Itfaʼ l-Anzjetà Kollha Tiegħek fuq Jehovah

“Umiljaw lilkom infuskom . . . taħt l-​id setgħana t’Alla, biex hu jistaʼ jeżaltakom fiż-​żmien xieraq; waqt li titfgħu l-​anzjetà kollha tagħkom fuqu, għaliex hu jimpurtah minnkom.”—1 PIETRU 5:6, 7.

1. L-​anzjetà kif tistaʼ teffettwana, u dan kif jistaʼ jiġi muri?

L-​ANZJETÀ tistaʼ teffettwa lil ħajjitna b’mod drammatiku. Tistaʼ tiġi mxebbha maʼ l-​interferenza li xi drabi tinterrompi melodija sabiħa mismugħa fuq ir-​radju. Li kieku ma jkunx hemm interferenza fil-​frekwenzi tar-​radju, melodiji ħelwin jistgħu jitgawdew u jistgħu jipproduċu stat taʼ kalma. Madankollu, il-​ħoss iżarżar taʼ l-​interferenza jistaʼ jħassar saħansitra l-​isbaħ melodija, billi jikkaġunalna rritazzjoni u frustrazzjoni. L-​anzjetà jistaʼ jkollha effett simili fuq is-​serenità tagħna. Tistaʼ tant ittaqqalna li ma nkunux nistgħu nlaħħqu m’affarijiet vitali. Tabilħaqq, “tħassib anzjuż fil-​qalb taʼ raġel huwa dak li jġegħilha tmil.”—Proverbji 12:25.

2. Ġesù Kristu x’qal dwar l-​“anzjetajiet tal-​ħajja”?

² Ġesù Kristu tkellem dwar il-​periklu taʼ li wieħed jiġi distratt minn anzjetà eċċessiva. Fil-​profezija tiegħu rigward l-​aħħar jiem, hu ħeġġeġ: “Oqogħdu attenti għalikom infuskom li qlubkom qatt ma jitqalu b’ikel żejjed u xorb żejjed u anzjetajiet tal-​ħajja, u f’daqqa waħda dak il-​jum ikun minnufih fuqkom bħal nassa. Għax se jiġi fuq dawk kollha li qegħdin jgħammru fuq wiċċ l-​art kollha. Ibqgħu mqajmin, allura, il-​ħin kollu billi tagħmlu suppliki biex forsi jirnexxilkom taħarbu minn dawn l-​affarijiet kollha li huma ddestinati li jseħħu, u tieqfu quddiem Bin il-​bniedem.” (Luqa 21:34-36) Bħalma ikel żejjed u xorb żejjed jistgħu jipproduċu stat tal-​moħħ bla ħeġġa, hekk ukoll jekk insiru mtaqqlin bl-​“anzjetajiet tal-​ħajja” jistaʼ jikkaġunalna li nitilfu l-​perspettiva mentali, b’riżultati traġiċi.

Dak Li L-​Anzjetà Hija

3. L-​“anzjetà” kif ġiet iddefinita, u x’inhuma xi wħud mill-​kaġunijiet tagħha?

³ L-​“anzjetà” hija definita bħala “moħħ imtaqqal mimli wġigħ jew li dejjem iberren fuq il-​ħażin ġeneralment minħabba xi għawġ li jkun riesaq jew antiċipat.” Hija “tħassib jew interess mimli biżaʼ” kif ukoll “sens mhux normali u immens taʼ tberrin fuq il-​ħażin u biżaʼ li taʼ spiss huwa mmarkat minn sintomi fiżjoloġiċi (bħalma huwa għaraq, tensjoni, u polz li jgħaġġel iktar), b’dubju rigward ir-​realtà u n-​natura tat-​theddida, u b’dubju fik innifsek dwar jekk intix kapaċi tkampa magħha.” (Webster’s Ninth New Collegiate Dictionary) Mela l-​anzjetà tistaʼ tkun problema komplessa. Fost il-​ħafna kaġuni taʼ din hemm il-​mard, ix-​xjuħija, il-​biżaʼ mill-​kriminalità, it-​telf taʼ impjieg, u t-​tħassib dwar il-​benesseri tal-​familja taʼ dak li jkun.

