L-​Ubbidjenza—Lezzjoni Importanti mit-​Tfulija?

“IL-​ĠENITURI jridu individwi, mhux tfal li jobdu.” Hekk kien jgħid it-​titlu t’artiklu f’ġurnal. Dan ir-​rapport kien ibbażat fuq ir-​riżultati taʼ riċerka li saret fi New Zealand. Skond din, 22 fil-​mija biss minn dawk li wieġbu “kienu tal-​fehma li t-​tfal għandhom jiġu mgħallmin l-​ubbidjenza fid-​dar.” Minn din ir-​riċerka ħareġ ukoll li l-​ġenituri llum jemmnu li hu ferm iktar importanti li lit-​tfal tgħallimhom affarijiet bħalma huma l-​manjieri tajbin, l-​indipendenza, u r-​responsabbiltà.

F’din l-​era taʼ individwaliżmu u egoiżmu, ma nistagħġbux li l-​biċċa l-​kbira min-​nies ma jħossux li l-​ubbidjenza hija importanti u li għandhom jgħallmuha lit-​tfal. Imma allura l-​ubbidjenza mit-​tfulija għandna sempliċement inwarrbuha bħala xi ħaġa barra minn żmienha u li m’għadhiex moda? Jew hi fil-​fatt fost l-​iktar lezzjonijiet importanti li t-​tfal għandhom jitgħallmu għall-​ġid tagħhom? Iktar importanti minn hekk, Alla Jehovah, li hu l-​Oriġinatur taʼ l-​arranġament tal-​familja, kif iqisha l-​ubbidjenza lejn il-​ġenituri, u x’inhuma xi ftit mill-​benefiċċji li joħorġu minn ubbidjenza bħal din?—Atti 17:28; Efesin 3:​14, 15.

“Dan Hu s-​Sewwa”

L-​appostlu Pawlu kiteb hekk lill-​kongregazzjoni Kristjana f’Efesu fl-​ewwel seklu: “Intom it-​tfal, isimgħu mill-​ġenituri tagħkom fil-​Mulej, għax dan hu s-​Sewwa.” (Efesin 6:1) B’hekk, ir-​raġuni ewlenija għal ubbidjenza bħal din hija li din hi fi qbil mal-​livell divin taʼ x’inhu sewwa. Bħalma poġġieha Pawlu, “dan hu s-​Sewwa.”

Fi qbil maʼ dan, ninnotaw li l-​Kelma t’Alla tiddeskrivi d-​dixxiplina tal-​ġenituri bl-​imħabba bħala oġġett taʼ sbuħija, “kuruna sabiħa fuq rasek, u kullana taʼ ġieħ madwar għonqok,” kif ukoll bħala xi ħaġa ‘li togħġob lill-​Mulej.’ (Proverbji 1:​8, 9; Kolossin 3:20) B’kuntrast dirett, id-​diżubbidjenza lejn il-​ġenituri tqanqal id-​diżapprovazzjoni divina.—Rumani 1:​30, 32.

“Sabiex Ikollok ir-​Riżq”

Pawlu wera li hemm mertu ieħor fl-​ubbidjenza meta kiteb: “‘Weġġaħ ’il missierek u ’l ommok’, dan hu l-​ewwel kmandament b’wegħda sabiex ikollok ir-​riżq u tul għomrok fuq l-​art.” (Efesin 6:​2, 3; Eżodu 20:12) L-​ubbidjenza lejn il-​ġenituri b’liema modi tistaʼ tkun taʼ ġid għal dak li jkun?

L-ewwelnett, m’huwiex veru li l-​ġenituri għandhom vantaġġ għax għandhom l-​età u l-​esperjenza? Għalkemm forsi ma tantx jidhru li jafu dwar il-​kompjuters jew dwar xi suġġetti oħrajn li jiġu mgħallmin fl-​iskola, huma jafu ħafna dwar x’taf tagħti l-​ħajja u kif ilaħħqu mal-​problemi li ġġib magħha. Iż-​żgħażagħ, mill-​banda l-​oħra, huma neqsin minn dak il-​ħsieb bilanċjat li jiġi mill-​maturità. B’hekk, għandhom it-​tendenza li jaqbdu u jiddeċiedu, ħafna drabi wara li sħabhom ikunu damu jagħmlulhom pressjoni biex iċedu, u dan ikunilhom taʼ ħsara ferm. B’mod realistiku, il-​Bibbja tgħid: “Il-​bluha b’għeruqha fil-​qalb taʼ kull tifel.” X’inhu r-​rimedju? “Bis-​saħħa tat-​twiddib taqlagħhielu ’l barra.”—Proverbji 22:15.

