Nithennew f’Dak Alla tas-Salvazzjoni Tagħna
“Jien xorta waħda nifraħ fil-Mulej, nithenna f’Alla, is-salvazzjoni tiegħi!”—ĦABAKKUK 3:18.
1. Danjel dwar liema ħaġa kellu viżjoni qabel il-waqgħa taʼ Babilonja fis-sena 539 Q.E.K.?
IKTAR minn għaxar snin qabel il-waqgħa taʼ Babilonja fis-sena 539 Q.E.K., il-profeta xwejjaħ Danjel ra viżjoni eċċitanti. Din bassret il-ġrajjiet dinjin li jwasslu preċiżament sal-gwerra konklużiva bejn l-għedewwa taʼ Jehovah u s-Sultan maħtur Tiegħu, Ġesù Kristu. X’kienet ir-reazzjoni taʼ Danjel? Hu qal: “Ħassni ħażin. . . . Id-dehra li kelli nixxfitni.”—Danjel 8:27.
2. Danjel liema konflitt ra fil-viżjoni, u int kif tħossok dwar il-fatt li dan huwa qrib?
2 Xi ngħidu għalina? Issa dħalna bil-wisq iktar fil-fond fil-medda tas-snin. Kif nirreaġixxu meta nirrealizzaw li l-konflitt li ra Danjel fil-viżjoni—il-gwerra t’Armageddon—qiegħed qrib ferm? Kif inwieġbu meta nindunaw li l-ħażen li hu rivelat fil-profezija taʼ Ħabakkuk hu tant mifrux li l-qerda taʼ l-għedewwa t’Alla hija inevitabbli? X’aktarx li s-sentimenti tagħna huma bħal dawk taʼ Ħabakkuk innifsu, kif deskritti fit-tielet kapitlu tal-ktieb profetiku tiegħu.
Ħabakkuk Jitlob il-Ħniena t’Alla
3. Ħabakkuk għan-nom taʼ min talab, u kliemu kif jistaʼ jeffettwa lilna?
3 Ħabakkuk kapitlu 3 huwa talba. Skond l-ewwel vers, din hi espressa f’forma taʼ għanjiet funebri, għanjiet taʼ niket jew lamentazzjoni. It-talba tal-profeta tiġi offruta bħallikieku kienet għalih innifsu. Iżda fir-realtà, Ħabakkuk qed jitkellem għan-nom tal-ġens magħżul t’Alla. Illum, din it-talba għandha tifsira kbira għan-nies t’Alla, li qed jieħdu sehem fix-xogħol taʼ l-ippridkar tas-Saltna. Meta naqraw Ħabakkuk kapitlu 3 b’dan f’moħħna, il-kliem tiegħu jimliena b’ċertu biżaʼ minħabba dak li se jseħħ, però jimliena wkoll bil-ferħ. It-talba, jew l-għanja taʼ niket, taʼ Ħabakkuk tagħtina raġuni qawwija biex nithennew f’Jehovah, dak Alla tas-salvazzjoni tagħna.
4. Ħabakkuk għala sar beżgħan, u aħna dwar liema eżerċitar tal-qawwa t’Alla nistgħu nkunu ċerti?
4 Bħalma nnotajna fiż-żewġ artikli taʼ qabel, il-kundizzjonijiet fl-art taʼ Ġuda fi żmien Ħabakkuk kienu ħżiena ferm. Imma Alla ma kienx se jippermetti li din is-sitwazzjoni tkompli sejra. Jehovah kien se jieħu azzjoni, bħalma kien għamel fil-passat. Mhux taʼ b’xejn li l-profeta għajjat: “Mulej, waslet f’widnejja l-fama tiegħek, mill-għemil tiegħek jiena bżajt, Mulej”! X’ried ifisser? ‘Il-fama tal-Mulej’ kienet l-istorja dokumentata taʼ l-għemejjel setgħana t’Alla, bħal dawk fil-Baħar l-Aħmar, fix-xagħri, u f’Ġeriko. Dawn l-atti Ħabakkuk kien jafhom tajjeb, u ġagħluh jibżaʼ għax kien jaf li Jehovah kien se jerġaʼ juża l-qawwa kbira tiegħu kontra l-għedewwa tiegħu. Meta naraw il-ħażen taʼ l-umanità llum, aħna wkoll nafu li Jehovah se jaġixxi bħalma kien għamel fi żmien il-qedem. Iġagħalna dan inħossuna beżgħanin? Dażgur! Xorta waħda, aħna nitolbu bħalma talab Ħabakkuk: “F’nofs is-snin ġeddu; f’nofs is-snin għarrfu; fil-għadab ftakar fil-ħniena.” (Ħabaqquq 3:2, Saydon) Fiż-żmien imwaqqat t’Alla “f’nofs is-snin,” jalla jieħu azzjoni billi juża l-qawwa mirakoluża tiegħu. U f’dak iż-żmien, jalla jiftakar biex juri ħniena maʼ dawk li jħobbuh!