4. (a) X’inhuwa tajjeb li wieħed jiftakar dwar in-​nies u l-​anzjetajiet tagħhom? (b) Jekk qegħdin inġarrbu l-​anzjetà, x’jistaʼ jsir?

⁴ B’mod ċar, hemm diversi gradi taʼ anzjetà, bħalma hemm diversi kundizzjonijiet jew ċirkostanzi li jistgħu jwasslu għaliha. Mhux in-​nies kollha jirreaġixxu għal xi sitwazzjoni bl-​istess mod. Għalhekk, għandna bżonn nirrealizzaw li saħansitra jekk xi ħaġa ma tinkwetax lilna, tistaʼ tkun il-​kaġun taʼ anzjetà serja għal xi wħud minn sħabna adoraturi taʼ Jehovah. X’jistaʼ jsir jekk l-​anzjetà tilħaq sal-​punt li ma nistgħux nikkonċentraw fuq il-​veritajiet armonjużi u t’għaxqa tal-​Kelma t’Alla? Xi ngħidu jekk tant inkunu magħdurin bl-​anzjetà li ma nkunux kapaċi nżommu għajnejna ffokati fuq il-​kwistjonijiet tas-​sovranità taʼ Jehovah u l-​integrità Kristjana? Forsi ma nistgħux inbiddlu ċ-​ċirkostanzi tagħna. Minflok, ikollna bżonn infittxu xi punti Skritturali li se jgħinuna inkampaw maʼ l-​anzjetà żejda kkaġunata mill-​problemi kollhom xewk tal-​ħajja.

Għajnuna Hija Disponibbli

5. Kif nistgħu naġixxu f’armonija maʼ Salm 55:22?

⁵ Meta l-​Kristjani jeħtieġu għajnuna spiritwali u huma mtaqqlin bl-​anzjetajiet, jistgħu jiksbu faraġ mill-​Kelma t’Alla. Din tipprovdi gwida taʼ min jafdaha u tagħtina ħafna assiguranzi li m’aħniex waħedna bħala qaddejja leali taʼ Jehovah. Per eżempju, is-​salmista David għanna: “Ixħet it-​tagħbija tiegħek fuq Jehovah innifsu, u hu nnifsu se jsostnik. Hu qatt ma se jħalli lit-​twajjeb jixxengel.” (Salm 55:22) Kif nistgħu naġixxu f’armonija maʼ dan il-​kliem? Billi nitfgħu l-​anzjetajiet, it-​tħassib, il-​biżaʼ, u d-​diżappunti kollha tagħna fuq Missierna tas-​sema kollu mħabba. Dan se jgħin biex jagħtina sens taʼ sigurtà u kalma fil-​qalb.

6. Skond Filippin 4:6, 7, it-​talb x’jistaʼ jagħmel għalina?

⁶ Talb regulari u mill-​qalb huwa essenzjali jekk se nitfgħu t-​tagħbija tagħna, inkluża l-​anzjetà kollha tagħna, fuq Jehovah. Dan se jġibilna paċi ġewwinija, għax l-​appostlu Pawlu kiteb: “Tkunu anzjużi fuq xejn, imma f’kollox bit-​talb u bis-​suppliki flimkien maʼ radd il-​ħajr ħallu l-​petizzjonijiet tagħkom ikunu mgħarrfin lil Alla; u l-​paċi t’Alla li tisboq kull ħsieb se tgħasses lil qlubkom u l-​qawwiet mentali tagħkom permezz taʼ Kristu Ġesù.” (Filippin 4:6, 7) Il-​“paċi t’Alla” inkomparabbli hija trankwillità mhux tas-​soltu gawduta mill-​qaddejja ddedikati taʼ Jehovah saħansitra f’sitwazzjonijiet l-​iktar taʼ prova. Din tirriżulta mir-​relazzjoni persunali mill-​qrib tagħna m’Alla. Hekk kif nitolbu għall-​ispirtu qaddis u nħalluh jimmotivana, m’aħniex meħlusin mill-​problemi kollha tal-​ħajja, imma tassew li ngawdu l-​frott taʼ l-​ispirtu taʼ paċi. (Luqa 11:13; Galatin 5:22, 23) Ma niġux megħlubin mill-​anzjetà, għax nafu li Jehovah jġiegħel lin-​nies leali kollha tiegħu ‘jgħammru fis-​sigurtà’ u ma se jħalli xejn jiġri li se jikkaġunalna ħsara permanenti.—Salm 4:8.

