Mietet Marija b’Kawżi Naturali?

SKOND il-​gazzetta Vatikana L’Osservatore Romano, id-​duttrina Kattolika taʼ l-​Assunzjoni tiddikjara: “Il-​Verġni Immakulata, ħielsa minn kull tebgħa tad-​dnub tan-​nisel, ġiet imtellaʼ bir-​ruħ u l-​ġisem fil-​glorja tas-​sema, wara li ntemmet ħajjitha fid-​dinja.” Dan it-​tagħlim wassal lil xi teologi Kattoliċi biex isostnu li Marija “ma mitetx u li immedjatament ġiet imqajma minn ħajja fid-​dinja għall-​glorja fis-​sema,” tgħid il-​gazzetta.a

Dan l-​aħħar, il-​Papa Ġwanni Pawlu II xeħet dawl differenti fuq din il-​kwistjoni. Fl-​Udjenza Ġenerali fil-​Vatikan nhar il-​25 taʼ Ġunju, 1997, hu qal: “It-​Testment il-​Ġdid ma jipprovdi l-​ebda informazzjoni fuq iċ-​ċirkustanzi tal-​mewt taʼ Marija. Dan is-​silenzju jwassal lil dak li jkun biex jissoponi li din ġrat b’mod naturali, bl-​ebda dettall partikulari taʼ min isemmih. . . . L-​opinjonijiet li jixtiequ jeskluduha minn mewta b’kawżi naturali jidhru li m’għandhomx bażi.”

L-istqarrija tal-​Papa Ġwanni Pawlu tiftaħ xaqq kbir fid-​domma tal-​Kunċizzjoni Immakulata. Jekk omm Ġesù kienet “ħielsa minn kull tebgħa tad-​dnub tan-​nisel,” kif setgħet Marija tmut “b’kawżi naturali” li jirriżultaw mid-​dnub li ġie mgħoddi mill-​midneb Adam? (Rumani 5:12) Din id-​dilemma teoloġika hija minħabba l-​ħarsa mgħawġa li l-​Knisja Kattolika għandha dwar omm Ġesù. M’hix ħaġa kbira, allura, li qamet firda u konfużjoni fuq din il-​kwistjoni fil-​Knisja Kattolika.

Filwaqt li l-​Bibbja tiddeskrivi lil Marija bħala li kienet umlija, leali, u devota, ma tattribwixxix dawn il-​kwalitajiet lil xi “kunċizzjoni immakulata.” (Luqa 1:38; Atti 1:13, 14) Il-​Bibbja tgħid sempliċement: “Il-​bnedmin kollha dinbu u ċċaħħdu mill-​glorja taʼ Alla.” (Rumani 3:23) Iva, Marija wirtet id-​dnub u l-​imperfezzjoni bħall-​bqija taʼ l-​umanità, u m’hemm l-​ebda evidenza li tagħti prova li hi ma mitetx b’kawżi naturali.—Qabbel l-1 Ġwann 1:8-10.

[Nota taʼ taħt]