Xhieda Kontra l-​Allat Foloz

“‘Intom ix-​xhieda tiegħi’​—Oraklu tal-​Mulej—‘u l-​qaddej tiegħi li jien ħtart.’”—ISAIJA 43:10.

1. Min hu dak Alla veru, u f’liema aspetti hu suprem ’il fuq mill-​kotra t’allat meqjumin illum?

MIN hu dak Alla veru? Illum, din l-​iktar mistoqsija importanti tiffaċċja lill-​umanità kollha. Għalkemm il-​bnedmin iqimu kotra t’allat, Wieħed biss jistaʼ jagħtina l-​ħajja u joffrilna futur hieni. Dwar Wieħed biss jistaʼ jingħad: “Aħna fih ngħixu, nitħarrku u aħna.” (Atti 17:28) Tabilħaqq, Alla wieħed biss għandu d-​dritt li jiġi meqjum. Kif jgħid il-​kor tas-​sema fil-​ktieb t’Apokalissi: “Jistħoqqlok, Mulej Alla tagħna, li tirċievi l-​glorja u l-​ġieħ u s-​setgħa, għax int ħlaqt il-​ħlejjaq kollha, u huma kienu u nħolqu bir-​rieda tiegħek.”—Apokalissi 4:11.

2, 3. (a) Satana b’gideb kif sfida d-​dritt taʼ Jehovah li jiġi meqjum? (b) X’kien ir-​riżultat tad-​dnub t’Eva għaliha u għat-​tfal tagħha, u x’kien ir-​riżultat għal Satana?

² Fil-​ġnien t’Għeden, Satana b’mod giddieb sfida d-​dritt taʼ Jehovah li jkun meqjum. Billi uża serpent, qal lil Eva li jekk hi tirribella kontra l-​liġi taʼ Jehovah u tiekol mis-​siġra li Jehovah kien ipprojbixxa, hi nfisha se tkun bħal Alla. Kliemu kien: “Alla jaf li dak in-​nhar li tieklu minnu jinfetħu għajnejkom u ssiru bħal allat, li jafu t-​tajjeb u l-​ħażin.” (Ġenesi 3:5) Eva emmnet lis-​serpent u kielet mill-​frott ipprojbit.

³ M’għandniex xi ngħidu, Satana gideb. (Ġwann 8:44) L-​uniku mod li Eva saret “bħal Alla” meta dinbet kien li assumiet fuqha nfisha r-​responsabbiltà li tiddeċiedi dak li kien tajjeb u dak li kien ħażin, xi ħaġa li kien imissha tħalliet għal Jehovah. U minkejja l-​gidba taʼ Satana, eventwalment hi mietet. Mela l-​uniku wieħed li bbenefika mid-​dnub t’Eva kien Satana. Tabilħaqq, il-​mira li ma ssemietx taʼ Satana f’li jipperswadi lil Eva biex tidneb kienet biex isir alla huwa nnifsu. Meta Eva dinbet, saret l-​ewwel segwaċi uman tiegħu, u malajr ingħaqad magħha Adam. Il-​biċċa l-​kbira minn uliedhom mhux biss twieldu “fid-​dnub” imma wkoll waqgħu taħt l-​influwenza taʼ Satana, u f’qasir żmien, dinja sħiħa li kienet imbiegħda minn dak Alla veru bdiet teżisti.—Ġenesi 6:5; Salm 51:7 [Salm 51:5] NW.

4. (a) Min huwa l-​alla taʼ did-dinja? (b) Dwar liema ħaġa hemm ħtieġa urġenti?

⁴ Dik id-​dinja ġiet meqruda fid-​Dilluvju. (2 Pietru 3:6) Wara d-​Dilluvju żviluppat dinja oħra mbiegħda minn Jehovah, u din għadha teżisti. Dwarha il-​Bibbja tgħid: “[I]d-dinja kollha qiegħda taħt idejn il-​ħażin.” (1 Ġwann 5:19) Billi taġixxi kontra l-​ispirtu u l-​ittra tal-​liġi taʼ Jehovah, din id-​dinja taqdi l-​għanijiet taʼ Satana. Huwa l-​alla tagħha. (2 Korintin 4:4) Madankollu, bażikament huwa alla impotenti. Ma jistax jagħmel lin-​nies henjin jew jagħtihom il-​ħajja; Jehovah biss jistaʼ jagħmel dan. Għaldaqstant, nies li jridu ħajja taʼ skop u dinja aħjar iridu l-​ewwel isiru jafu li Jehovah hu dak Alla veru u mbagħad jitgħallmu jagħmlu r-​rieda tiegħu. (Salm 37:18, 27, 28; Koħelet 12:13) Hemm b’hekk ħtieġa urġenti għal irġiel u nisa taʼ fidi li jagħtu xiehda, jew jipproklamaw il-​verità, dwar Jehovah.

