Proklamaturi tas-​Saltna Jirrapportaw

KEMM jieħu gost vjaġġatur għajjien x’ħin jilmaħ post imdelli taʼ mistrieħ fil-​mogħdija fuq xi muntanja! Fin-​Nepal, dawn il-​postijiet taʼ mistrieħ jissejħu chautara. Wieħed minn dawn iċ-​chautara jistaʼ jinstab ħdejn xi siġra tħaddar tal-​banyan (Ficus Bengalensis), post imdelli fejn wieħed jistaʼ jpoġġi u jistrieħ. Min jipprovdi chautara jkun qed jagħmel att taʼ karità, u ħafna mill-​benefatturi jibqgħu anonimi.

Xi esperjenzi min-​Nepal juru kif ħafna “vjaġġaturi” għajjenin f’din is-​sistema sabu li Alla Jehovah sar Sors taʼ ferħ u taʼ rifreskar spiritwali għalihom.—Salm 23:2.

• Waħda mara li jisimha Lil Kumari tgħix fil-​belt sabiħa taʼ Pokhara, li minnha tistaʼ tara dehra li ssaħħrek tal-​Muntanji tal-​Himalaya bil-​quċċata tagħhom miksija bis-​silġ. Imma billi kienet inkwetata dwar il-​finanzi tal-​familja, Lil Kumari kienet tħoss li ma tantx kien hemm futur sabiħ għaliha. Meta waħda mix-​Xhieda taʼ Jehovah marret għandha, tgħidx kemm ħassitha mqanqla bit-​tama sabiħa tal-​Bibbja u mill-​ewwel talbet biex ikollha studju tal-​Bibbja fid-​dar tagħha.

Għalkemm Lil Kumari kienet tieħu gost tistudja, ma kienx faċli għaliha minħabba li kellha oppożizzjoni kbira mill-​familja tagħha. Imma ma qatgħetx qalbha. Bdiet tattendi l-​laqgħat Kristjani regolarment u applikat dak li kienet qed titgħallem, speċjalment fuq il-​kwistjoni tas-​sottomissjoni bħala mara miżżewġa. B’riżultat taʼ dan, ir-​raġel tagħha u ommha bdew jindunaw li l-​istudju tal-​Bibbja taʼ Lil Kumari kien qed ikun taʼ benefiċċju għall-​familja kollha.

Ir-raġel tagħha u xi ftit mill-​qraba issa qed jistudjaw il-​Kelma t’Alla. F’assemblea reċenti li saret f’Pokhara, Lil Kumari ħadet gost issegwi l-​programm flimkien maʼ 15 oħra minn qrabatha. Hi tgħid: “Dari saret post taʼ mistrieħ għaliex il-​familja tagħna issa hija magħquda fil-​qima vera, u jien sibt il-​vera paċi tal-​moħħ.”

• Għalkemm id-​diskriminazzjoni minħabba l-​klassi soċjali hija illegali fin-​Nepal, din xorta għadu jkollha influwenza kbira fuq il-​mod t’għajxien tan-​nies. Minħabba f’hekk, ħafna huma dawk interessati f’dak li tgħid il-​Bibbja dwar l-​ugwaljanza u l-​imparzjalità. Meta Surya Maya u l-​familja tagħha saru jafu li “Alla ma jħares lejn wiċċ ħadd,” dan tant biddlilhom ħajjithom.—Atti 10:34.

Surya Maya kellha qalbha sewda minħabba d-​diskriminazzjoni soċjali u t-​tagħbija taʼ tradizzjonijiet u drawwiet li tant kellhom l-​għeruq fil-​fond. Peress li kienet mara devota, Surya Maya kienet ilha snin sħaħ titlob lill-​allat idoli tagħha biex jgħinuha. Imma t-​talb tagħha qatt ma ġie mwieġeb. Darba minnhom meta kienet b’qalba maqsuma titlob għall-​għajnuna, in-​neputija tagħha taʼ sitt snin, li kien jisimha Babita, resqet lejha u staqsietha: “Għala qed titlob l-​għajnuna taʼ idoli li ma jistgħu jagħmlu xejn?”

Ġara li omm Babita kienet qed tistudja l-​Bibbja maʼ waħda mix-​Xhieda taʼ Jehovah. Babita b’ħeġġa kbira stiednet lil nannitha biex tattendi laqgħa Kristjana. Meta Surya Maya marret għal-​laqgħa, tgħidx kif baqgħet iċċassata meta rat nies taʼ kull klassi soċjali jieħdu gost bil-​kumpanija taʼ xulxin mingħajr ebda preġudizzju. Mill-​ewwel talbet biex ikollha studju tal-​Bibbja fid-​dar tagħha. Għalkemm dan wassal biex il-​ġirien tagħha ħaduha kontriha, hi ma qatgħetx qalbha. Lanqas il-​fatt li ma tantx kienet taf taqra u tikteb ma żammha lura milli tagħmel progress spiritwali.

Issa għaddew tmien snin, u sitt membri oħra tal-​familja tagħha, inkluż ir-​raġel u t-​tlett itfal tagħha, saru Xhieda taʼ Jehovah. Surya Maya issa qed taqdi bħala ministru full-time, pijuniera regulari, u qegħda bil-​ferħ tgħin lil oħrajn iħaffu t-​tagħbija tqila tagħhom fil-​post veru taʼ mistrieħ li Jehovah biss jistaʼ jipprovdi.