Jehovah Qiegħed Jimmarċja!
5. Kif inhu li ‘Alla ġie minn Teman,’ u dan x’jindika rigward Armageddon?
5 X’se jiġri meta Jehovah jismaʼ t-talba tagħna biex jurina ħniena? It-tweġiba nsibuha f’Ħabakkuk 3:3, 4. L-ewwel, il-profeta jgħid: “Alla ġej minn Teman, mill-muntanja Faran ġej il-Qaddis.” Lura fi żmien Mosè, Teman u Faran kienu fir-rotta li ħa l-poplu taʼ Iżrael fi triqtu lejn Kangħan minn ġox-xagħri. Hekk kif il-ġens kbir taʼ Iżrael kien qed jivvjaġġa fi triqtu, kien bħallikieku Jehovah nnifsu kien għaddej, u xejn ma setaʼ jwaqqfu. Ftit qabel ma miet, Mosè qal: “Ġie l-Mulej minn Sinaj, u deher minn Segħir lilna, idda minn ġebel Faran; mexa fost l-eluf imqaddsa [t’anġli].” (Dewteronomju 33:2, Saydon) Meta Jehovah jaġixxi kontra l-għedewwa tiegħu f’Armageddon, se jkun hemm wirja simili tal-qawwa irreżistibbli tiegħu.
6. Il-Kristjani li għandhom id-dehen x’jaraw minbarra l-glorja t’Alla?
6 Ħabakkuk jistqarr ukoll: ‘Sebħ [Jehovah] jiksi s-smewwiet, foħritu timla l-art. Dijietu qisha dawl ix-xemx.’ Xi spettaklu manjifiku! Veru, il-bnedmin ma jistgħux jaraw lil Alla Jehovah u jibqgħu ħajjin. (Eżodu 33:20) Madankollu, inkwantu għall-qaddejja leali t’Alla, l-għajnejn taʼ qlubhom jiddawlu meta jikkontemplaw fuq il-kobor manjifiku tiegħu. (Efesin 1:18) U Kristjani li għandhom id-dehen jaraw xi ħaġa oħra minbarra l-glorja taʼ Jehovah. Ħabakkuk 3:4 jikkonkludi: “Minn idu jleħħu r-raġġi: hemmhekk tinsab moħbija l-qawwa tiegħu.” Iva, naraw li Jehovah lest biex jaġixxi, billi juża idu l-leminija setgħana u qawwija.
7. Il-marċ trijonfali t’Alla x’ifisser għal dawk li jirribellaw kontrih?
7 Il-marċ trijonfali t’Alla jfisser diżastru għal dawk li jirribellaw kontrih. Ħabakkuk 3:5 jgħid: “Quddiemu timxi l-pesta, u wara passih jiġi d-deni.” Fl-1473 Q.E.K., meta l-Iżraeliti kienu qrib il-konfini taʼ l-Art Imwegħda, ħafna minnhom irribellaw billi bdew jikkommettu l-immoralità u l-idolatrija. B’riżultat taʼ dan, iktar minn 20,000 mietu b’pesta mibgħuta minn Alla. (Numri 25:1-9) Fil-futur qarib, meta Jehovah jimmarċja lejn il-“gwerra taʼ nhar il-Jum il-kbir taʼ Alla li jistaʼ kollox,” dawk li jirribellaw kontrih se jsofru b’mod simili għad-dnubiet tagħhom. Xi wħud għandhom mnejn saħansitra jmutu b’pesta letterali.—Apokalissi 16:14, 16.
