Ġrajja fi Franza li Ma Tintesiex

“LE GĦALL-​BELT TAʼ JEHOVAH!” ddikjaraw il-​kartelluni mwaħħlin mal-​belt kollha. “Kollha Flimkien Kontra l-​Proġett taʼ Jehovah” ħeġġeġ wieħed mill-​gruppi taʼ kontra. Litteralment mijiet t’artikli li ġew stampati ħarġu din il-​kwistjoni fil-​beraħ. Ġew iffirmati xi petizzjonijiet, u l-​kaxxi taʼ l-​ittri lokali ġew imballati b’dilluvju taʼ iktar minn nofs miljun fuljett li fihom issemma dan il-​proġett. X’kien dan il-​proġett li kiser il-​paċi tal-​belt taʼ Louviers, fil-​Majjistral taʼ Franza, li normalment hija trankwilla? Il-​bini li ġie pproponut taʼ uffiċċju tal-​fergħa u residenza ġodda tax-​Xhieda taʼ Jehovah.

Jehovah Jġagħalha Tikber

L-​attività tax-​Xhieda taʼ Jehovah fi Franza ilha għaddejja mit-​tmiem tas-​seklu 19. L-​ewwel maħżen għall-​letteratura Biblika ġie miftuħ fl-​1905 f’Beauvène, fin-​Nofsinhar taʼ Franza, u mill-​1919 beda jopera uffiċċju żgħir f’Pariġi. Fl-​1930 infetaħ uffiċjalment uffiċċju tal-​fergħa f’din il-​belt, u s-​sena taʼ wara, l-​istaff taʼ l-​uffiċċju bdew joqogħdu f’Dar Betel li kienet tinsab f’Enghien-les-Bains, fit-​Tramuntana taʼ Pariġi. Wara t-​Tieni Gwerra Dinjija, il-​familja taʼ Betel reġgħet marret toqgħod Pariġi, u fl-​1959 il-​fergħa ġiet ittrasferita għal ġo bini b’ħames sulari f’Boulogne-​Billancourt, li jinsab fil-​Punent, barra l-​belt kapitali.

Minħabba l-​espansjoni tax-​xogħol taʼ l-​ippridkar tas-​Saltna, fl-​1973 l-​istamperija u d-​dipartiment inkarigat f’li jibgħat l-​affarijiet bil-​baħar ġew ittrasferiti għal Louviers, li tinsab 100 kilometru lejn il-​Punent taʼ Pariġi, fil-​waqt li l-​uffiċċji baqgħu f’Boulogne-​Billancourt. Madankollu, minħabba ż-​żjieda fin-​numru taʼ pubblikaturi fi Franza, il-​faċilitajiet f’Louviers saru inadegwati, minkejja l-​estensjonijiet li saru fl-​1978 u fl-​1985. Għalhekk, ġie deċiż li ssir espansjoni biex il-​familja taʼ Betel tinġieb kollha flimkien f’post wieħed. Dan il-​proġett mhux kulħadd ħa pjaċir bih, bħalma diġà ssemma fil-​bidu. Minkejja din l-​oppożizzjoni, instabet biċċa art li kienet biss kilometru u nofs ’il bogħod mill-​istamperija. Dan ġie segwit minn sitt snin taʼ xogħol iebes, u fl-​aħħar, wara 23 sena taʼ separazzjoni, il-​familja taʼ Betel kollha kemm hi ngħaqdet f’Louviers f’Awissu taʼ l-​1996.

