Qiegħed Int ‘Tirbaħ iż-Żmien’?
L-APPOSTLU Pawlu ta dan il-parir lill-Kristjani taʼ Efesu fl-ewwel seklu: “Qisu sewwa kif iġġibu ruħkom, mhux bħal nies bla dehen, iżda bħal nies għorrief, [“irbħu ż-żmien,” Saydon], għaliex ħżiena huma l-jiem.” (Efesin 5:15, 16) Dan il-parir għala kien meħtieġ? Biex nifhmu t-tweġiba għal din il-mistoqsija rridu nkunu nafu liema kundizzjonijiet kienu qed iħabbtu wiċċhom magħhom il-Kristjani f’din il-belt antika.
Efesu kienet magħrufa bħala belt sinjura ferm, mimlija b’immoralità grassa, bi kriminalità kulfejn iddawwar wiċċek, u b’diversi attivitajiet demoniċi. Iktar minn hekk, il-Kristjani kellhom jikkumbattu kontra twemmin filosofiku f’konnessjoni maż-żmien. Il-Griegi mhux Kristjani f’Efesu ma kinux jemmnu li ż-żmien jimxi f’linja dritta. Skond il-filosofija Griega l-ħajja kienet tirrepeti ruħha f’ċikli li ma jieqfu qatt. Min ikun ħela ħafna mill-ħin tiegħu matul ċiklu wieħed tal-ħajja setaʼ jiksbu lura f’ċiklu ieħor. Dan it-tip taʼ raġunar setaʼ ġiegħel lill-Kristjani Efesin jadottaw attitudni xi ftit jew wisq laxka lejn l-iskeda taʼ Jehovah rigward x’kellu jiġri, inkluż l-iskeda tiegħu biex jagħmel ħaqq divin. B’hekk, il-parir taʼ Pawlu biex ‘jirbħu ż-żmien’ kien wieħed xieraq.
Pawlu ma kienx qed jitkellem dwar iż-żmien f’sens ġenerali. Il-kelma Griega li uża tissinjifika żmien imwaqqat, żmien li jkun magħżul għal xi skop speċjali. Pawlu kien qed jagħti parir lill-Kristjani taʼ l-ewwel seklu biex jagħmlu użu għaqli mill-perijodu opportun, jew l-istaġun favorevoli, li kienu qed igawdu dak iż-żmien, u dan kellhom jagħmluh qabel ma jintemm dak iż-żmien u jitilfu ċ-ċans li jiksbu l-ħniena divina u l-offerta tas-salvazzjoni.—Rumani 13:11-13; 1 Tessalonikin 5:6-11.
Aħna qegħdin ngħixu f’perijodu taʼ żmien opportun simili. Minflok ma jaħlu l-ħin prezzjuż taʼ dan l-istaġun favorevoli li qatt ma se jerġaʼ jirrepeti ruħu billi joqogħdu jiġru wara l-pjaċiri temporanji li toffri d-dinja, il-Kristjani jkunu għaqlin jekk jużaw il-ħin li għandhom f’idejhom biex iwettqu għemejjel “qaddisa u tajba,” u b’hekk isaħħu r-relazzjoni tagħhom mal-Ħallieq, Alla Jehovah.—2 Pietru 3:11; Salm 73:28; Filippin 1:10.