5. Pawlu liema ‘sħaba taʼ xhieda’ jsemmi? Semmi xi nies fil-​lista tiegħu.

⁵ Sa mill-​bidunett, individwi leali bħal dawn dehru fuq ix-​xena dinjija. L-​appostlu Pawlu, f’Lhud kapitlu 11, jagħti lista twila minnhom u jsejħilhom “sħaba hekk kbira taʼ xhieda.” (Lhud 12:1) It-​tieni iben t’Adam u Eva, Abel, kien l-​ewwel wieħed fil-​lista taʼ Pawlu. Ħenok u Noè wkoll jissemmew miż-​żmien taʼ qabel id-​Dilluvju. (Lhud 11:4, 5, 7) Prominenti hu Abraham, l-​antenat tar-​razza Lhudija. Abraham, li hu msejjaħ il-​“ħabib t’Alla,” sar l-​antenat taʼ Ġesù, “ix-​xhud [leali u veru].”—Ġakbu 2:23; Apokalissi 3:14, NW.

Ix-​Xiehda T’Abraham Għall-​Verità

6, 7. Il-​ħajja u l-​azzjonijiet t’Abraham b’liema modi kienu xiehda għal dak Alla veru?

⁶ Abraham kif qeda bħala xhud? Bil-​fidi qawwija tiegħu f’Jehovah u bl-​ubbidjenza leali lejh. Meta ġie msejjaħ biex jitlaq miċ-​ċentru urban t’Ur u jgħix il-​bqija taʼ ħajtu f’pajjiż imbiegħed, Abraham obda. (Ġenesi 15:7; Atti 7:2-4) Nies tat-​tribujiet li jiġġerrew spiss jabbandunaw il-​ħajja nomadika tagħhom u jippreferu l-​ħajja iżjed taʼ sigurtà tal-​belt. Għaldaqstant, meta Abraham telaq mill-​belt biex jibda jgħix fit-​tined, hu ta evidenza qawwija tal-​fiduċja tiegħu f’Alla Jehovah. L-​ubbidjenza tiegħu kienet xiehda għal dawk li rawh. Jehovah bierek b’mod għani lil Abraham minħabba l-​fidi tiegħu. Għalkemm kien jgħix fit-​tined, Abraham stagħna materjalment. Meta Lot u l-​familja tiegħu nġarru fil-​jasar, Jehovah ta lil Abraham suċċess fil-​ġiri tiegħu warajhom, biex b’hekk setaʼ jeħlishom. Mart Abraham welldet iben fi xjuħitha, u b’hekk il-​wegħda taʼ Jehovah li Abraham kellu jkun missier taʼ żerriegħa ġiet ikkonfermata. Permezz t’Abraham, in-​nies raw li Jehovah hu Alla ħaj li jwettaq il-​wegħdi tiegħu.—Ġenesi 12:1-3; 14:14-16; 21:1-7.

⁷ Meta rritorna milli jeħles lil Lot, Abraham iltaqaʼ maʼ Melkisedek, sultan taʼ Salem (iktar tard imsejħa Ġerusalemm), li ta merħba lil Abraham billi qal: “Imbierek Abram minn El-għeljon.” Is-​sultan taʼ Sodom ukoll iltaqaʼ miegħu u ried jagħtih għotjiet. Abraham irrifjuta. Għala? Ma riedx li jkun hemm xi dubju dwar is-​Sors tal-​barkiet tiegħu. Qal: “Ngħolli jdejja lejn il-​Mulej, El-għeljon, li għamel is-​sema u l-​art, u naħlef li la ħajta u anqas qafla taʼ qorq, xejn ma nieħu minn kull ma hu tiegħek biex ma tgħidx: ‘Jien għanejt lil Abram.’” (Ġenesi 14:17-24) Kemm kien xhud mill-​aħjar Abraham!