Kien għalhekk li b’ferħ kbir, ġemgħa hienja li kienet tgħodd maʼ l-​1,187 persuna, inklużi t-​300 membru tal-​familja taʼ Betel taʼ Franza, u 329 delegat minn 42 fergħa oħra, inġabret nhar is-​Sibt, 15 taʼ Novembru, 1997, biex tismaʼ t-​taħdita tad-​dedikazzjoni li ngħatat minn Ħuna Lloyd Barry, membru tal-​Ġemgħa li Tiggverna. Madankollu, meta wieħed iqis il-​fatt li din id-​dedikazzjoni kienet qed issir fi żmien taʼ ostilità u waqt li kienet għaddejja kampanja kontinwa taʼ malafama mill-​mezzi tax-​xandir kontra x-​Xhieda taʼ Jehovah maʼ Franza kollha, inħass li x-​Xhieda Franċiżi kollha kellu jkollhom sehem f’li jiċċelebraw din ir-​rebħa. Minħabba f’hekk, nhar il-​Ħadd, 16 taʼ Novembru, ġiet organizzata laqgħa speċjali bit-​tema “Ibqaʼ fl-​Imħabba taʼ Kristu,” fil-​Villepinte Exhibition Center, li jinsab ftit ’il fuq minn Pariġi. Ġew mistednin ix-​Xhieda taʼ Jehovah kollha taʼ Franza flimkien maʼ Xhieda li jitkellmu bil-​Franċiż mill-​Belġju u mill-​Isvizzera, kif ukoll xi kongregazzjonijiet mill-​Britannja, mill-​Ġermanja, mill-​Lussemburgu, u mill-​Olanda.

Laqgħa Storika

Il-​preparazzjonijiet għal-​laqgħa bdew minn sitt xhur qabel. Imbagħad, ħmistax biss qabel id-​dedikazzjoni, is-​sewwieqa tat-​trakkijiet Franċiżi għamlu strajk, u b’hekk imblokkaw it-​toroq ewlenin u l-​provvisti tal-​fjúwil. Kienu se jaslu fil-​ħin is-​siġġijiet u xi tagħmir ieħor li kellu jasal? Kienu r-​rowdblokks se jżommuhom lura lill-​aħwa milli jiġu? B’xorti tajba għal kulħadd, l-​istrajk intemm fi żmien ġimgħa, u t-​toroq reġgħu nfetħu għat-​traffiku. Il-​Ġimgħa fil-​għaxija qabel il-​wikend tad-​dedikazzjoni, ġew użati 38 trakk biex jieħdu 84,000 siġġu fiż-​żewġ swali spazjużi li ġew mikrijin għall-​okkażjoni. Iktar minn 800 ħu u oħt ħadmu bla heda matul il-​lejl sad-​disgħa u nofs tas-​Sibt fil-​għodu biex jinstallaw is-​siġġijiet, il-​pletform, it-​tagħmir tas-​sawnd, u disaʼ vidjo skrins ġganteski.

Il-Ħadd fis-​6:​00 a.m. nfetħu l-​bibien, u l-​folol bdew deħlin. B’kollox kien hemm 17-il ferrovija li nkrew għall-​okkażjoni u dawn ġabu iktar minn 13,000 Xhud lejn il-​belt kapitali. ’Il fuq minn mitejn ħu u oħt lokali kienu fl-​istazzjonijiet tal-​ferrovija biex jilqgħu lill-​vjaġġaturi u biex jakkumpanjawhom fi gruppi lejn il-​post fejn kienet se tinżamm il-​konvenzjoni. Waħda oħt qalet li permezz taʼ dan l-​arranġament taʼ mħabba “ħassewhom siguri u komdi.”

Oħrajn ġew Pariġi bl-​ajruplan jew bil-​karozza. Il-​maġġuranza, iżda, ġew f’953 karozza tal-​linja, fil-​waqt li x-​Xhieda mill-​inħawi taʼ Pariġi wżaw it-​trasport pubbliku biex jivvjaġġaw sa l-​Exhibition Center. Ħafna kienu ilhom jivvjaġġaw il-​lejl kollu jew kienu telqu minn djarhom kmieni ħafna fil-​għodu, imma kulħadd setaʼ jara x’eċċitament kellhom għax kienu se jattendu għal din il-​laqgħa. Ħbieb li kienu ilhom snin ma jaraw lil xulxin bdew jgħajtu bil-​ferħ u jitgħannqu kordjalment x’ħin reġgħu ltaqgħu. Il-​kostumi nazzjonali kkuluriti taw lill-​folla ferriħija dehra internazzjonali. Bla dubju, kienet se tiġri xi ħaġa straordinarja.

