Id-​Dulluvju li Ma Jintesa Qatt

MADWAR 4,300 sena ilu, dulluvju katastrofiku kompletament kesa l-​art. B’kinsa ġganteska waħda, qered kważi kull ħaġa ħajja. Tant kellu sinjifikat li ħalla impressjoni li ma titħassar qatt fuq l-​umanità, u kull ġenerazzjoni għaddiet l-​istorja lil dik taʼ warajha.

Kważi 850 sena wara d-​Dulluvju, il-​kittieb Ebrew Mosè niżżel ir-​rakkont tad-​Dulluvju globali bil-​miktub. Ġie ppriservat fil-​ktieb Bibliku taʼ Ġenesi, fejn nistgħu naqraw id-​dettalji grafiċi f’kapitli 6 sa 8.

Ir-​Rakkont Bibliku tad-​Dulluvju

Ġenesi jagħti dawn id-​dettalji, ovvjament dawk taʼ wieħed li ra b’għajnejh: “Fis-​sitt mitt sena tal-​ħajja taʼ Noè, fit-​tieni xahar, fis-​sbatax-il jum tax-​xaħar, f’dan il-​jum il-​għejjun kollha tal-​fond vast bl-​ilma nkisru beraħ u r-​rixtelli tal-​għarar tas-​smewwiet infetħu. U d-​dulluvju baqaʼ sejjer għal erbgħin jum fuq l-​art, u l-​ilmijiet baqgħu jiżdiedu u bdew iġorru l-​arka u din kienet qiegħda żżomm f’wiċċ l-​ilma‘l fuq ferm mill-​art. U l-​ilmijiet għattew l-​art tant bil-​kbir li l-​muntanji twal kollha li kienu taħt is-​smewwiet kollha ġew li jkunu mgħottijin.” —Ġenesi 7:11, 17, 19.

Dwar l-​effett tad-​Dulluvju fuq l-​affarijiet ħajjin, il-​Bibbja tgħid: “Il-​laħam kollu li kien qiegħed jitħarrek fuq l-​art miet, fost il-​ħlejjaq li jtiru u fost l-​annimali domestiċi u fost il-​bhejjem selvaġġi u fost il-​qtajja kollha li kienu qegħdin jiġru fi qtajja fuq l-​art, u l-​umanità kollha.” Madankollu, Noè u sebaʼ persuni oħra salvaw, flimkien ma kampjuni minn kull bhima, kull ħlejqa li tittajjar, u kull ħaġa li tiċċaqlaq fuq l-​art. (Ġenesi 7:21, 23) Kollox ġie ppriservat f’arka kbira f’wiċċ l-​ilma li kienet twila madwar 437 pied, wiesgħa 73 pied, u għolja 44 pied. Ladarba l-​uniċi funzjonijiet tal-​arka kienu li ma jidħlilhiex ilma u li żżomm fil-​wiċċ, la kellha qiegħ li ġej fit-​tond, la pruwa ppuntata, la skrejjen, u lanqas tmun. L-​arka taʼ Noè kienet sempliċement biċċa tal-​baħar forma taʼ kaxxa kbira rettangulari.

Ħames xhur wara li beda d-​Dulluvju, l-​arka sabet ruħha sserraħ fuq il-​muntanji taʼ Ararat, fejn illum insibu l-​Lvant tat-​Turkija. Noè u l-​familja tiegħu harġu ’l barra mill-​arka għal fuq art niexfa sena wara li beda d-​Dulluvju u bdew mill-​ġdid ir-​rutina normali tal-​ħajja. (Ġenesi 8:14-19) Maż-​żmien, l-​umanità kienet immultiplikat biżżejjed biex tibda tibni l-​belt taʼ Babel u t-​torri infami tagħha ħdejn ix-​Xmara Ewfrat. Minn hemm in-​nies ġew imxerrdin ftit ftit lejn il-​partijiet kollha tal-​art meta Alla ħawwad il-​lingwa tal-​umanità. (Ġenesi 11:1-9) Imma x’ġara mill-​arka?

It-​Tfittxija għall-​Arka

Mis-​seklu 19‘il hawn, kien hemm attentati numerużi biex isibu l-​arka fuq il-​muntanji taʼ Ararat. Dawn il-​muntanji għandhom żewġ quċċati prominenti, waħda għolja 16,950 pied u l-​oħra 12,840 pied. L-​ogħla waħda minn dawn hija dejjem miksija bis-​silġ. Minħabba t-​tibdil fil-​klima li ġie wara d-​Dulluvju, l-​arka f’qasir żmien kienet ġiet miksija bis-​silġ. Xi investigaturi jemmnu sew li l-​arka għadha hemm, midfuna fil-​fond fi blokka silġ kbira. Huma jsostnu li kien hemm perijodi meta s-​silġ inħall biżżejjed biex ippermetta parti mill-​arka tidher temporanjament.

Il-ktieb In Search of Noah’s Ark jikkwota lil George Hagopian, ċertu Armen, li sostna li ħu telaʼ fuq il-​Muntanja Ararat u ra l-​arka fl-​1902 u reġaʼ fl-​1904. Fl-​ewwel żjara tiegħu, ħu qal li sa telaʼ fuqha l-​arka.“Jien waqaft dritt u ħarist lejn il-​bastiment kollu. Kien twil. Il-​għoli madwar erbgħin pied.” Rigward l-​osservazzjoni tiegħu fiż-​żjara taʼ wara tiegħu, ħu qal: “Ma rajt ebda kurvaturi veri. Kienet differenti minn kull dgħajsa oħra li jien qatt rajt. Kienet qisha barkun bil-​qiegħ ċatt.”

Mill-​1952 sal-​1969, Fernand Navarra għamel erbaʼ tentattivi biex isib evidenza tal-​arka. Fit-​tielet mawra tiegħu lejn il-​Muntanja Ararat, ħu niżel fil-​qiegħ taʼ ħofra fis-​silġ, fejn ħu sab biċċa njama sewda midfuna fis-​silġ.“Bil-​fors li kienet twila ħafna,” huwa qal, “u forsi għadha mwaħħla ma xi partijiet oħra tal-​iskeletru tal-​bastiment. Stajt biss naqtaʼ mal-​vina sakemm qaċċatt biċċa twila madwar Ħames piedi.”

Il-professur Richard Bliss, wieħed mill-​ħafna esperti li eżaminaw l-​injama, qal: “Il-​kampjun tal-​injama taʼ Navarra huwa travu strutturali u mgħaddas fil-​qatran likwidu. Kellu minċotti u ingasti. U kien maħdum bl-​idejn u magħmul kwadru.” L-​età tal-​injam hija stmata li hi taʼ erbaʼ jew ħamest elef sena.

Għalkemm sforzi ġew magħmulin biex isibu l-​arka fuq il-​Muntanja Ararat, il-​prova definittiva li l-​arka ġiet użata biex issalva minn dulluvju katakliżmiku teżisti fir-​rekord miktub taʼ dik il-​ġrajja fil-​ktieb Bibliku taʼ Ġenesi. Konferma taʼ dak ir-​rekord tistaʼ tidher fin-​numru kbir taʼ leġġendi dwar dulluvju fost popli primittivi madwar id-​dinja kollha. Ikkunsidra x-​xiehda tagħhom fl-​artiklu li ġej.