8. Skond Ħabakkuk 3:6, x’hemm maħżun għall-għedewwa t’Alla?
8 Ismaʼ issa d-deskrizzjoni grafika tal-profeta dwar Jehovah taʼ l-eżerċti fl-azzjoni. F’Ħabakkuk 3:6 naqraw: “[Alla Jehovah] jieqaf, u jriegħed l-art, iħares, u jkexkex il-ġnus: mbagħad il-muntanji dejjiema jitqanqlu minn posthom, l-għoljiet taʼ żmien il-qedem jitbaxxew, triqatu sa minn dejjem.” L-ewwel, Jehovah “jieqaf,” bħal xi ġeneral li jkun qed jissorvelja l-kamp tal-battalja. L-għedewwa tiegħu jirtogħdu bil-biżaʼ. Huma jaraw min hu l-avversarju tagħhom u jibqgħu xxokkjati, jaqbżu bl-aġitazzjoni. Ġesù bassar dwar iż-żmien meta l-“popli kollha taʼ l-art jibdew jagħtu fuq sidirhom.” (Mattew 24:30) Se jkun tard wisq meta huma jirrealizzaw li ħadd ma jistaʼ jieqaf kontra Jehovah. L-organizzazzjonijiet umani—saħansitra dawk li jidhru permanenti daqs “il-muntanji dejjiema” u “l-għoljiet taʼ żmien il-qedem”—se jitfarrku. Dan se jkun bħal ‘triqat [Alla] sa minn dejjem,’ bħall-mod li bih aġixxa fi żmien il-qedem.
9, 10. Dwar liema ħaġa jfakkarna Ħabakkuk 3:7-11?
9 “Il-korla” taʼ Jehovah ‘xegħlet’ kontra l-għedewwa tiegħu. Imma liema huma l-armamenti li hu se juża f’din il-gwerra kbira? Ismaʼ hekk kif il-profeta jiddeskrivihom waqt li jgħid: “Terfaʼ l-qaws tiegħek għeri, . . . [“skond il-ħalfa lit-tribujiet, iva, imqar kelmtek,” KŻ]. Int tofroq l-art bix-xmajjar, jilmħuk il-muntanji, u jitheżhżu; jitqalleb l-ilma b’saħħa kbira u jgħaddi; jgħajjat l-abbiss [“bl-ilma,” NW] u jerfaʼ jdejh fl-għoli. Ix-xemx u l-qamar waqfu f’posthom, ħarbu kif raw ileħħu l-vleġeġ tiegħek, u l-lanza tiegħek toħroġ dawl li jgħammex.”—Ħabakkuk 3:7-11.
10 Fi żmien Ġożwè, Jehovah ġagħal ix-xemx u l-qamar jibqgħu bla ma jiċċaqalqu f’turija taʼ l-għaġeb taʼ qawwa. (Ġożwè 10:12-14) Il-profezija taʼ Ħabakkuk tfakkarna li din l-istess qawwa se tintuża minn Jehovah f’Armageddon. Fl-1513 Q.E.K., Jehovah wera li hu l-padrun fuq l-abbiss taʼ l-ilma meta uża l-Baħar l-Aħmar biex jeqred lill-eżerċti tal-Fargħun. Erbgħin sena wara, ix-xmara Ġordan li kienet mimlija sax-xifer ma kienet taʼ ebda ostaklu għall-marċ trijonfanti taʼ Iżrael għal ġo l-Art Imwegħda. (Ġożwè 3:15-17) Fi żmien il-profetessa Debora, xita bil-qliel kaxkret il-karrijiet taʼ Sisera, l-għadu taʼ Iżrael. (Mħallfin 5:21) Dawn l-istess forzi t’għargħar, xita bil-qliel, u abbiss bl-ilma se jkunu għad-dispożizzjoni taʼ Jehovah f’Armageddon. Ir-ragħad u s-sajjetti wkoll qegħdin f’idu, bħal lanza jew barżakka mimlija vleġeġ.