7. Liema rwol jistgħu jkollhom anzjani Kristjani f’li jgħinuna inkampaw maʼ l-​anzjetà?

⁷ Madankollu, xi ngħidu jekk l-​anzjetà tagħna tippersisti, avolja qegħdin nimmeditaw fuq l-​Iskrittura u qegħdin nipperseveraw fit-​talb? (Rumani 12:12) L-​anzjani maħturin fil-​kongregazzjoni huma wkoll provvediment taʼ Jehovah biex jgħinuna spiritwalment. Jistgħu jfarrġuna u jgħinuna billi jużaw il-​Kelma t’Alla u billi jitolbu magħna u għalina. (Ġakbu 5:13-16) L-​appostlu Pietru ħeġġeġ lil sħabu l-​anzjani biex jirgħu l-​merħla t’Alla minn rajhom, bil-​ħeġġa, u b’mod eżemplari. (1 Pietru 5:1-4) Dawn l-​irġiel għandhom għal qalbhom il-​ġid tagħna u jridu jkunu taʼ għajnuna. M’għandniex xi ngħidu, biex nibbenefikaw bis-​sħiħ mill-​għajnuna taʼ l-​anzjani u biex immorru tajjeb spiritwalment fil-​kongregazzjoni, ilkoll kemm aħna għandna bżonn napplikaw il-​parir taʼ Pietru: “Intom l-​irġiel żgħażagħ, kunu sottomessi lejn l-​irġiel ixjeħ. Imma lkoll kemm intom ħażżmu lilkom infuskom b’umiltà tal-​moħħ lejn xulxin, għaliex Alla jopponi lill-​imkabbrin, imma jagħti qalb tajba m’hijiex mistħoqqa lill-​umlin.”—1 Pietru 5:5.

8, 9. Liema faraġ nistgħu nieħdu mill-1 Pietru 5:6-11?

⁸ Pietru żied: “Umiljaw lilkom infuskom, għalhekk, taħt l-​id setgħana t’Alla, biex hu jistaʼ jeżaltakom fiż-​żmien xieraq; waqt li titfgħu l-​anzjetà kollha tagħkom fuqu, għaliex jimpurtah minnkom. Ibqgħu f’sensikom, kunu għassa. L-​avversarju tagħkom, ix-​Xitan, idur bħal iljun jgħajjat, ifittex biex jiblaʼ lil xi ħadd. Imma ħudu l-​waqfa tagħkom kontra tiegħu, solidi fil-​fidi, billi tafu li l-​istess affarijiet f’dawk li huma sofferenzi qegħdin jiġu mwettqin fis-​sħubija kollha kemm hija taʼ ħutkom fid-​dinja. Imma, wara li tkunu sofrejtu għal ftit żmien, dak Alla taʼ kull qalb tajba m’hijiex mistħoqqa, li sejħilkom għall-​glorja taʼ dejjem tiegħu f’unjoni maʼ Kristu, se jtemm hu stess it-​taħriġ tagħkom, se jagħmilkom sodi, se jagħmilkom b’saħħitkom. Lilu tkun is-​setgħa għal dejjem. Amen.”—1 Pietru 5:6-11.

