X’Tama Hemm għall-​Mejtin?

FAMILJA żagħżugħa kienet qed tivvjaġġa matul il-​kosta tal-​lvant tal-​Afrika t’Isfel għal vaganza. Il-​ġenituri tal-​mara kienu f’karozza oħra ftit ’il quddiem. F’daqqa waħda nfaqgħet waħda roti. Waqt li kienu qed iħejju biex jibdluha fil-​ġenb tat-​triq, sewwieq fis-​sakra baqaʼ dieħel ġoż-​żewġ karozzi. Il-​ġenituri tal-​mara mietu mill-​ewwel. Ir-​raġel tagħha miet ftit jiem wara. II-mara ġarrbet ksur fil-​kustilji u ġrieħi oħra. It-​tarbija tagħha ġiet paralizzata fil-​moħħ.

Xi traġedja għal din il-​familja sfortunata! Meta Carolann, oħt il-​mara żagħżugħa, semgħet bl-​aħbar, hi baqgħet ċassa. Traġedji bħal dawn jiġru f’kull pajjiż. Qraba u ħbieb milqutin minn għali kbir spiss jistaqsu,‘Tgħid il-​mejtin veru mejtin,’ jew . .

‘Huma l-​Mejtin Ħajjin?’

Kważi r-​reliġjonijiet kollha jgħallmu li r-​ruħ hija mmortali. B’hekk, is-​segwaċi tagħhom jemmnu li dawk li mietu m’humiex verament mejtin iżda għadhom ħajjin fil-​ġenna, fil-​purgatorju, jew fl-​infern. Skond ma hu mgħallem minn ħafna knejjes, dawk fil-​post tal-​aħħar qegħdin ibatu b’mod orribbli għall-​eternità kollha. Iżda Alla taʼ mħabba sejjer verament iġiegħel lill-​ħlejjaq tiegħu jbatu daqshekk?—1 Ġwann 4:8.

Ma naħsbux hekk, iżda kif nistgħu nkunu ċerti? Ikkunsidra bir-​reqqa dawn il-​provi li ġejjin mill-​Bibbja. “Alla Jehovah issokta jsawwar lir-​raġel mit-​trab tal-​art u jonfoħ f’imnifsejh in-​nifs tal-​ħajja, u r-​raġel sar ruħ ħajja.” (Ġenesi 2:7) Din l-​istqarrija mnebbħa tgħid li l-​ewwel raġel, Adam, ingħata ruħ? Le, hu sar ruħ, persuna ħajja. Dan hu kkonfermat mill-​appostlu Pawlu, li kiteb: “L-​ewwel bniedem, Adam, bħalma tgħid l-​iskrittura, sar ruħ ħajja.” Pawlu kien qed jikkwota minn Ġenesi.—1 Korintin 15:45, The Jerusalem Bible.

Tistaʼ r-​ruħ umana tmut? Il-​profeta Eżekjel kiteb: “L-​erwieħ kollha—lili jappartjenu. Bħal ruħ il-​missier hekk l-​istess ruħ l-​iben—lili jappartjenu. Ir-​ruħ li qed tidneb—hi nfisha se tmut.” (Eżekjel 18:4, 20; Ekkleżasti 9:5, 10) Ovvjament, jekk ir-​ruħ hi mejta, mela l-​persuna ma taf xejn, b’hekk ma tistax tbati. Fl-​ewwel diskors pubbliku tiegħu wara Pentekoste tat-​33 E.K., l-​appostlu Pietru ddikjara: “Tabilħaqq, kull ruħ li ma tismax minn dak il-​Profeta se tkun meqruda għalkollox minn fost in-​nies.” Mela r-​ruħ hija mortali.—Atti 3:23.

Se Jerġgħu Jgħixu l-​Mejtin?

Dawk kollha li jemmnu li l-​Bibbja hi vera jafu li Ġesù miet u ġie rxoxtat fit-​tielet jum. (Atti 10:39, 40) Dan kif setaʼ jiġri? Bil-​qawwa tal-​ispirtu qaddis t’Alla.

Kien l-​irxoxt taʼ Ġesù xi eċċezzjoni? Le. Bħalma kiteb Pawlu lill-​kongregazzjoni f’Korintu: “Kristu ġie mqajjem mill-​imwiet, l-​ewwel frott taʼ dawk li raqdu fil-​mewt. Għax ladarba l-​mewt hi permezz taʼ bniedem, l-​irxoxt tal-​mejtin hu wkoll permezz taʼ bniedem . . . Kristu.” (1 Korintin 15:20-22) B’hekk, ħafna se jiġu mqajmin mill-​imwiet. Ġesù qal ukoll: “Tistagħġbux b’dan, għaliex ġejja s-​siegħa li fiha dawk kollha fl-​oqbra tal-​mafkar se jisimgħu leħnu u joħorġu, dawk li għamlu affarijiet tajbin għal irxoxt taʼ ħajja.” (Ġwann 5:28, 29) Dan jiggarantixxi l-​irxoxt għal miljuni.