Ir-relazzjoni taʼ bejn il-​ġenituri u l-​ulied hija biss waħda mill-​ħafna benefiċċji li jinkisbu permezz taʼ l-​ubbidjenza. Biex is-​soċjetà umana tiffunzjona bla xkiel u b’mod produttiv, irid bilfors ikun hemm il-​kooperazzjoni, li fiha nfisha tirrikjedi ċertu ammont taʼ ubbidjenza. Per eżempju, fiż-​żwieġ ikun hemm il-​paċi, l-​armonija, u l-​ferħ meta kull wieħed ikun lest li jċedi, u mhux meta wieħed dejjem ikun irid li tgħaddi tiegħu bla ma jqis id-​drittijiet u s-​sentimenti tan-​naħa l-​oħra. Fuq il-​post tax-​xogħol, l-​impjegati jridu jkunu lesti joqogħdu għal dak li jgħidilhom l-​imgħallem biex tkun tistaʼ tirnexxi l-​intrapriża jew in-​negozju. Fejn jidħlu l-​liġijiet u r-​regolamenti governattivi, l-​ubbidjenza mhux biss teħles lil dak li jkun minn xi piena imma twassal ukoll għal ċertu ammont taʼ sigurtà u protezzjoni.—Rumani 13:​1-7; Efesin 5:​21-25; 6:5-8.

Spiss jiġri li żgħażagħ li ma jobdux l-​awtorità jispiċċaw imwarrbin mis-​soċjetà. B’kuntrast, il-​lezzjoni taʼ l-​ubbidjenza li wieħed ikun tgħallem mit-​tfulija tibqaʼ tiswielu taʼ ġid tul ħajtu kollha. Kemm jaqbillek li din titgħallimha mit-​tfulija!

Il-​Premju l-​Kbir għall-​Ubbidjenza

L-​ubbidjenza mhux biss twassal biex ikun hemm relazzjonijiet taʼ ferħ fil-​familja u benefiċċji oħra li jiswewlek għal għomrok kollu imma tipprovdi wkoll pedament fuqiex tistaʼ tinbena l-​iktar relazzjoni vitali minnhom kollha, jiġifieri dik bejn il-​bniedem u l-​Ħallieq tiegħu. Bħala l-​“Ħallieq Grandjuż” li fih hemm “l-​għajn tal-​ħajja,” Alla Jehovah jixraqlu bi dritt li jkollu l-​ubbidjenza sħiħa tagħna.—Ekkleżjasti 12:1, NW; Salm 36:10 [36:​9, NW].

Il-kelma “obdi” fid-​diversi forom tagħha nsibuha iktar minn 160 darba fil-​Bibbja. Iktar minn hekk, hemm mijiet taʼ referenzi għal-​liġijiet, l-​ordnijiet, il-​kmandamenti, id-​deċiżjonijiet ġudizzjarji, u r-​regolamenti t’Alla, li lkoll jesiġu s-​sottomissjoni. Ma jibqgħalna ebda dubju li Alla jqis l-​ubbidjenza bħala xi ħaġa neċessarja biex wieħed igawdi l-​approvazzjoni tiegħu. Iva, l-​ubbidjenza hija ingredjent li ma tistax tgħaddi mingħajru jekk trid tibni relazzjoni maʼ Jehovah. (1 Samwel 15:22) B’sogħba, it-​tendenza naturali tal-​bniedem ixxaqleb lejn id-​diżubbidjenza u mhux lejn l-​ubbidjenza. “Qalb il-​bniedem miġbuda għall-​ħażen sa minn ċkunitu,” tgħid il-​Bibbja. (Ġenesi 8:21) Għalhekk, il-​lezzjoni taʼ l-​ubbidjenza wieħed irid jitgħallimha mhux biss fi tfulitu imma tul ħajtu kollha. Hemm premju kbir għal min jagħmel hekk.

Ftakar li, bħalma poġġieha l-​appostlu Pawlu, il-​kmand biex it-​tfal jobdu lill-​ġenituri fih wegħda doppja, jiġifieri, li “jkollok ir-​riżq u tul għomrok fuq l-​art.” (Korsiv tagħna.) Konferma taʼ din il-​wegħda nsibuha fi Proverbji 3:​1, 2: “Ibni, tinsiex it-​tagħlim tiegħi, iżda żomm f’qalbek il-​kmandamenti tiegħi; għax għomor twil u ħafna snin, u riżq tajjeb iġibulek.” Il-​premju l-​kbir għal min jobdi huwa relazzjoni persunali maʼ Jehovah issa u ħajja taʼ dejjem f’dinja ġdida mimlija paċi.—Apokalissi 21:​3, 4.

[Stampi f’paġna 30, 31]

L-​ubbidjenza ġġib relazzjonijiet taʼ ferħ fil-​familja, fuq il-​post tax-​xogħol, u maʼ Jehovah