Ħajja Aħjar Hija Mwiegħda

TIXTIEQ int li tkun ħieles mill-​problemi li jagħmlu l-​ħajja diffiċli? Trid int li tgħix f’dinja fejn il-​ħajja hija pjaċevoli daqs kemm hija fix-​xena murija fuq il-​qoxra taʼ quddiem u taʼ wara taʼ din ir-​rivista? Agħti ħarsa tajba lejn dik l-​istampa. In-​nies għandhom ħafna x’jieklu. Tassew se jgawdu dak l-​ikel delizzjuż. Kulħadd hu hieni. Nies taʼ razez differenti jinsabu fil-​paċi wieħed maʼ l-​ieħor. Saħansitra l-​annimali huma fil-​paċi! Ħadd m’hu qiegħed jiġġieled. Ħadd m’hu fqir. Ħadd m’hu marid. Hemm inħawi sbieħ, siġar mill-​isbaħ, u ilma pur u nadif. X’arranġament splendidu!

Qatt se tkun hekk din l-​art? Iva, se tkun ġenna. (Luqa 23:43) Alla, li ħalaq l-​art, għandu l-​iskop li l-​bnedmin se jgawdu ħajja aħjar fuq art magħmula ġenna. U int tistaʼ tkun hemm!

Liema Ħajja Tippreferi Int?

Kif se tkun differenti l-​Ġenna taʼ l-​art futura mid-​dinja li qegħdin ngħixu fiha issa? Preżentament, ’il fuq minn biljun ruħ jibqgħu bil-​ġuħ kull ġurnata. Imma fil-​Ġenna li Alla ddetermina għall-​art, kulħadd se jkollu ħafna x’jiekol. Il-​Bibbja twiegħed: “U jagħmel il-​Mulej taʼ l-​eżerċti għall-​popli kollha . . . mejda b’ikel fin, mejda bi nbejjed ħelwa.” (Isaija 25:6) Mhux se jkun hemm nuqqas t’ikel, għax il-​Bibbja tgħid: “Ikun kotran il-​qamħ fuq l-​art, jogħla sal-​qċaċet tal-​għoljiet.”—Salm 72:16.

Illum, ħafna jgħixu f’gabubi u griebeġ, jew jitħabtu biex iħallsu l-​kera tagħhom. Oħrajn m’għandhomx dar u jorqdu fit-​triq. Skond l-​Organizzazzjoni Dinjija tas-​Saħħa, mhux inqas minn 100 miljun mit-​tfal tad-​dinja huma bla dar. Imma fil-​Ġenna li ġejja, kulħadd se jkollu dar li jistaʼ jsejħilha tiegħu stess. Il-​Kelma t’Alla tgħid: “Huma għad jibnu djarhom u jgħammru fihom, iħawlu d-​dwieli u jieklu frotthom.”—Isaija 65:21.

Ħafna jbatu fuq xogħol li ma jogħġobhomx. Spiss jaħdmu iebes għal ħin twil imma jaqilgħu ftit. Madwar 1 minn kull 5 min-​nies fid-​dinja jgħix fuq qliegħ taʼ inqas minn $500 fis-​sena. Fil-​Ġenna li ġejja, madankollu, in-​nies se jgawdu xogħolhom u se jaraw riżultati tajbin minnu. Alla jwiegħed: “[I]l-magħżulin tiegħi jistgħallu xogħol idejhom. Ma jitħabtux għal xejn.”—Isaija 65:22, 23.

Bħalissa kull tip taʼ mard jinsab maʼ kullimkien. Ħafna huma għomja. Xi wħud huma torox. Oħrajn ma jistgħux jimxu. Imma fil-​Ġenna, in-​nies se jkunu ħelsin minn kull tip taʼ mard. Jehovah jgħid: “Ħadd minn min jgħammar hemm ma jgħid: ‘Jien marid.’” (Isaija 33:24) Inkwantu għal dawk li diġà għandhom diżabilità, il-​wegħda li tqawwi l-​qalb hija: “Imbagħad jinfetħu għajnejn il-​għomja, jinfetħu widnejn it-​torox. Imbagħad iz-​zopp jaqbeż bħal għażżiela u lsien l-​imbikkma jinħall bil-​ferħ.”—Isaija 35:5, 6.

Fil-preżent, hemm is-​sofferenzi u l-​uġigħ, in-​niket u l-​mewt. Imma fil-​Ġenna fuq l-​art, dawn l-​affarijiet kollha m’humiex se jeżistu. Iva, saħansitra l-​mewt se tkun marret! Il-​Bibbja tgħid: “Alla nnifsu jkun magħhom, Alla tagħhom. Hu jixxottalhom kull demgħa minn għajnejhom: ma jkunx hemm iżjed mewt, anqas biki jew agħjat jew tbatija ma jkun hemm iżjed, għax għabu l-​ħwejjeġ taʼ qabel.”—Apokalissi 21:3, 4.