Ġens Taʼ Xhieda

8. Mosè kif wera fidi kbira f’Jehovah?

⁸ Mosè, dixxendent t’Abraham, ukoll jidher fuq il-​lista taʼ xhieda taʼ Pawlu. Mosè abbanduna r-​rikkezzi taʼ l-​Eġittu u iktar tard iffaċċja bil-​qlubija lill-​ħakkiem taʼ dik il-​qawwa dinjija kbira sabiex imexxi lil ulied Iżrael lejn il-​ħelsien. Minn fejn ġab il-​kuraġġ? Mill-​fidi tiegħu. Pawlu jgħid: “[Mosè] żamm iebes, daqs kemm kieku kien qiegħed jara lil Alla li ma jidhirx.” (Lhud 11:27) L-​allat taʼ l-​Eġittu kienu jidhru, jistgħu jintmessu. Saħansitra llum, l-​istatwi tagħhom jimpressjonaw lin-​nies. Imma Jehovah, għalkemm ma jidhirx, kien bil-​wisq iżjed reali għal Mosè minn dawk l-​allat foloz kollha. Mosè ma kellu ebda dubju li Jehovah jeżisti u li kien se jippremja lill-​adoraturi Tiegħu. (Lhud 11:6) Mosè sar xhud li jispikka.

9. Il-​ġens taʼ Iżrael kif kellu jaqdi lil Jehovah?

⁹ Wara li mexxa lill-​Iżraeliti lejn il-​libertà, Mosè sar il-​medjatur taʼ patt bejn Jehovah u d-​dixxendenti t’Abraham minn Ġakobb. Bħala riżultat, il-​ġens taʼ Iżrael sar jeżisti bħala pussess speċjali taʼ Jehovah. (Eżodu 19:5, 6) Għall-​ewwel darba, xiehda nazzjonali kellha tingħata. Il-​kliem taʼ Jehovah permezz taʼ Isaija, xi 800 sena wara, applika fil-​prinċipju mill-​bidu taʼ l-​eżistenza tal-​ġens: “‘Intom ix-​xhieda tiegħi’​—Oraklu tal-​Mulej—​‘u l-​qaddej tiegħi li jien ħtart, biex tagħrfuni u temmnuni u tifhmu li jien hu.’” (Isaija 43:10) Dan il-​ġens ġdid kif kienu se jaqdu bħala xhieda taʼ Jehovah? Bil-​fidi u l-​ubbidjenza tagħhom u permezz taʼ l-​azzjonijiet taʼ Jehovah għan-​nom tagħhom.

10. Ix-​xogħlijiet setgħanin taʼ Jehovah għan-​nom taʼ Iżrael b’liema mod ipprovdew xiehda, u b’liema riżultati?

¹⁰ Madwar 40 sena wara l-​bidu tiegħu, Iżrael kien wasal biex jieħu pussess tal-​Pajjiż Imwiegħed. Intbagħtu spiji biex jitkixxfu l-​belt taʼ Ġeriko, u Raħab, abitanta taʼ Ġeriko, ipproteġiethom. Għala? Hi qalet: “Għax smajna kif il-​Mulej reġġaʼ lura l-​ilma tal-​Baħar tal-​Qasab minn quddiemkom meta ħriġtu mill-​Eġittu, u x’għamiltu liż-​żewġ slaten taʼ l-​Amurrin, li hemm lil hemm mill-​Ġordan, Siħon u Għog, kif qridtuhom. Malli smajna qalbna nħallet u ma baqgħet ebda ruħ f’ħadd minna minħabba fikom. Veru li l-​Mulej, Alla tagħkom, hu Alla fis-​sema minn fuq u fuq l-​art minn taħt.” (Ġożwè 2:10, 11) Ir-​rapport tax-​xogħlijiet taʼ qawwa taʼ Jehovah qanqal lil Raħab u l-​familja tagħha biex iħallu lil Ġeriko u l-​allat foloz tagħha u jqimu lil Jehovah maʼ Iżrael. B’mod ċar, Jehovah kien ta xiehda qawwija permezz taʼ Iżrael.—Ġożwè 6:25.

