess lejla, Ġesù qal: “Jekk tafu dan, henjin intom jekk tagħmluh.”—Ġwanni 13:17.

Hija t-​tama sinċiera tagħna li din il-​pubblikazzjoni tgħinek biex tkompli tapplika l-​verità f’ħajtek, u b’hekk iżżomm ruħek ‘fl-​imħabba t’Alla bil-​ħajja taʼ dejjem quddiem għajnejk.’—Ġuda 21.

Il-​Ġemgħa li Tiggverna tax-​Xhieda taʼ Ġeħova