Min Jaħti?

Ħafna jwaħħlu f’Alla għall-​inkwiet tagħhom. Proverbju tal-​Bibbja jgħid: “Bi bluhatu l-​bniedem jgħarraq ħajtu, u mbagħad jeħodha kontra l-​Mulej.” (Proverbji 19:3) Madankollu, li żżomm lil Alla responsabbli għall-​gwajijiet tal-​bniedem huwa bħallikieku twaħħal f’manifatturier tal-​karozzi għan-​numru kbir t’aċċidenti kkawżati minn sewwieqa xurbana.

Alla ta gwida prezzjuża lill-​umanità fil-​Kelma tiegħu, il-​Bibbja. Billi nistudjaw din il-​librerija divina u ngħixu fi qbil mal-​liġijiet u l-​prinċipji li tpoġġi quddiemna, nistgħu nevitaw ħafna mill-​perikli tal-​ħajja. B’kuntrast, li naġixxu kontra l-​gwida t’Alla huwa diżastruż. Per eżempju, dawk li jieklu żżejjed, ipejpu, jixorbu żżejjed, jew jikkommettu l-​immoralità spiss isofru konsegwenzi traġiċi fis-​saħħa tagħhom. (Luqa 21:34; 1 Korintin 6:18; 2 Korintin 7:1) L-​appostlu Kristjan Pawlu kiteb: “Dak li bniedem jiżra[’], dak huwa jaħsad. Min jiżraʼ f’ġismu jaħsad mill-​ġisem it-​taħsir; min jiżraʼ fl-​ispirtu, jaħsad mill-​ispirtu l-​ħajja taʼ dejjem.”—Galatin 6:7, 8.

Kemm hu aħjar li tgħix fi qbil mal-​liġijiet u l-​prinċipji t’Alla! Jekk nagħmlu hekk, se nesperjenzaw ir-​realtà tal-​wegħda t’Alla mlissna permezz tal-​profeta Isaija: “Jien hu l-​Mulej [“Jehovah,” NW], Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi. Li kieku tajt widen għall-​kmandamenti tiegħi, kien ikun bħal xmara sliemek, u sedqek bħal mewġ tal-​baħar.”—Isaija 48:17, 18.