Sa ma wasal biex jibda l-​programm, fl–10:00 a.m., ma kienx fadal iktar postijiet vojti, u madankollu, kienu għadhom qed jaslu mijiet taʼ nies kull minuta. Kulfejn tħares, kont tistaʼ tara ħafna wċuħ daħkana. Eluf baqgħu bil-​wieqfa jew inkella qagħdu bil-​qiegħda fuq l-​art tal-​konkos. Fl-​ispirtu tat-​tema taʼ l-​assemblea, ħafna żgħażagħ qagħdu bil-​wieqfa ħalli jkunu jistgħu joqogħdu bil-​qiegħda dawk imdaħħlin fiż-​żmien. “Kemm konna ferħanin li ċedejna postna lil aħwa li ma konniex nafuhom, imma li huma tant għeżież għalina!” kitbet koppja. Ħafna wrew attitudni mill-​aħjar taʼ li jissagrifikaw lilhom infushom: “Qgħadna bil-​wieqfa l-​ġurnata kollha ħdejn is-​siġġijiet li konna għenna biex jiġu rranġati f’posthom il-​Ġimgħa bil-​lejl. Imma l-​fatt biss li konna preżenti, ġagħalna nimtlew bil-​gratitudni lejn Jehovah.”

Minkejja l-​għeja jew l-​iskomdu, id-​delegati qagħdu jisimgħu b’attenzjoni sħiħa r-​rapporti minn pajjiżi oħrajn u t-​taħditiet minn Lloyd Barry u Daniel Sydlik, li huwa wkoll membru tal-​Ġemgħa li Tiggverna. Ħuna Barry żviluppa s-​suġġett “Jehovah Jagħmel is-​Setgħa Sħiħa Toktor,” u enfasizza ferm kif Jehovah bierek lill-​poplu tiegħu b’żjieda minkejja diversi provi. It-​taħdita taʼ Ħuna Sydlik kienet intitolata “Hieni Huwa l-​Poplu li Alla Tiegħu Hu Jehovah!” Iż-​żewġ taħditiet kienu partikolarment f’waqthom meta tqis l-​oppożizzjoni li qed jiffaċċjaw fil-​preżent ix-​Xhieda taʼ Jehovah fi Franza. Ħuna Sydlik wera li l-​hena veru ma jiddependix fuq fatturi esterni imma fuq ir-​relazzjoni tagħna maʼ Jehovah u l-​attitudni tagħna lejn il-​ħajja. Il-​mistoqsija tiegħu lill-​udjenza, “Intom ferħanin?” ġiet imwieġba b’applaws li jtarrxek.

Waħda oħt li kienet “tilfet il-​ferħ tagħha” wara kitbet: “F’daqqa waħda rrealizzajt li kien possibbli għalija li nikseb il-​ferħ. Kont qiegħda nidderieġi l-​isforzi tiegħi ħażin, u permezz taʼ din it-​taħdita, Jehovah wrieni b’liema mod kelli bżonn ninbidel.” Ħu ieħor stqarr: “Issa rrid nissielet biex inferraħ qalb Jehovah. Ma rrid inħalli xejn ineħħili l-​ferħ li qed inħoss fil-​fond taʼ qalbi.”

Hekk kif il-​laqgħa qorbot lejn it-​tmiem, kien b’entużjażmu kbir li ċ-​ċêrmen ħabbar l-​attendenza: 95,888​—l-​akbar laqgħa tax-​Xhieda taʼ Jehovah li qatt saret fi Franza!

Wara l-​għanja taʼ l-​għeluq, li ħafna kantawha bi dmugħ taʼ ferħ f’għajnejhom, u t-​talba taʼ l-​għeluq, l-​aħwa telqu għall-​vjaġġ lura lejn id-​dar b’kull xorta taʼ emozzjonijiet. L-​atmosfera kordjali u taʼ ħbiberija li kien hemm waqt il-​laqgħa kienet xi ħaġa li kulħadd setaʼ jinduna biha. Ix-​xufiera tal-​karozzi tal-​linja għamlu ħafna kummenti pożittivi dwar l-​attitudni tad-​delegati. Baqgħu impressjonati wkoll bl-​organizzar li għamilha possibbli għad-​953 karozza tal-​linja kollha biex jitilqu mill-​Exhibition Center f’temp taʼ sagħtejn mingħajr ma ġġammja t-​traffiku mqar darba! Il-​kondotta tad-​delegati kienet apprezzata ħafna wkoll minn dawk li jaħdmu fuq il-​ferrovija u fit-​trasport pubbliku. Dan irriżulta f’ħafna diskussjonijiet tajbin, u ngħatat xiehda tajba.

