Ritwal li Ma Jfisser Xejn?
IS-sagrament tal-qrar ilu jiġi pprattikat mill-Kattoliċi għal sekli sħaħ. Madankollu, għal ħafna huwa rutina bla skop. Billi rrifletta fuq iż-żgħożija tiegħu, surmast taʼ skola terzjarja li kien jismu Bob jgħid: “Kont ġuvni, u saħansitra dak iż-żmien ma ħadtux bis-serjetà.” Għala le? Għalih, il-qrar kien sar ritwal li ma jfisser xejn. Hu jispjega: “Il-qrar kien bħal meta ġġib il-bagalji tiegħek mimlijin kollha dnubiet għand l-uffiċjal tad-dwana fl-ajruport. Hu jistaqsik mistoqsijiet dwar id-dnubiet tiegħek u mbagħad iħallik tgħaddi wara li tkun ħallast xi ħaġa għall-oġġetti taʼ lussu li tkun xtrajt waqt li kont imsiefer.”
B’mod simili, Frank Wessling, waqt li jikteb fil-U.S. Catholic, jiddeskrivi l-prattika tal-qrar bħala “gwida pass pass estremament simplifikata, li tvarja minn daqqa t’għajn ħafifa lejn dnubiet ordinarji permezz taʼ talb taʼ ndiema mmemorizzat għal att ritwali taʼ penitenza għal taparsi.” Il-konklużjoni taʼ Wessling? “Jien konvint li l-Qrar huwa taʼ benefiċċju għar-ruħ,” hu jgħid. “Imma l-mod kif jagħmluh il-Kattoliċi huwa problema.”
Il-Bibbja tippreżenta l-qrar b’manjiera kompletament differenti. L-iktar importanti huwa qrar lil Alla. (Salm 32:1-5) U d-dixxiplu Kristjan Ġakbu kiteb: “Hemm xi ħadd marid fostkom? Ħalli dan isejjaħ lill-presbiteri tal-Knisja; u ħalli dawn jitolbu għalih u jidilkuh biż-żejt f’isem il-Mulej. Stqarru wieħed lill-ieħor in-nuqqasijiet tagħkom u itolbu għal xulxin, biex hekk tfiqu.”—Ġakbu 5:14, 16.
Kristjan mgħobbi bid-dnub jistaʼ jsejjaħ l-indokraturi tal-kongregazzjoni, li jistgħu jagħtu parir persunali u prattiku mill-Bibbja biex jgħinu lill-wieħed li qiegħed jiżbalja jabbanduna l-korsa midinba tiegħu. L-indokraturi jistgħu jagħtu inkuraġġiment xieraq hekk kif janalizzaw il-progress tal-wieħed li hu marid spiritwalment. X’kuntrast mar-ritwal formali tal-qrar ipprattikat mill-knejjes illum! Imsaħħin permezz taʼ l-assistenza persunali taʼ l-anzjani fil-kongregazzjoni, uħud li jiżbaljaw u li jindmu jistgħu jakkwistaw is-serħan li ħass David, bħalma esprimieh hu f’salm: “Id-dnub tiegħi jien stqarrejtlek, u l-ħażen tiegħi ma ħbejthulekx. Jien għidt: ‘Quddiem il-Mulej nistqarr ħtijieti.’ U int ħfirtli l-ħażen tad-dnub tiegħi.”—Salm 32:5.