Għala Għandek Tikkultiva l-​Virtù?

RAĠEL Ġappuniż taʼ mezz’età li jismu Kunihito dan l-​aħħar emigra lejn l-​Istati Uniti.a Ftit ġimgħat wara li wasal hemm, ġie wiċċ imbwiċċ maʼ sitwazzjoni li setgħet tirvinalu l-​karriera. Jirrakkonta Kunihito: “Meta dak taʼ fuqi staqsieni jekk stajtx nerfaʼ ċerta responsabbiltà, ħassejtni kunfidenti ħafna li stajt naċċettaha. Madankollu, billi minn mindu kont żgħir għallmuni li l-​modestja hija virtù, jien weġibt: ‘M’iniex ċert jekk nistax naċċettaha, imma nagħmel l-​almu tiegħi.’ B’dan, is-​supervisor Amerikan tiegħi ħa l-​impressjoni li ma kontx kapaċi biżżejjed u ma kellix kunfidenza. Meta sirt naf dan, irrealizzajt li kelli bżonn nagħmel xi aġġustamenti.”

Maria, li tgħix fil-​Belt taʼ New York, kienet studenta eċċellenti. Barra minn hekk, kienet dejjem lesta li tgħin minn qalbha lil sħabha tal-​klassi. Juan kien wieħed mill-​istudenti sħabha li minn żmien għal żmien kien jitlobha tgħinu. Min-​naħa tiegħu, hu ħa grazzja magħha u pprova jimpressjonaha. Minkejja li xtaqet tibqaʼ nadifa moralment, Maria ċediet għall-​proposti immorali taʼ Juan, u b’hekk involviet ruħha f’kondotta ħażina sesswalment.

Illum id-​dinja hija maqsuma fejn tidħol il-​kultura u korrotta fejn jidħlu l-​morali. Għalhekk hija tabilħaqq sfida li wieħed juri kwalitajiet morali għoljin. Allura, għala għandna nikkultivaw il-​virtù? Għaliex il-​kondotta virtuża togħġbu lil Alla, u żgur li l-​biċċa l-​kbira minna nixtiequ li jkollna l-​favur tiegħu.

Il-Kelma t’Alla, il-​Bibbja, tħeġġeġ lil min jaqraha biex jikkultiva l-​virtù. Per eżempju, l-​appostlu Pawlu jikteb: “F’kull ma hu virtù, f’kull ma ħaqqu t-​tifħir; f’dan kollu aħsbu.” (Filippin 4:8) U l-​appostlu Pietru jħeġġiġna ħalli ‘nkunu ħerqana biex inżidu mal-​fidi l-​virtù.’ (2 Pietru 1:5) Imma x’inhi l-​virtù? Tistaʼ tiġi mgħallma fi klassi? Kif nistgħu nikkultivawha?

[Nota taʼ taħt]