11. Il-​ġenituri Iżraeliti kollha liema responsabbiltà kellhom rigward l-​għoti taʼ xiehda?

¹¹ Waqt li l-​Iżraeliti kienu għadhom fl-​Eġittu, Jehovah bagħat lil Mosè għand Fargħun u qal: “Mur għand il-​Fargħun, għax jien webbistlu qalbu u qalb il-​qaddejja tiegħu, biex nagħmel dawn is-​sinjali tiegħi f’nofshom, u biex ixxandar u ssammaʼ f’widnejn ibnek u wlied ibnek li jien qgħadt nitliegħeb bl-​Eġizzjani, u s-​sinjali li jien għamilt ġo nofshom, sabiex tkunu tafu li jien il-​Mulej.” (Eżodu 10:1, 2) Iżraeliti ubbidjenti kienu se jgħidu lit-​tfal tagħhom dwar l-​atti setgħanin taʼ Jehovah. It-​tfal tagħhom, mill-​banda l-​oħra, kienu se jirrakkontawhom lit-​tfal tagħhom, u hekk kellu jkun, minn ġenerazzjoni għal ġenerazzjoni. B’hekk, l-​għemejjel potenti taʼ Jehovah kienu se jibqgħu miftakkrin. Bl-​istess mod illum, il-​ġenituri għandhom ir-​responsabbiltà li jagħtu xiehda lit-​tfal tagħhom.—Dewteronomju 6:4-7; Proverbji 22:6.

12. Il-​barka taʼ Jehovah fuq Salamun u Iżrael kif serviet bħala xiehda?

¹² Il-​barka rikka taʼ Jehovah fuq Iżrael meta dan kien leali serviet bħala xiehda għall-​ġnus taʼ madwarhom. Bħalma qal Mosè wara li rrakkonta l-​barkiet imwegħdin taʼ Jehovah: “Jaraw il-​ġnus kollha taʼ l-​art li int iġġib isem il-​Mulej, u jibżgħu minnek.” (Dewteronomju 28:10) Salamun ngħata għerf u għana minħabba l-​fidi tiegħu. Taħtu l-​ġens kellu prosperità u gawda perijodu twil taʼ paċi. Rigward dak iż-​żmien naqraw: “Kienu jiġu nies mill-​ġnus kollha jisimgħu l-​għerf taʼ Salamun, u mingħand is-​slaten kollha taʼ l-​art, li kienu semgħu b’għerfu.” [1 Slaten 5:5, 9, 10, 14]; [1 Slaten 4:25, 29, 30, 34, NW] Prominenti fost il-​viżitaturi taʼ Salamun kienet is-​sultana taʼ Xeba. Wara li rat għaliha nfisha l-​barka taʼ Jehovah fuq il-​ġens u s-​sultan tiegħu, qalet: “Ikun imbierek il-​Mulej, Alla tiegħek li tgħaxxaq bik, u qiegħdek fuq it-​tron tiegħu, b’sultan tal-​Mulej Alla tiegħek; għax Alla tiegħek ħabb lil Iżrael.”—2 Kronaki 9:8.

13. Liema setgħet kienet l-​iktar xiehda effettiva taʼ Iżrael, u kif għadna nibbenefikaw minnha?

¹³ L-​appostlu Pawlu semma dik li x’aktarx kienet l-​iktar xiehda effettiva taʼ Iżrael. Meta kien qiegħed jiddiskuti dwar Iżrael tal-​laħam mal-​kongregazzjoni Kristjana f’Ruma, qal: “Lilhom kienu fdati l-​orakli t’Alla.” (Rumani 3:1, 2) Billi bdew b’Mosè, ċerti Iżraeliti leali kienu spirati biex jiddokumentaw bil-​kitba t-​trattâr taʼ Jehovah maʼ Iżrael, kif ukoll il-​pariri tiegħu, il-​liġijiet tiegħu, u l-​profeziji tiegħu. Permezz taʼ dawn il-​kitbiet dawk l-​iskribi tal-​qedem taw xiehda għall-​ġenerazzjonijiet kollha li kellhom jiġu​—inkluża tagħna llum—​li hemm biss Alla wieħed, u li ismu huwa Jehovah.—Danjel 12:9; 1 Pietru 1:10-12.