“Oasi fid-​Deżert”

L-​appostlu Pawlu ħeġġeġ lill-​Kristjani sħabu: “Naraw kif nistgħu nħajjru lil xulxin għall-​imħabba u għall-​għemil tajjeb. . . . Agħmlu l-​qalb lil xulxin; u dan wisq aktar għandkom tagħmluh, aktar ma taraw li qiegħed joqrob il-​Jum.” (Lhud 10:24, 25) Ċertament, din il-​laqgħa speċjali kienet sors taʼ inkuraġġiment kbir għal kulħadd, “oasi fid-​deżert”, bħalma ddeskrivietha waħda oħt. “Tlaqna minn hemmhekk imsaħħin, inkuraġġiti, mibnijin, u ddeterminati iktar minn qatt qabel biex inkunu ferħanin fis-​servizz taʼ Jehovah,” kitbu l-​aħwa mill-​fergħa taʼ Togo. “Dawk li kienu qalbhom sewda marru d-​dar ferħanin,” qal indokratur tas-​circuit. “L-​aħwa mtlew bil-​ħeġġa u ġew imqanqlin biex jaġixxu,” stqarr ieħor. “Qatt qabel ma konna nħossuna daqshekk qrib taʼ l-​organizzazzjoni taʼ Jehovah,” ġiet imqanqla biex tikteb koppja.

“Jien b’riġli wieqaf fil-​wita; fil-​ġemgħat, Mulej, lilek inbierek,” iddikjara s-​salmista. (Salm 26:12) Laqgħat Kristjani bħal dawn jgħinu lilna lkoll biex nerġgħu nieqfu sodi fuq saqajna spiritwalment meta niffaċċjaw l-​ostakli. “Ikunu x’ikunu t-​tribulazzjonijiet,” ikkonfermat waħda oħt, “dawn il-​mumenti straordinarji ġew imnaqqxin fil-​fond taʼ qalbna u dejjem se jkunu hemm biex ifarrġuna.” Bl-​istess ħsieb f’moħħu, wieħed indokratur li jivvjaġġa kiteb: “Meta niffaċċjaw żminijiet diffiċli, il-​memorja taʼ meta doqna bil-​quddiem kif se tkun il-​Ġenna se tgħinna biex inkampaw magħhom.”

“Agħtu lill-​Mulej, familji tal-​popli, agħtu lill-​Mulej sebħ u qawwa,” iħeġġeġ Salm 96:7. Bla dubju, id-​dedikazzjoni tal-​faċilitajiet ġodda tal-​fergħa fi Franza hija rebħa kbira għal Jehovah li se tibqaʼ tissemma. Hu biss setaʼ għamilha possibbli li jitlesta dan il-​proġett minkejja daqstant oppożizzjoni ddeterminata u mifruxa. Ix-​Xhieda taʼ Jehovah fi Franza huma ddeterminati iktar minn qatt qabel li ‘jibqgħu fl-​imħabba taʼ Kristu’ u li jħallu ‘d-​dawl tagħhom jiddi.’ (Ġwann 15:9; Mattew 5:16) Dawk kollha li attendew għall-​programm tad-​dedikazzjoni jħossuhom eżatt kif ħassu s-​salmista: “Bis-​saħħa tal-​Mulej seħħ dan: ħaġa taʼ l-​għaġeb f’għajnejna.”—Salm 118:23.

[Stampa f’paġna 26]

Lloyd Barry

[Stampa f’paġna 26]

Daniel Sydlik

[Stampa f’paġna 26]

95,888 attendew għall-​programm speċjali fil-​Villepinte Exhibition Center

[Stampi f’paġna 28]

Eluf minn dawk li attendew qagħdu bil-​wieqfa jew bil-​qiegħda fl-​art biex jisimgħu