Proklamaturi tas-​Saltna Jirrapportaw

Naħarbu Lejn l-​Organizzazzjoni Teokratika taʼ Jehovah

ĦAFNA żmien ilu l-​profeta Isaija ġie mqanqal biex jiddikjara: ‘Faħħru għalhekk il-​Mulej fil-​gżejjer tal-​baħar.’ (Isaija 24:15, Karm Żammit) Ix-​Xhieda taʼ Jehovah jqisu l-​gżejjer tal-​baħar bħala parti mid-​“dinja kollha” li fiha Ġesù qal ‘l-​Evanġelju jkun imxandar.’—Mattew 24:14; Mark 13:10.

Il-Gżejjer Marquesas jinsabu xi 1,400 km fil-​Grigal taʼ Taħiti. Jagħmlu parti minn grupp remot taʼ gżejjer fin-​Nofs-in-Nhar tal-​Paċifiku msejjaħ il-​Polinesja Franċiża. B’ħamrija vulkanika fertili, u klima sħuna u umda, il-​ħaxix jikber bil-​għama f’dawn il-​gżejjer. Madankollu, il-​Marquesas qegħdin jagħtu tip ieħor taʼ frott. Ikkunsidra l-​każ taʼ familja waħda li wieġbet għall-​messaġġ tas-​Saltna fuq il-​gżira taʼ Hiva Oa.

Jean u martu, Nadine, ma kinux kuntenti bl-​hekk imsejħa soċjetà ċivilizzata taʼ l-​Ewropa tal-​Punent li kienu jgħixu fiha. Għalhekk iddeċidew li jħallu dak l-​istil taʼ ħajja mgħaġġla warajhom u jitilqu maʼ binhom lejn il-​Gżejjer Marquesas. Id-​dar il-​ġdida tagħhom, magħmula mill-​bambù, kienet għall-​kenn f’wied remot. Biex imorru għand l-​eqreb ġirien tagħhom, kellhom jimxu minn passaġġ muntanjuż u mħarbat għal sagħtejn. L-​iktar villaġġ viċin li kien fih tabib, skola, u ħanut kien tliet sigħat ’il bogħod bil-​ġip.

Jean u Nadine ma kinux interessati fir-​reliġjon. Madankollu, huma ġieli kienu jiddiskutu dwar l-​oriġini tal-​ħajja. Spiss, kienu jelaboraw fuq teoriji komplessi taʼ l-​evoluzzjoni. Imma l-​ebda waħda mit-​teoriji tagħhom ma ġabitilhom sodisfazzjon.

Wara li għexu iżolati għal sitt snin, kienu sorpriżi meta kellhom żjara minn tnejn mix-​Xhieda taʼ Jehovah. Ix-​Xhieda semgħu fejn kienu joqogħdu Jean u Nadine min-​nies fil-​villaġġi qrib. Naturalment, il-​konversazzjoni wasslet għal diskussjoni dwar it-​teorija taʼ l-​evoluzzjoni. B’ferħ kbir għall-​koppja, ix-​Xhieda kellhom magħhom kopja tal-​Ktieb Life​—How Did It Get Here? By Evolution or by Creation?, ippubblikat mix-​Xhieda taʼ Jehovah. Jean u Nadine kienu ferħanin li jkollhom ktieb li ppreżenta eżami bir-​reqqa taʼ kif waslet hawn il-​ħajja.

Fi żmien qasir, inbeda studju tal-​Bibbja. Matul perijodu taʼ madwar tliet snin, Jean u Nadine għamlu progress sod. Saru konvinti li dalwaqt id-​dinja kollha kemm hi se tintgħamel ġenna. Wara li l-​familja tagħhom żdiedet għal tlett itfal, li jivvjaġġaw għal erbaʼ sigħat biex jattendu l-​laqgħat Kristjani fis-​Sala tas-​Saltna sar sfida kbira. Madankollu, dan ma waqqafhomx milli jattendu. Eventwalment Jean u Nadine ssimbolizzaw id-​dedikazzjoni tagħhom lil Jehovah bil-​magħmudija taʼ l-​ilma. Dan għamluh f’konvenzjoni li nżammet fil-​villaġġ ewlieni, fejn l-​attendenza kellha quċċata taʼ 38 persuna!

Sabiex jgħinu lill-​grupp żgħir taʼ pubblikaturi tas-​Saltna, il-​familja ddeċidiet li tħalli d-​dar iżolata tagħha. Huma marru joqogħdu f’villaġġ taʼ madwar elf abitant, fejn Jean qiegħed issa jaqdi bħala qaddej ministerjali fil-​kongregazzjoni lokali tax-​Xhieda taʼ Jehovah. Din il-​familja, li qabel ħarbet lejn il-​gżejjer biex taħrab miċ-​ċivilizzazzjoni, tikkunsidrah bħala privileġġ li sabet l-​uniku santwarju veru, l-​organizzazzjoni teokratika taʼ Jehovah.