14. Xi wħud li taw xiehda għal Jehovah għala sofrew persekuzzjoni?

¹⁴ B’sogħba, Iżrael taʼ spiss naqas li jeżerċita fidi, u mbagħad Jehovah kellu jibgħat xhieda lill-​ġens tiegħu stess. Ħafna minn dawn kienu ppersegwitati. Pawlu qal li xi wħud “sofrew żebliħ u swat u saħansitra ktajjen u ħabs.” (Lhud 11:36) Xhieda leali tassew! X’ħasra li l-​persekuzzjonijiet tagħhom spiss ġew minn membri sħabhom tal-​ġens magħżul taʼ Jehovah! (Mattew 23:31, 37) Fil-​fatt, id-​dnub tal-​ġens sar tant kbir li fis-​sena 607 Q.E.K., Jehovah daħħal lill-​Babilonjani biex jeqirdu lil Ġerusalemm bit-​tempju tagħha u jġorru lill-​maġġoranza taʼ l-​Iżraeliti li baqgħu ħajjin fl-​eżilju. (Ġeremija 20:4; 21:10) Kien dak it-​tmiem tax-​xiehda nazzjonali għal isem Jehovah? Le.

Ġuri Taʼ L-​Allat

15. Kif ingħatat xiehda saħansitra fl-​eżilju Babilonjan?

¹⁵ Saħansitra fl-​eżilju Babilonjan, membri leali tal-​ġens ma żammewx lura milli jixhdu dwar id-​Divinità u l-​qawwa taʼ Jehovah. Per eżempju, Danjel bil-​qlubija interpreta l-​ħolm taʼ Nebukadneżżar, spjega l-​kitba fuq il-​ħajt għal Belxażżar, u rrifjuta li jagħmel kompromess quddiem Darjus fil-​kwistjoni tat-​talb. It-​tliet Ebrej ukoll, meta rrifjutaw li jmilu quddiem xbiha, taw lil Nebukadneżżar xiehda meraviljuża.—Danjel 3:13-18; 5:13-29; 6:4-27.

16. Jehovah kif bassar ir-​ritorn taʼ Iżrael lejn pajjiżhom, u x’kellu jkun l-​iskop taʼ dan ir-​ritorn?

¹⁶ Minkejja dan, Jehovah kellu skop li xiehda nazzjonali kienet se tingħata mill-​ġdid fuq il-​ħamrija taʼ Iżrael. Eżekjel, li pprofetizza fost il-​Lhud eżiljati fil-​Babilonja, kiteb dwar id-​determinazzjoni taʼ Jehovah rigward l-​art devastata: “Jien inkattrilkom in-​nies, dar Iżrael kollha; l-​ibliet jitgħammru u l-​ħerbiet jinbnew mill-​ġdid.” (Eżekjel 36:10) Jehovah għala kien se jagħmel dan? Primarjament bħala xiehda għal ismu stess. Permezz t’Eżekjel qal: “Mhux minħabba fikom sejjer nagħmel dan, ja dar taʼ Iżrael, iżda minħabba f’ismi l-​qaddis li intom kasbartu fost il-​ġnus.”—Eżekjel 36:22; Ġeremija 50:28.

17. X’kien il-​kuntest tal-​kliem taʼ Isaija 43:10?

¹⁷ Kien meta pprofetizza dwar ir-​ritorn taʼ Iżrael mill-​eżilju Babilonjan li l-​profeta Isaija kien spirat li jikteb il-​kliem taʼ Isaija 43:10, billi qal li Iżrael kien ix-​xhud taʼ Jehovah, il-​qaddej tiegħu. F’Isaija 43 u 44, Jehovah hu deskritt bħala l-​Ħallieq, Dak li Sawwar, Alla, il-​Qaddis, is-​Salvatur, il-​Feddej, is-​Sultan, u Dak li Għamel lil Iżrael. (Isaija 43:3, 14, 15; 44:2) L-​eżilju taʼ Iżrael ġie permess minħabba li l-​ġens ripetutament naqas li jigglorifikah bħala tali. Madankollu, kienu għadhom il-​poplu tiegħu. Jehovah kien qalilhom: “La tibżax, għax jien fdejtek; jien sejjaħtlek b’ismek. Inti tiegħi.” (Isaija 43:1) L-​eżilju taʼ Iżrael f’Babilonja kien se jintemm.