⁹ Kemm huwa taʼ faraġ li tirrealizza li aħna nistgħu ‘nitfgħu l-​anzjetà kollha tagħna fuq Alla għaliex hu jimpurtah minna’! U jekk xi ftit mill-​anzjetà tagħna hija riżultat taʼ l-​attentati tax-​Xitan biex jeqred ir-​relazzjoni tagħna maʼ Jehovah billi jġib persekuzzjoni jew sofferenzi oħrajn fuqna, m’hijiex din ħaġa taʼ l-​għaġeb li tkun taf li kollox se jmur tajjeb għal dawk li jżommu l-​integrità? Iva, wara li nkunu sofrejna għal ftit, dak Alla taʼ kull qalb tajba m’hijiex mistħoqqa se jtemm it-​taħriġ tagħna u se jagħmilna sodi u b’saħħitna.

10. L-​ewwel Pietru 5:6, 7 jalludi għal liema tliet kwalitajiet li jistgħu jgħinuna nnaqsu l-​anzjetà?

¹⁰ L-​ewwel ittra taʼ Pietru 5:6, 7 talludi għal tliet kwalitajiet li jistgħu jgħinuna biex inkampaw maʼ l-​anzjetà. Waħda hija l-​umiltà, jew “l-​umiltà tal-​moħħ.” Vers 6 jispiċċa bl-​espressjoni “fiż-​żmien xieraq,” billi jissuġġerixxi l-​ħtieġa għal paċenzja. Vers 7 juri li nistgħu bil-​fiduċja nitfgħu l-​anzjetà kollha tagħna fuq Alla ‘għaliex jimpurtah minna,’ u dak il-​kliem jinkuraġġixxi fiduċja sħiħa f’Jehovah. Mela ejjew naraw kif l-​umiltà, il-​paċenzja, u l-​fiduċja sħiħa f’Alla jistgħu jgħinuna biex innaqqsu l-​anzjetà.

Kif L-​Umiltà Tistaʼ Tgħin

11. L-​umiltà kif tistaʼ tgħinna inkampaw maʼ l-​anzjetà?

¹¹ Jekk aħna umlin, se nammettu li l-​ħsibijiet t’Alla huma bil-​wisq superjuri minn tagħna stess. (Isaija 55:8, 9) L-​umiltà tgħinna nirrikonoxxu l-​kapaċità mentali limitata tagħna pparagunata mal-​perspettiva li tkopri kollox taʼ Jehovah. Hu jara affarijiet li aħna ma nilmħux, kif muri fil-​każ tar-​raġel twajjeb Ġob. (Ġob 1:7-12; 2:1-6) Billi numiljaw lilna nfusna “taħt l-​id setgħana t’Alla,” qegħdin nagħrfu l-​pożizzjoni baxxa tagħna f’relazzjoni mas-​Sovran Suprem. Mill-​banda l-​oħra, dan jgħinna biex inkampaw maʼ ċirkostanzi li hu jippermetti. Qlubna għandhom imnejn jixxennqu għal serħan immedjat, imma ladarba l-​kwalitajiet taʼ Jehovah huma f’bilanċ perfett, hu jaf preċiżament meta u kif għandu jaġixxi għan-​nom tagħna. Bħal tfal żgħar, allura, ejjew umilment naqbdu sod l-​id setgħana taʼ Jehovah, fiduċjużi li hu se jgħinna inkampaw maʼ l-​anzjetajiet tagħna.—Isaija 41:8-13.

12. L-​anzjetà dwar sigurtà materjali kif tistaʼ tiġi effettwata jekk aħna bl-​umiltà napplikaw il-​kliem taʼ Ebrej 13:5?