11. X’se jiġri meta Jehovah jisfoga l-qawwa kbira tiegħu?
11 Verament, se tkun xi ħaġa li tqanqal il-biżaʼ meta Jehovah jisfoga l-qawwa kbira tiegħu. Kliem Ħabakkuk jissuġġerixxi li l-lejl se jsir nhar u n-nhar se jkun jgħammex iktar milli qatt tistaʼ ġġagħlu jkun ix-xemx. Sew jekk din id-deskrizzjoni profetika mnebbħa t’Armageddon hija letterali u sew jekk hi simbolika, ħaġa waħda hija ċerta—Jehovah se jittrijonfa, billi ma jħalli lil ebda għadu jeħlisha.
Salvazzjoni Ċerta għan-Nies t’Alla!
12. Alla x’se jagħmlilhom lill-għedewwa tiegħu, imma min se jiġi salvat?
12 Il-profeta jkompli jiddeskrivi liema azzjonijiet se jieħu Jehovah biex jeqred lill-għedewwa Tiegħu. F’Ħabakkuk 3:12 naqraw: “Int b’korla fuqek tgħaddi minn nofs l-art, u tgħaffeġ b’saħna l-ġnus.” Xorta waħda, Jehovah m’huwiex se jeqred bl-addoċċ. Xi bnedmin se jsalvaw. “Int ħriġt sabiex issalva l-poplu tiegħek, issalva l-midluk tiegħek,” jgħid Ħabakkuk 3:13. Iva, Jehovah se jsalva lill-qaddejja midlukin leali tiegħu. Il-qerda fuq Babilonja l-Kbira, l-imperu dinji taʼ reliġjon falza, imbagħad se tkun kompluta. Madankollu, illum il-ġnus qed jipprovaw jeqirdu l-qima pura għalkollox. Dalwaqt, il-qaddejja taʼ Jehovah se jiġu attakkati mill-forzi taʼ Gog taʼ Magog. (Eżekjel 38:1–39:13; Apokalissi 17:1-5, 16-18) Se jirnexxi dan l-attakk Sataniku? Le! Jehovah mbagħad se jisħaq b’rabja lill-għedewwa tiegħu, billi jitħanhom taħt saqajh bħal qamħ fuq l-andar. Imma hu se jsalva lil dawk li jqimuh bl-ispirtu u l-verità.—Ġwann 4:24.
13. Ħabakkuk 3:13 kif se jitwettaq?
13 Il-qerda totali taʼ dawk mill-agħar hija mbassra f’dan il-kliem: “Int [Jehovah] kissirt f’biċċiet lill-kap mid-dar tal-wieħed mill-agħar. Kien hemm kxif tal-pedament, dritt sa l-għonq.” (Ħabakkuk 3:13, NW) Din id-“dar” hija s-sistema mill-agħar li żviluppat taħt l-influwenza taʼ Satana x-Xitan. Din se titfarrak. Il-“kap,” jew mexxejja taʼ kontra Alla, se jitkissru. L-istruttura kollha kemm hi se tiġġarraf sal-pedament tagħha. M’hijiex se teżisti iktar. X’serħan taʼ l-għaġeb se jkun dan!
14-16. Skond Ħabakkuk 3:14, 15, x’se jiġrilhom in-nies taʼ Jehovah u l-għedewwa tagħhom?
14 F’Armageddon, dawk li jkunu qed jipprovaw jeqirdu l-“midluk” taʼ Jehovah se jsibu ruħhom f’konfużjoni sħiħa. Skond Ħabakkuk 3:14, 15, il-profeta jkellem lil Alla billi jgħidlu: “Nfidt bix-xettru tiegħek ras il-gwerriera tiegħu, li nxteħtu fuqi b’ferħ biex jeqirduni, bħallikieku biex jibilgħu ’l min hu msejken, f’xi mkien fis-satra. Għaddejt biż-żwiemel tiegħek fuq il-baħar, fuq it-tqalligħ taʼ l-ilmijiet kotrana.”
