Sawl Għala Kien Jippersegwita lill-​Kristjani?

‘JIEN DEHERLI LI KELLI nagħmel minn kollox kontra l-​isem taʼ Ġesù taʼ Nazaret. Hekk għamilt f’Ġerusalemm, u bis-​setgħa li tawni l-​qassisin il-​kbar jien tfajt fil-​ħabs ħafna mill-​qaddisin. Meta kienu jaqtgħuhielhom għall-​mewt, jien kont nagħti l-​kunsens tiegħi. Bosta drabi kont naħqarhom fis-​sinagogi kollha. Kont nagħmel minn kollox biex inġagħalhom jiċħdu t-​twemmin tagħhom. B’saħna li ma bħalha kont nippersegwitahom sa fi bliet barranin.’—Atti 26:9-11.

HEKK qal Sawl taʼ Tarsu, magħruf ukoll bħala l-​appostlu Pawlu. M’għandniex xi ngħidu, sakemm wasal iż-​żmien meta qal dan, hu kien sar raġel ġdid. Billi ma kienx għadu opponent tal-​Kristjanità, kien issa wieħed mill-​iktar promoturi ferventi tagħha. Imma x’kien dak li fil-​passat qanqal lil Sawl biex jippersegwita lill-​Kristjani? Għala kien jaħseb li ‘kellu jagħmel’ affarijiet bħal dawn? U nistgħu nisiltu xi lezzjoni mill-​istorja tiegħu?

It-​Tħaġġir taʼ Stiefnu

Sawl jidher għall-​ewwel darba fil-​Bibbja fost dawk li kienu qed joqtlu lil Stiefnu. “Kaxkruh ’il barra mill-​belt [lil Stiefnu] u qabdu jħaġġruh. Ix-​xhieda qiegħdu ħwejjiġhom f’riġlejn żagħżugħ jismu Sawl.” “Sawl kien fehma waħda magħhom fil-​mewt li tawh.” (Atti 7:58; 8:1) X’wassal għal dan l-​attakk? Il-​Lhud, inkluż xi wħud miċ-​Ċiliċja, argumentaw maʼ Stiefnu imma ma kinux kapaċi jirribattu kliemu. Ir-​rakkont ma jgħidx jekk Sawl, li wkoll kien miċ-​Ċiliċja, kienx wieħed minnhom. Kien x’kien il-​każ, huma wżaw xhieda foloz biex lil Stiefnu jakkużawh li kien qed jidgħi u kaxkruh quddiem is-​Sinedriju. (Atti 6:9-14) Din l-​assemblea, li kien jippresiedi fuqha l-​qassis il-​kbir, kienet isservi bħala l-​qorti suprema Lhudija. Billi kienet l-​ogħla awtorità reliġjuża, il-​membri tagħha kienu jipproteġu wkoll dik li huma kienu jemmnu li kienet purità duttrinali. Fl-​opinjoni tagħhom, Stiefnu kien jistħoqqlu l-​mewt. Kellu l-​wiċċ tost li jakkużahom li ma kinux qed josservaw il-​Liġi, hux hekk? (Atti 7:53) Malajr kienu se juruh kif suppost kellha tiġi osservata!

Il-fatt li Sawl kien japprova dik l-​opinjoni kien konsegwenza loġika tal-​konvinzjonijiet tiegħu. Hu kien Fariżew. Din is-​setta b’saħħitha kienet tesiġi osservanza stretta tal-​liġi u t-​tradizzjoni. Kienu jemmnu li l-​Kristjanità kienet l-​antitesi taʼ dawk il-​prinċipji, għax kienet tgħallem mod ġdid taʼ salvazzjoni permezz taʼ Ġesù. Il-​Lhud taʼ l-​ewwel seklu kienu jistennew li l-​Messija kien se jkun Sultan glorjuż li kellu jeħlishom mill-​madmad misħut taʼ dominanza Rumana. Il-​fatt li dak li kien ġie kundannat mis-​Sinedriju l-​Kbir fuq akkuża taʼ dagħa u mbagħad imdendel maʼ zokk bħal xi kriminal misħut setaʼ jkun il-​Messija kien b’hekk assolutament inkompatibbli, inaċċettabbli, u mistmerr għall-​mentalità tagħhom.