¹² L-​umiltà tinkludi li nkunu lesti li napplikaw il-​parir mill-​Kelma t’Alla, li taʼ spiss jistaʼ jnaqqas l-​anzjetà. Per eżempju, jekk l-​anzjetà tagħna rriżultat minn involviment żejjed f’ġiri wara affarijiet materjali, forsi nagħmlu tajjeb li nirriflettu fuq il-​parir taʼ Pawlu: “Ħallu l-​manjiera tal-​ħajja tagħkom tkun ħielsa mill-​imħabba tal-​flus, waqt li intom kuntenti bl-​affarijiet preżenti. Għax [Alla] qal: ‘Bl-​ebda mod ma jien se nitilqek u bl-​ebda mod ma nabbandunak.’” (Ebrej 13:5) Billi bl-​umiltà applikaw parir bħal dan, ħafna ħelsu lilhom infushom minn anzjetà kbira dwar is-​sigurtà materjali. Waqt li l-​kundizzjoni finanzjarja tagħhom setgħet ma marritx ’il quddiem, din ma tiddominax il-​ħsibijiet tagħhom b’detriment spiritwali għalihom.

Ir-​Rwol Tal-​Paċenzja

13, 14. (a) Inkwantu għas-​sabar bil-​paċenzja, liema eżempju pprovda r-​raġel Ġob? (b) Li nistennew bil-​paċenzja fuq Jehovah jistaʼ jagħmel liema ħaġa għalina?

¹³ L-​espressjoni “fiż-​żmien xieraq” fl-​1 Pietru 5:6 tissuġġerixxi l-​ħtieġa għal sabar paċenzjuż. Xi drabi problema tippersisti għal żmien twil, u dak jistaʼ jżid l-​anzjetà. Speċjalment f’sitwazzjoni bħal din ikollna bżonn inħallu l-​affarijiet f’idejn Jehovah. Id-​dixxiplu Ġakbu kiteb: “Aħna nippronunzjaw henjin lil dawk li ssaportew. Intom smajtu bis-​sabar taʼ Ġob u rajtu r-​riżultat li Jehovah ta, illi Jehovah hu teneru ferm fl-​affezzjoni u mimli ħniena.” (Ġakbu 5:11) Ġob għadda minn rovina ekonomika, tilef għaxart itfal fil-​mewt, sofra minn marda kiefra, u ġie kkundannat b’mod żbaljat minn farraġa foloz. Taʼ l-​inqas xi ftit anzjetà tkun normali taħt ċirkostanzi bħal dawn.

¹⁴ Kien x’kien, Ġob kien eżemplari fis-​sabar paċenzjuż. Jekk inkunu għaddejjin minn prova ħarxa tal-​fidi, forsi jkollna nistennew għal serħan, saħansitra bħalma għamel hu. Imma Alla tassew li aġixxa għan-​nom tiegħu, billi eventwalment serraħ lil Ġob mis-​sofferenza tiegħu u ppremjah b’mod abbundanti. (Ġob 42:10-17) Li bil-​paċenzja nistennew fuq Jehovah jiżżviluppa s-​sabar tagħna u jirrivela l-​profondità tad-​devozzjoni tagħna lejh.—Ġakbu 1:2-4.

Fiduċja F’Jehovah

15. Għala għandna nafdaw bis-​sħiħ f’Jehovah?

¹⁵ Pietru ħeġġeġ lil sħabu kredenti biex ‘jitfgħu l-​anzjetà kollha tagħhom fuq Alla għaliex hu jimpurtah minnhom.’ (1 Pietru 5:7) Mela nistgħu u għandna jkollna fiduċja sħiħa f’Jehovah. Proverbji 3:5, 6 jgħid: “Afda f’Jehovah b’qalbek kollha u tistrieħx fuq il-​fehma tiegħek stess. Fil-​mogħdijiet kollha tiegħek agħti kas tiegħu, u hu nnifsu se jiddritta l-​passaġġi tiegħek.” Minħabba f’esperjenzi tal-​passat, xi wħud li huma mimlijin b’anzjetà jsibuha diffiċli biex jafdaw bnedmin oħrajn. Imma aħna bir-​raġun kollu nafdaw lill-​Ħallieq tagħna, l-​istess Sors u Sostenitur tal-​ħajja. Saħansitra jekk ma nafdawx ir-​reazzjoni tagħna stess f’ċerti kwistjonijiet, nistgħu dejjem nistrieħu fuq Jehovah biex jeħlisna mill-​gwajiet tagħna.—Salm 34:18, 19; 36:9; 56:3, 4.

