Meta l-Lvant Jiltaqaʼ mal-Punent

“IVA, LVANT hu Lvant, u Punent hu Punent, u qatt it-​tnejn maʼ xulxin.” Dawn il-​kelmiet tal-​Poeta Britanniku Rudyard Kipling ifakkruna fid-​differenzi kulturali profondi li jifirdu lill-​umanità, u li jikkontribwixxu għal din il-​mibgħeda kollha razzjali, nazzjonalistika u taʼ bejn it-​tribujiet li qiegħda tinfirex madwarna llum. Ħafna jistaqsu, Ma jistax Alla jagħmel xi ħaġa dwar din is-​sitwazzjoni? Iva, jistaʼ! U qiegħed jagħmel xi ħaġa saħansitra issa! Il-​vers l-​ieħor tal-​poeżija taʼ Kipling irrefera saħansitra għal dan. Kemm se jdumu mifrudin il-​Lvant u l-​Punent? Kipling qal: “Sakemm l-​Art u s-​Sema quddiem t’Alla t-​Tron kbir taʼ Ħaqq hemm miġburin.”

Alla għadda r-​responsabbiltà taʼ l-​iġġudikar lil Ibnu, Ġesù Kristu. (Ġwann 5:22-24, 30) Imma dak iż-​żmien taʼ ġudizzju meta jibda? Min jiġi ġġudikat, u b’liema riżultat? Kien Ġesù li ddeskriva fil-​profezija l-​gwerer dinjin u n-​niket li ġabu u li beda jifleġ lill-​umanità fis-​sena 1914. Hu stqarr li dawn jimmarkaw “is-​sinjal” tal-​“preżenza” inviżibbli tiegħu “u tal-​konklużjoni tas-​sistema taʼ affarijiet.”—Mattew 24:3-8.

Fil-quċċata taʼ din il-​profezija hekk kbira, Ġesù jidentifika ż-​żmien preżenti tagħna bħala wieħed taʼ ħaqq, billi jgħid dwaru nnifsu: “Meta Bin il-​bniedem jasal fil-​glorja tiegħu, u l-​anġli kollha miegħu, imbagħad se joqgħod bil-​qiegħda fuq it-​tron glorjuż tiegħu. U l-​ġnus kollha se jinġabru quddiemu, u hu se jifred lin-​nies wieħed mill-​ieħor, sewwa sew bħalma ragħaj jifred in-​ngħaġ mill-​mogħoż. U se jpoġġi lin-​ngħaġ fuq il-​leminija tiegħu, imma l-​mogħoż fuq ix-​xellug tiegħu.” B’mod figurattiv, il-​popli kollha taʼ l-​art qegħdin issa miġburin quddiem l-​Imħallef u jridu jagħtu kont lilu għall-​mod li bih iwieġbu għall-​messaġġ tiegħu taʼ salvazzjoni. Meta jiġi esegwit il-​ġudizzju f’qasir żmien fit-​tribulazzjoni l-​kbira, in-​nies diżubbidjenti bħal mogħoż “se jitilqu fil-​qtugħ taʼ dejjem, imma t-​twajbin [l-uħud ubbidjenti bħal ngħaġ] fil-​ħajja taʼ dejjem.”—Mattew 25:31-33, 46; Rivelazzjoni 16:14-16.

‘Minn Tlugħ Ix-​Xemx u Minn Inżul Ix-​Xemx’

Il-​ġudizzju taʼ din id-​dinja beda attwalment matul is-​snin tempestużi taʼ l-​Ewwel Gwerra Dinjija. F’dak iż-​żmien, il-​kleru tal-​Kristjaneżmu b’qalbhom kollha taw appoġġ lil dawn il-​fazzjonijiet li kienu qegħdin jiggwerraw. Dan identifikahom bħala parti mid-​dinja korrotta li jimmeritaha “l-​korla t’Alla.” (Ġwann 3:36) Madankollu xi ngħidu dwar Kristjani li jħobbu l-​paċi u li eżerċitaw fidi f’Alla? Mill-​1919 ’il hawn, dawn bdew jinġabru għal fuq in-​naħa tas-​Sultan, Kristu Ġesù.

Mill-partijiet kollha tal-​globu ġew, l-​ewwel l-​uħud li baqaʼ tal-​144,000 midlukin, magħżulin matul is-​sekli taʼ l-​era Kristjana. Dawn se jkunu “werrieta bi sħab maʼ Kristu” fis-​Saltna tiegħu tas-​sema. (Rumani 8:17) Lil dawn il-​profeta t’Alla jgħidilhom: “Tkunx beżgħan, għax jien miegħek. Minn tlugħ ix-​xemx se nġib iż-​żerriegħa tiegħek, u minn inżul ix-​xemx jien se niġbrok flimkien. Jien se ngħid lit-​Tramuntana, ‘Ċedi!’ u lin-​Nofs in-​Nhar, ‘Iżżommx lura. Ġib lil uliedi subien mill-​bogħod, u lil uliedi bniet mill-​estremità taʼ l-​art, lil kulmin hu msejjaħ b’ismi u li ħloqt għall-​glorja tiegħi stess, li sawwart, iva, li għamilt.’”—Isaija 43:5-7.

Imma dak mhux kollox! Partikolarment mis-​snin tletin ’il hawn, folla kbira, li issa tgħodd bil-​miljuni, bdiet tinġabar. Dawn huma “n-​ngħaġ” li Ġesù rrefera għalihom f’Mattew 25:31-46. Bħall-​fdal midlukin qabilhom, dawn jiġu li ‘jkollhom fidi’ f’Dak li jiddikjara: ‘Intom ix-​xhieda tiegħi, u jien Alla.’ (Isaija 43:10-12) Il-​ġbir taʼ din il-​folla kbira qiegħed jibda ‘minn tlugħ ix-​xemx u nżul ix-​xemx, mit-​Tramuntana u n-​Nofs in-​Nhar, u sa l-​estremitajiet taʼ l-​art.’

Dawn in-​ngħaġ li jħobbu l-​paċi qegħdin jiġu ssaldjati fi fratellanza waħda internazzjonali. Huma jitkellmu l-​ħafna lingwi differenti tal-​229 art fejn joqogħdu. Madankollu huma uniti spiritwalment f’li jitgħallmu l-​“lingwa pura” tal-​messaġġ tas-​Saltna tal-​Bibbja, “sabiex ilkoll isejħu isem Jehovah, sabiex jaqduh spalla maʼ spalla.” (Sofonija 3:9) L-​unità tagħhom taʼ twemmin, għan, u azzjoni tipprovdi testimonjanza meraviljuża li l-​Lvant tabilħaqq iltaqaʼ mal-​Punent, u mal-​popli mid-​direzzjonijiet kollha, biex jaqdu u jfaħħru lill-​Mulej Sovran Jehovah.

F’xi artijiet dan il-​ġbir qiegħed iseħħ taħt ċirkostanzi l-​iktar taʼ l-​għaġeb, kif se juruna r-​rapporti li ġejjin. [w94 1/1]