Il-Liġi kienet tgħid li raġel li jiġi mdendel maʼ zokk kien is-​“saħta taʼ Alla.” (Dewteronomju 21:22, 23; Galatin 3:13) Mill-​punto di vista taʼ Sawl, “dan il-​kliem b’mod ċar kien japplika għal Ġesù,” jikkummenta Frederick F. Bruce. “Hu kien miet misħut minn Alla, u għalhekk ma setgħux jimmaġinaw kif qatt setaʼ jkun il-​Messija, dak li skond l-​istqarrija kważi sagrosanta, il-​barka t’Alla kellha tissawwab fuqu b’mod uniku. Għalhekk, li xi ħadd isostni li Ġesù kien il-​Messija kienet dagħwa; dawk li kienu jsostnu xi ħaġa assurda bħal din kien jistħoqqilhom isofru taʼ dgħajja li kienu.” Bħalma ammetta Sawl stess iktar tard, l-​istess idea taʼ “Kristu msallab [“msammar maʼ zokk,” NW] [kienet] skandlu għal-​Lhud.”—1 Korintin 1:23.

Ir-reazzjoni taʼ Sawl għal tagħlim bħal dan kienet li jopponih bl-​akbar determinazzjoni possibbli. Kien jeħtieġ li tintuża saħansitra forza brutali sabiex dan it-​tagħlim jiġi eliminat għalkollox. Kien ċert li Alla hekk ried. Meta ddeskriva l-​attitudni li kellu, Sawl qal: “Biż-​żelu li kelli, ippersegwitajt il-​Knisja; għal dik li hi ġustizzja tal-​Liġi, ħadd ma sataʼ jgħid xejn fija.” “Kont nippersegwita bis-​sħiħ il-​Knisja taʼ Alla u nfittex li nħarbatha; u kemm kont ’il quddiem fir-​reliġjon Lhudija fost il-​poplu tiegħi aktar minn sħabi kollha taʼ mpari, mġennen kif kont għat-​tradizzjonijiet taʼ missirijieti.”—Filippin 3:6; Galatin 1:13, 14.

Il-​Protagonist tal-​Persekuzzjoni

Wara l-​mewt taʼ Stiefnu, Sawl ma jidhirx sempliċement bħala xi għodda għall-​persekuzzjoni imma sar il-​perċimes tagħha. Bħala tali, bilfors li sar magħruf mhux ħażin, ladarba saħansitra wara li kkonverta, meta għamel ħiltu biex jingħaqad mad-​dixxipli, “[i]lkoll kienu jibżgħu minnu, għax ma kinux emmnu li tassew ikkonverta.” (Korsiv tagħna.) Meta sar evidenti li hu tassew kien Kristjan, il-​konverżjoni tiegħu saret raġuni għal ferħ u ringrazzjament fost id-​dixxipli, li semgħu, mhux sempliċement li xi ħadd li qabel kien jopponi kien inbidel mil-​lejl għan-​nhar, imma pjuttost, “dak li darba kien jippersegwitana, issa qiegħed ixandar il-​fidi li darba hu ried jeqred.” (Korsiv tagħna.)—Atti 9:26; Galatin 1:23, 24.

Damasku kien xi 220 kilometru​—mixja taʼ sebaʼ jew tmint ijiem—​’il bogħod minn Ġerusalemm. Madankollu, waqt li “kien għadu bil-​qawwa kollha jhedded bil-​mewt lid-​dixxipli,” Sawl mar għand il-​qassis il-​kbir u talbu jagħtih ittri għas-​sinagogi f’Damasku. Għala? Sabiex b’hekk Sawl setaʼ jieħu marbutin lejn Ġerusalemm lil kulmin kien isib minn dawk mexjin fit-​“Triq tal-​Mulej.” B’approvazzjoni uffiċjali, hu beda “jagħmel ħerba mill-​Knisja; kien jidħol minn dar għal oħra, jaqbad irġiel u nisa u jitfagħhom il-​ħabs.” Lil oħrajn kien ‘isawwathom fis-​sinagogi,’ u kien ‘jagħti l-​kunsens (letteralment, “iċ-​ċagħqa tal-​vot”) tiegħu’ biex dawn jinqatlu.—Atti 8:3; 9:1, 2, 14; 22:5, 19; 26:10.

