Qiegħed Int Taħseb Dwar iż-Żwieġ?
Jekk inqabblu l-fenomenu globali tad-divorzju maʼ terremot, l-Istati Uniti tkun l-epiċentru. F’sena reċenti, f’dan il-pajjiż intemmu iktar minn miljun żwieġ—medja taʼ tnejn kull minuta. Imma forsi int konxju li l-Istati Uniti m’hijiex l-uniku post fejn hemm il-problemi taż-żwieġ.
SKOND studju wieħed, ir-rati tad-divorzju fil-Kanada, fl-Ingilterra u f’Wales, fi Franza, fil-Greċja, u fl-Olanda żdiedu iktar mid-doppju mill-1970 ’l hawn.
Għandna kull raġun biex nemmnu li l-biċċa l-kbira tal-koppji jiżżewġu għax iħobbu lil xulxin u jridu jqattgħu l-kumplament taʼ ħajjithom flimkien. B’sogħba, madankollu, il-ħolma taʼ żwieġ ferħan taʼ spiss tagħti prova li tkun preċiżament hekk—ħolma. Malli stenbħu għar-realtà, ħafna qalu li huma żżewġu kmieni wisq jew li żżewġu lill-persuna żbaljata jew it-tnejn li huma.
Għala tant żwiġijiet ifallu? “Ir-raġuni prinċipali hija nuqqas taʼ preparazzjoni,” tgħid l-awtriċi taʼ ktieb dwar in-namur. Hi żżid: “Hekk kif nittratta maʼ koppji li jkunu qed jissaraw maʼ l-inkwiet fiż-żwieġ, inħossni ninħakem minn żewġ sentimenti—il-mogħdrija u r-rabja. Inħoss mogħdrija għax ma jkunux skoprew dak li xtaqu minn relazzjoni sodisfaċenti u reċiproka. Inħoss rabja minħabba l-injoranza tagħhom rigward il-komplessità taʼ dak li daħlu għalih.”
Tabilħaqq, ħafna jidħlu għaż-żwieġ mingħajr lanqas biss ikollhom idea taʼ x’jistgħu jagħmlu biex ikollhom suċċess fiż-żwieġ. Madankollu, m’għandniex għalfejn niskantaw. Wieħed edukatur osserva: “Kemm hemm miż-żgħażagħ tagħna li jattendu l-kulleġġ u jistudjaw dwar l-imġiba tal-ġrieden u l-gremxul, imma ma jitgħallmu xejn dwar l-imġiba taʼ bejn żewġ persuni li jissejħu raġel u mara miżżewġin?”
Qiegħed int taħseb dwar iż-żwieġ—sew jekk forsi żwieġ fil-futur u sew jekk int diġà miżżewweġ? Jekk inhu hekk, għandek tkun konxju li r-relazzjoni fir-realtà hija ferm differenti minn dik li tidher fil-films, fuq it-televixin, u fir-rumanzi. Fl-istess ħin, iż-żwieġ taʼ tnejn min-nies maturi li verament jinħabbu jistaʼ jitqies bħala barka mingħand Alla. (Proverbji 18:22; 19:14) Allura, kif tistaʼ tkun ċert li int ippreparat biex tilħaq il-ħtiġijiet taż-żwieġ? Liema fatturi għandek tikkunsidra meta tkun se tagħżel is-sieħeb jew is-sieħba? Jew jekk int diġà miżżewweġ, kif tistaʼ żżid il-probabbiltà li ssib hena dejjiemi fiż-żwieġ tiegħek?