15 Meta Ħabakkuk jgħid “gwerriera . . . nxteħtu fuqi b’ferħ biex jeqirduni,” il-profeta qed jitkellem għall-qaddejja midlukin taʼ Jehovah. Bħal ħalliel mistoħbi biex jaqbeż fuq xi ħadd, il-ġnus se jaqbżu fuq l-adoraturi t’Alla biex jeqirduhom. Dawn l-għedewwa t’Alla u tal-poplu tiegħu se jħossuhom ‘ferħanin’ ferm, fiduċjużi li se jirnexxu. Il-Kristjani leali se jidhru dgħajfin, bħal xi “msejken.” Imma meta l-forzi taʼ kontra Alla jibdew jattakkaw, Jehovah jġagħalhom idawru l-armamenti tagħhom għal kontra xulxin. L-armi, jew ix-“xettri,” tagħhom se jużawhom kontra l-gwerriera tagħhom stess.
16 Il-kbir għadu ġej. Jehovah mbagħad se juża forzi spirti ferm iktar potenti mill-bnedmin biex il-qerda taʼ l-għedewwa tiegħu tkun kompluta. Biż-“żwiemel” taʼ l-eżerċti tiegħu tas-sema mmexxijin minn Ġesù Kristu, hu se javanza ’l quddiem rebbieħ minn fuq il-“baħar” u “t-tqalligħ taʼ l-ilmijiet kotrana,” jiġifieri, il-massa mqanqla taʼ l-umanità bħala għadu. (Apokalissi 19:11-21) Imbagħad dawk mill-agħar se jitneħħew mill-art. X’wirja impressjonanti taʼ qawwa u ġustizzja divini!
Il-Jum taʼ Jehovah Ġej!
17. (a) Għala jistaʼ jkollna fiduċja sħiħa fit-twettiq taʼ kliem Ħabakkuk? (b) Kif nistgħu aħna nkunu bħal Ħabakkuk hekk kif nistennew il-jum il-kbir taʼ Jehovah?
17 Nistgħu nkunu żguri li kliem Ħabakkuk dalwaqt se jitwettaq. M’huwiex se jiddawwar. Int kif tirreaġixxi għal dan l-għarfien bil-quddiem? Ftakar li Ħabakkuk kien qed jikteb taħt ispirazzjoni divina. Jehovah se jaġixxi, u se jkun hemm straġi sħiħa fuq l-art meta dan jiġri. Mhux taʼ b’xejn li l-profeta kiteb: “Jien smajt, u żaqqi bdiet tkun aġitata; mal-ħoss xofftejja triegħdu; taħsir beda jidħol f’għadmi; u fis-sitwazzjoni tiegħi kont aġitat, sabiex nistenna bil-kwiet il-jum taʼ niket, għall-miġja tiegħu għand in-nies, biex jistaʼ jattakkahom.” (Ħabakkuk 3:16, NW) Ħabakkuk tgħidx kemm kien aġitat—u bir-raġun. Imma ddgħajfet il-fidi tiegħu? Bl-ebda mod! Hu kien lest li jistenna bil-kwiet għall-jum il-kbir taʼ Jehovah. (2 Pietru 3:11, 12) M’hijiex din l-attitudni tagħna wkoll? Dażgur li hi! Għandna fidi sħiħa li l-profezija taʼ Ħabakkuk se titwettaq. Madankollu, sakemm din titwettaq, aħna nistennew bil-paċenzja.
18. Għalkemm Ħabakkuk stenna li jkun hemm it-tbatijiet, x’kienet l-attitudni tiegħu?
18 Il-gwerra dejjem iġġib magħha t-tbatija, saħansitra għal dawk li jkunu se jirbħuha. Għandu mnejn jiskarsa l-ikel. Jistaʼ jkun hemm telf taʼ propjetà. Il-livelli taʼ l-għajxien għandhom mnejn jitbaxxew. Jekk dan jiġri lilna, kif se nirreaġixxu? Ħabakkuk kellu attitudni eżemplari, għax hu qal: “[I]mqar jekk ebda nwar ma trodd it-tina, u xejn ma jagħtu d-dwieli u l-frott tas-siġar taż-żebbuġ iqarraq, u r-rabaʼ xejn ma jibqaʼ jrodd għall-ikel, u l-merħla tgħib mill-mandra, u bhejjem ma jkunx hemm fl-istalel tagħhom jien xorta waħda nifraħ fil-Mulej, nithenna f’Alla, is-salvazzjoni tiegħi!” (Ħabakkuk 3:17, 18) Billi kien realistiku, Ħabakkuk stenna li jkun hemm it-tbatijiet, forsi anki l-ġuħ. Xorta waħda, hu qatt ma tilef il-ferħ tiegħu f’Jehovah, li minnu ġiet is-salvazzjoni tiegħu.