Meta jqisu l-​edukazzjoni li Sawl irċieva taħt Gamaljel u s-​setgħa li kellu dakinhar, xi studjużi jemmnu li kien ipprogressa milli jkun sempliċement student tal-​Liġi sal-​punt li jibda jeżerċita ċerta awtorità fil-​Ġudaiżmu. Per eżempju, wieħed minn dawn issoppona li Sawl għandu mnejn kien sar għalliem f’xi sinagoga f’Ġerusalemm. Madankollu, ma nistgħux inkunu ċerti x’ifisser li Sawl kien ‘jagħti l-​kunsens tiegħu’​—sew jekk kien membru tal-​qorti u sew jekk kien wieħed li jesprimi l-​appoġġ morali tiegħu għall-​qtil tal-​Kristjani.a

Ladarba fil-​bidu l-​Kristjani kollha kienu Lhud jew proseliti Lhud, Sawl mid-​dehra kien tal-​fehma li l-​Kristjanità kienet xi moviment apostat fi ħdan il-​Ġudaiżmu, u kien jikkunsidraha responsabbiltà tal-​Ġudaiżmu uffiċjali li jikkoreġi lis-​segwaċi tiegħu. “M’huwiex probabbli,” jgħid l-​istudjuż Arland J. Hultgren, “li Pawlu l-​persekutur kien se jopponi l-​Kristjanità għaliex kien iqisha bħala reliġjon li ma kellhiex x’taqsam mal-​Ġudaiżmu, xi kompetitriċi. Il-​moviment Kristjan x’aktarx li kemm hu u kemm oħrajn kienu jqisuh li xorta kien għadu suġġett għall-​awtorità Lhudija.” L-​intenzjoni tiegħu dak iż-​żmien kienet li jisforza lil Lhud taʼ rashom iebsa biex jirrinunzjaw it-​twemmin tagħhom u jerġgħu lura għall-​ortodossija, billi jużaw il-​mezzi kollha li kellhom disponibbli. (Atti 26:11) Mezz wieħed li setaʼ jagħżel kien il-​priġunerija. Ieħor kien is-​swat fis-​sinagogi, mezz komuni taʼ dixxiplina li setaʼ jingħata bħala kastig għad-​diżubbidjenza kontra l-​awtorità rabbinika fi kwalunkwe qorti lokali taʼ tliet imħallfin.

M’għandniex xi ngħidu, wara li Ġesù deher lil Sawl fit-​triq lejn Damasku, dan kollu ġie fi tmiemu. Minn għadu kiefer tal-​Kristjanità, Sawl f’daqqa waħda sar difensur ferventi tagħha, u f’qasir żmien il-​Lhud f’Damasku bdew ifittxu li joqtlu lilu. (Atti 9:1-23) X’paradoss! Bħala Kristjan, Sawl kellu jsofri ħafna affarijiet li hu stess kien ikkastiga lil oħrajn bihom meta kien persekutur, sabiex b’hekk snin wara setaʼ jgħid: “Ħames darbiet qlajt mingħand il-​Lhud l-​erbgħin daqqa neqsin waħda.”—2 Korintin 11:24.

Iż-​Żelu Jistaʼ Jintwera għal Skop Ħażin

“Qabel kont dagħaj, persekutur u żeblieħi,” kiteb Sawl wara l-​konverżjoni tiegħu, meta kien magħruf aħjar bħala Pawlu. “Iżda sibt il-​ħniena, għax dak li għamilt għamiltu bla ma kont naf, billi kont għadni bla fidi.” (1 Timotju 1:13) Għalhekk, li wieħed ikun sinċier u attiv fir-​reliġjon tiegħu m’huwiex garanzija li hu jkollu l-​approvazzjoni t’Alla. Sawl kien żeluż u kien jaġixxi skond il-​kuxjenza, imma dan ma ġġustifikahx. Iż-​żelu jaħraq tiegħu kien qed jintwera għal skop ħażin. (Qabbel Rumani 10:2, 3.) Dan għandu jġagħalna nirriflettu.

Ħafna llum huma konvinti bis-​sħiħ illi kulma Alla jirrikjedi minnhom hu li jkollhom kondotta tajba. Imma huwa dan minnu? Kull individwu jagħmel tajjeb li jagħti widen għall-​eżortazzjoni taʼ Pawlu: “Kunu żguri mill-​affarijiet kollha; żommu sodi maʼ dak li hu mill-​aħjar.” (1 Tessalonkin 5:21, NW) Dan ifisser li wieħed jieħu l-​ħin biex jikseb għarfien eżatt tal-​Kelma t’Alla taʼ verità u mbagħad jgħix ħajtu f’armonija sħiħa magħha. Jekk aħna u neżaminaw il-​Bibbja nirrealizzaw li għandna xi bidliet x’nagħmlu, allura ċertament li għandna nagħmluhom mill-​iktar fis possibbli. Forsi ftit huma dawk fostna li qatt kienu dgħajja, persekuturi jew żeblieħa daqs Sawl. Minkejja dan, huwa biss billi naġixxu skond il-​fidi u l-​għarfien eżatt li, bħal Pawlu, inkunu nistgħu naqilgħu l-​favur t’Alla.—Ġwann 17:3, 17.

[Nota taʼ taħt]