18. Il-​liberazzjoni taʼ Iżrael mill-​Babilonja kif tat prova li Jehovah hu l-​uniku Alla veru?

¹⁸ Tabilħaqq, Jehovah għamel il-​liberazzjoni taʼ Iżrael mill-​Babilonja bħala ġuri taʼ l-​allat. Hu sfida lill-​allat foloz tal-​ġnus biex jippreżentaw lix-​xhieda tagħhom, u semma lil Iżrael bħala x-​xhud tiegħu. (Isaija 43:9, 12) Meta kisser il-​madmad taʼ l-​eżilju taʼ Iżrael, hu ta prova li l-​allat taʼ Babilonja ma kienu allat xejn u li hu l-​uniku Alla veru. (Isaija 43:14, 15) Meta, madwar 200 sena qabel il-​ġrajja, hu semma lil Ċiru l-​Persjan bħala l-​qaddej tiegħu f’li jeħles lil-​Lhud, ta iktar prova dwar id-​Divinità tiegħu. (Isaija 44:28) Iżrael kien se jiġi lliberat. Għala? Jehovah jispjega: “Biex ixandar it-​tifħir tiegħi.” (Isaija 43:21) Dan kien se jagħti iżjed opportunità għal xiehda.

19. Liema xiehda ngħatat mill-​istedina taʼ Ċiru lill-​Iżraeliti biex jirritornaw lejn Ġerusalemm u bl-​atti taʼ Lhud leali wara dak ir-​ritorn?

¹⁹ Meta wasal iż-​żmien, Ċiru l-​Persjan ikkonkwista l-​Babilonja sewwa sew bħalma kien ipprofetizzat. Ċiru, għalkemm pagan, ipproklama d-​Divinità taʼ Jehovah meta ħareġ digriet lil-​Lhud f’Babilonja: “Kull min hemm fostkom mill-​poplu kollu tiegħu, jalla Alla tiegħu jkun miegħu! Ħa jitlaʼ Ġerusalemm, belt taʼ Ġuda, u jibni t-​tempju tal-​Mulej, Alla taʼ Iżrael. Hu Alla li qiegħed Ġerusalemm.” (Esdra 1:3) Ħafna Lhud wieġbu. Huma vvjaġġaw lura lejn il-​Pajjiż Imwiegħed u bnew artal fil-​post fejn qabel kien hemm it-​tempju. Minkejja l-​iskuraġġiment u l-​oppożizzjoni ħarxa, fl-​aħħar setgħu jibnu mill-​ġdid it-​tempju u l-​belt taʼ Ġerusalemm. Dan kollu ġara, bħalma qal Jehovah innifsu, “la bil-​ħila u lanqas bil-​qawwa, imma bl-​ispirtu tiegħ[u].” (Żakkarija 4:6) Dawn il-​bravuri taw iżjed evidenza li Jehovah hu dak Alla veru.

20. Minkejja d-​dgħjufijiet taʼ Iżrael, x’jistaʼ jingħad dwar l-​għoti tagħhom taʼ xiehda għal isem Jehovah fid-​dinja tal-​qedem?

²⁰ B’hekk, Jehovah baqaʼ juża lil Iżrael, għalkemm ġens taʼ nies imperfetti u kultant ribellużi, bħala x-​xhud tiegħu. Fid-​dinja taʼ qabel il-​Kristjanità, dak il-​ġens, bit-​tempju u s-​saċerdozju tiegħu, irrappreżenta ċ-​ċentru dinji taʼ qima vera. Kulmin jaqra fl-​Iskrittura Ebrajka dwar l-​atti taʼ Jehovah f’relazzjoni maʼ Iżrael ma jistaʼ jkollu ebda dubju affattu li hemm biss Alla veru wieħed, u ismu huwa Jehovah. (Dewteronomju 6:4; Żakkarija 14:9) Madankollu, xiehda bil-​wisq akbar kellha tingħata għal isem Jehovah, u se niddiskutu dan fl-​artiklu li jmiss. (w95 9/1)

Tiftakar Int?

◻ Abraham kif ta xiehda li Jehovah hu dak Alla veru?

◻ Liema kwalità li tispikka taʼ Mosè għenitu biex ikun xhud leali?

◻ Iżrael b’liema modi ta xiehda nazzjonali dwar Jehovah?

◻ Il-​liberazzjoni taʼ Iżrael mill-​Babilonja kif kienet turija li Jehovah hu l-​uniku Alla veru?

[Stampa f’paġna 24]

Permezz tal-​fidi u l-​ubbidjenza tiegħu, Abraham ta xiehda li tispikka favur id-​Divinità taʼ Jehovah