19. Liema tbatijiet jeżistu għal ħafna Kristjani, imma dwar liema ħaġa nistgħu nibqgħu ċerti jekk inpoġġu lil Jehovah l-ewwel f’ħajjitna?
19 Illum, anki qabel il-gwerra taʼ Jehovah kontra dawk mill-agħar, ħafna jgħaddu minn inkwiet kbir ħafna. Ġesù bassar li l-gwerer, il-ġuħ, it-terremoti, u l-pesti kellhom ikunu parti mis-‘sinjal tal-preżenza tiegħu’ (NW) f’qawwa rjali. (Mattew 24:3-14; Luqa 21:10, 11) Ħafna minn sħabna fit-twemmin jgħixu f’pajjiżi li ntlaqtu sewwa mit-twettiq taʼ kliem Ġesù, u qed isofru tbatijiet kbar b’riżultat taʼ dan. Kristjani oħrajn jistgħu jiġu effettwati b’mod simili fil-futur. Għal ħafna iktar minn fostna, hemm il-possibbiltà li ‘t-tina ma troddx inwar’ qabel ma jiġi t-tmiem. Madankollu, aħna nafu għala qed jiġru dawn l-affarijiet, u dan isaħħaħna. Iktar minn hekk, aħna għandna l-appoġġ. Ġesù wiegħed: “Mela fittxu l-ewwel is-Saltna u l-ġustizzja taʼ Alla, u dan kollu jingħatalkom ukoll.” (Mattew 6:33) Dan ma jiggarantix ħajja komda, però jassigurana li jekk inpoġġu lil Jehovah l-ewwel f’ħajjitna, hu se jindokrana.—Salm 37:25.
20. Minkejja t-tbatijiet temporanji li niffaċċjaw, x’għandna nkunu determinati li nagħmlu?
20 Ikunu x’ikunu t-tbatijiet temporanji li jkollna niffaċċjaw, m’aħniex se nitilfu l-fidi fil-qawwa li Jehovah għandu biex isalvana. Ħafna minn ħutna rġiel u nisa fl-Afrika, fl-Ewropa tal-Lvant, u f’postijiet oħrajn ikollhom jiffaċċjaw tbatijiet kbar ħafna, imma jibqgħu ‘jifirħu fil-Mulej.’ Jalla aħna wkoll qatt ma nieqfu milli nagħmlu bħalhom. Ftakar li l-Mulej Sovran Jehovah hu s-Sors tagħna taʼ “qawwa.” (Ħabakkuk 3:19) Hu m’huwiex se jiddiżappuntana. Armageddon ġejja żgur, u d-dinja l-ġdida mwegħda minn Alla ċertament li se ssegwiha. (2 Pietru 3:13) Imbagħad “l-art kollha kemm hi għad tagħraf sewwa l-glorja tal-Mulej, bħalma hu miksi l-baħar bl-ilmijiet!” (Ħabakkuk 2:14) Sakemm jasal dak iż-żmien meraviljuż, ejja nsegwu l-eżempju tajjeb taʼ Ħabakkuk. Ejja dejjem ‘nifirħu fil-Mulej u nithennew f’dak Alla tas-salvazzjoni tagħna.’
Tiftakar Int?
• It-talba taʼ Ħabakkuk kif tistaʼ teffettwana?
• Jehovah għala jibda jimmarċja?
• X’tgħid il-profezija taʼ Ħabakkuk dwar is-salvazzjoni?
• B’liema attitudni għandna aħna nistennew il-jum il-kbir taʼ Jehovah?
[Stampa f’paġna 23]
Taf int liema forzi se juża Alla kontra dawk mill-agħar f’Armageddon?