16. Ġesù Kristu x’qal dwar l-​anzjetà minħabba affarijiet materjali?

¹⁶ Li jkollok fiduċja f’Alla jinkludi li tobdi lil Ibnu, Ġesù Kristu, li għallem dak li tgħallem mingħand Missieru. (Ġwann 7:16) Ġesù ħeġġeġ lid-​dixxipli tiegħu biex ‘jaħżnu teżori fis-​sema’ billi jaqdu lil Jehovah. Imma xi ngħidu dwar il-​ħtiġijiet materjali li jinvolvu l-​ikel, l-​ilbies, u l-​kenn? “Ieqfu milli tkunu anzjużi,” ta parir Ġesù. Hu wera ċar li Alla jitmaʼ lill-​għasafar. Ilibbes il-​fjuri b’mod sabiħ. Il-​qaddejja umani t’Alla ma jiswewx iktar minn dawn? Dażżgur li jiswew. Għalhekk, Ġesù ħeġġeġ: “Ibqgħu, allura, fittxu l-​ewwel is-​saltna u t-​tjieba [t’Alla], u dawn l-​affarijiet l-​oħrajn kollha se jiżdidulkom.” Ġesù kompla: “Mela, qatt tkunu anzjużi dwar il-​jum li jmiss, għax il-​jum li jmiss se jkollu l-​anzjetajiet tiegħu stess.” (Mattew 6:20, 25-34) Iva, neħtieġu l-​ikel, ix-​xorb, l-​ilbies, u l-​kenn, imma jekk nafdaw f’Jehovah, m’aħniex se nkunu anzjużi bla bżonn dwar dawn l-​affarijiet.

17. Kif nistgħu nuru b’tixbieha l-​ħtieġa li nfittxu l-​ewwel is-​Saltna?

¹⁷ Biex infittxu l-​ewwel is-​Saltna, irridu nafdaw f’Alla u nżommu l-​prijoritajiet tagħna fl-​ordni xierqa. Bugħaddas mingħajr apparat tan-​nifs jistaʼ jogħdos taħt il-​wiċċ taʼ l-​ilma biex ifittex xi gajdra b’xi perla ġo fiha. Dan huwa l-​mod li bih qiegħed jipprovdi għall-​familja tiegħu. Prijorità kbira, tabilħaqq! Imma x’inhuwa iktar importanti? L-​Arja! Irid jitlaʼ fil-​wiċċ regolarment biex jerġaʼ jimla l-​pulmuni tiegħu. L-​arja hija prijorità akbar. Bl-​istess mod, forsi jkollna b’xi mod niġu involuti f’din is-​sistema taʼ affarijiet sabiex nakkwistaw in-​neċessitajiet tal-​ħajja. Madankollu, affarijiet spiritwali jridu jiġu l-​ewwel għaliex l-​istess ħajja tan-​nies taʼ darna tiddependi fuq dawn l-​affarijiet. Biex nevitaw anzjetà bla bżonn fuq ħtiġijiet materjali, irridu jkollna fiduċja sħiħa f’Alla. Barra minn hekk, ‘li jkollna ħafna x’nagħmlu fix-​xogħol tal-​Mulej’ jistaʼ jgħinna biex innaqqsu l-​anzjetà hekk kif “il-​ferħ taʼ Jehovah” jagħti prova li huwa l-​post b’saħħtu tagħna.—1 Korintin 15:58; Neħemija 8:10.

