Avviż Specjali
FI TMIEM il-laqgħa annwali tal-Watch Tower Bible and Tract Society of Pennsylvania, li saret fis-7 t’Ottubru, 2000, sar avviż speċjali miċ-chairman, John E. Barr tal-Ġemgħa li Tiggverna. Dan l-avviż kompla fuq it-taħditiet li ngħataw iktar kmieni dak in-nhar minn Theodore Jaracz u Daniel Sydlik.—Ara paġni 12-16 u 28-31 f’din ir-rivista.
Ħuna Barr ħareġ punt importanti ħafna meta qal: “Ir-responsabbiltajiet fdati f’idejn ‘l-ilsir leali u diskret’ u l-Ġemgħa li Tiggverna tiegħu mhux biss huma akbar minn dawk mogħtija lill-korporazzjonijiet legali, imma jinkludu ferm iktar. Inklużi fl-istatut taʼ kull waħda minn dawn il-korporazzjonijiet legali hemm kwistjonijiet li huma limitati fil-firxa tagħhom. Madankollu, Sidna Ġesù Kristu ħatar lill-klassi taʼ l-ilsir leali fuq ‘ġidu’ kollu, jew l-interessi tas-Saltna hawnhekk fuq l-art.”—Mattew 24:45-47, NW.
Dwar il-korporazzjoni taʼ Pennsylvania, Ħuna Barr żied: “Minn mindu twaqqfet fl-1884, il-Watch Tower Bible and Tract Society of Pennsylvania kellha rwol importanti fl-istorja moderna tagħna. Madankollu, din hi biss strument legali li l-‘ilsir leali u diskret’ jistaʼ juża meta jkun hemm bżonn.”
Fit-taħditiet tagħhom, Ħutna Sydlik u Jaracz kienu spjegaw li “l-ilsir leali u diskret” ġie fdat bil-ġid kollu li l-Mulej għandu fuq l-art. Iżda dan ma jżommx lill-klassi taʼ l-ilsir milli tħalli rġiel kwalifikati minn fost in-“nagħaġ oħra” jieħdu ħsieb ċerti responsabbiltajiet amministrattivi taʼ rutina. (Ġwann 10:16) Lanqas m’hemm xi bażi Skritturali li titlob li xi wieħed mid-diretturi jew inkella d-diretturi kollha tal-korporazzjonijiet legali wżati mix-Xhieda taʼ Jehovah għandhom ikunu Kristjani midlukin.
Ħuna Barr għarraf lill-udjenza li dan l-aħħar xi wħud mill-membri tal-Ġemgħa li Tiggverna tax-Xhieda taʼ Jehovah ma kinux għadhom jaqdu bħala diretturi u uffiċjali. Huma rtiraw minn jeddhom mill-bord tad-diretturi tal-korporazzjonijiet kollha wżati mill-“ilsir leali u diskret” fl-Istati Uniti. Aħwa rġiel responsabbli minn fost in-nagħaġ oħra ġew eletti bħala sostituti.
Din id-deċiżjoni tal-Ġemgħa li Tiggverna hija tabilħaqq taʼ benefiċċju. B’dan il-mod, il-membri tal-Ġemgħa li Tiggverna jistgħu jqattgħu iktar ħin jippreparaw l-ikel spiritwali kif ukoll jieħdu ħsieb b’mod ieħor il-bżonnijiet spiritwali taʼ l-aħwa madwar id-dinja.
Fil-konklużjoni tiegħu, iċ-chairman qal dan il-kliem lill-udjenza li kienet qed tismaʼ b’entużjażmu kbir: “Filwaqt li diversi dmirijiet legali u amministrattivi ngħataw lil indokraturi taʼ esperjenza, . . . dawn kollha qed jaqdu taħt id-direzzjoni spiritwali tal-Ġemgħa li Tiggverna. . . . Ilkoll kemm aħna nitolbu u nistennew li Jehovah jbierek l-isforzi magħqudin kollha tagħna biex nagħmlu r-rieda tiegħu, għall-glorja u l-ġieħ tal-kbir ismu.”