Ibqgħu Itfgħu L-​Anzjetà Tagħkom Fuq Jehovah

18. X’evidenza hemm illi li nitfgħu l-​anzjetà kollha tagħna fuq Jehovah jistaʼ tassew jgħinna?

¹⁸ Biex nibqgħu ffokati b’mod ċar spiritwalment, irridu nkomplu nitfgħu l-​anzjetà kollha tagħna fuq Jehovah. Dejjem ftakar li hu tassew jimpurtah mill-​qaddejja tiegħu. Biex nagħtu tixbieha: Minħabba l-​infedeltà taʼ żewġha lejha, l-​anzjetà taʼ waħda mara Kristjana żdiedet sal-​punt li kien impossibbli għaliha li torqod. (Qabbel Salm 119:28.) Fis-​sodda, madankollu, kienet titfaʼ l-​anzjetà kollha tagħha fuq Jehovah. Kienet tiftaħ qalbha m’Alla, billi tgħidlu dwar l-​uġigħ li hi u ż-​żewġ bniet żgħar tagħha kienu qegħdin isofru. Wara li għajtet għal serħan f’talba ferventi, kienet dejjem tkun tistaʼ torqod, għax kellha l-​fiduċja li Jehovah kien se jieħu ħsiebha u ħsieb uliedha. Din il-​mara ddivorzjata Skritturalment hi issa hienja fiż-​żwieġ maʼ wieħed anzjan.

19, 20. (a) X’inhuma xi modi li bihom nistgħu inkampaw maʼ l-​anzjetà? (b) X’għandna nibqgħu nagħmlu bl-​anzjetà kollha tagħna?

¹⁹ Bħala l-​poplu taʼ Jehovah, għandna modi diversi taʼ kif inkampaw maʼ l-​anzjetà. Li napplikaw il-​Kelma t’Alla huwa speċjalment t’għajnuna. Għandna l-​ikel spiritwali rikk ipprovdut minn Alla permezz taʼ “l-​irsir fidil u diskret,” inklużi artikli t’għajnuna u rifreskanti ppubblikati fit-​Torri Taʼ L-​Għassa u l-​Awake! (Mattew 24:45-47) Għandna l-​għajnuna taʼ l-​ispirtu qaddis t’Alla. Talb regulari u ferventi jibbenefikana immens. Anzjani Kristjani maħturin huma lesti biex minn jeddhom jipprovdu għajnuna u faraġ spiritwali.

²⁰ L-​umiltà u l-​paċenzja tagħna stess huma ferm taʼ benefiċċju f’li nittrattaw maʼ l-​anzjetà li tistaʼ tiġi fuqna. Speċjalment importanti hija l-​fiduċja sħiħa f’Jehovah, għax il-​fidi tagħna tiġi msaħħa hekk kif inġarrbu l-​għajnuna u d-​direzzjoni tiegħu. Mill-​banda l-​oħra, il-​fidi f’Alla tistaʼ żżommna milli nsiru nkwetati bla bżonn. (Ġwann 14:1) Il-​fidi tqanqalna biex infittxu l-​ewwel is-​Saltna u nibqgħu beżlin fix-​xogħol ferrieħi tal-​Mulej, li jistaʼ jgħinna inkampaw maʼ l-​anzjetà. Attività bħal din iġġegħilna nħossuna fis-​sigurtà fost dawk li se jgħannu tifħir ’l Alla għall-​eternità kollha. (Salm 104:33) Ejjew għalhekk nibqgħu nitfgħu l-​anzjetà kollha tagħna fuq Jehovah. (w94 11/15)

Kif Twieġeb Int?

◻ L-​anzjetà kif tistaʼ tiġi definita?

◻ X’inhuma xi modi kif nistgħu inkampaw maʼ l-​anzjetà?

◻ L-​umiltà u l-​paċenzja kif jistgħu jgħinuna biex innaqqsu l-​anzjetà?

◻ F’li inkampaw maʼ l-​anzjetà, għala huwa vitali li jkollna fiduċja sħiħa f’Jehovah?

◻ Għala għandna nibqgħu nitfgħu l-​anzjetà kollha tagħna fuq Jehovah?

[Stampa f’paġna 19]

Taf għala Ġesù qal, “Ieqfu milli tkunu anzjużi”?