“Jehovah Kien Tassew Ġeneruż Miegħi!”

F’LEJLA verament sabiħa f’Marzu taʼ l-​1985, l-​irġiel u n-​nisa li kienu jaħdmu fid-​Dipartiment tal-​Kitba fil-​kwartieri ġenerali tax-​Xhieda taʼ Jehovah fi New York, l-​Istati Uniti, iċċelebraw okkażjoni sinifikanti ferm. Karl F. Klein kien għalaq 60 sena jaqdi fil-​ministeru full-time. B’entużjażmu kbir, Ħuna Klein qal: “Jehovah kien tassew ġeneruż miegħi!” Hu qal li waħda mill-​iskritturi favoriti tiegħu kienet Salm 37:4. Iktar tard, dawk kollha preżenti kellhom ukoll il-​pjaċir li jisimgħuh idoqq il-​vjolinċell.

Għall-15-il sena taʼ wara, Ħuna Klein kompla jaqdi fix-​xogħol tiegħu bħala wieħed mill-​membri tad-​Dipartiment tal-​Kitba u tal-​Ġemgħa li Tiggverna tax-​Xhieda taʼ Jehovah. Imbagħad, fit-​3 taʼ Jannar, 2001, fl-​età taʼ 95 sena, Karl Klein temm fedelment il-​ħajja tiegħu fuq din l-​art.

Karl twieled il-​Ġermanja. Il-​familja tiegħu emigrat lejn l-​Istati Uniti, u Karl trabba f’wieħed mid-​distretti taʼ madwar Chicago, f’Illinois. Meta kienu għadhom żgħar, Karl u ħuh Ted, li kien iżgħar minnu, bdew jieħdu interess kbir fil-​Bibbja. Karl tgħammed fl-​1918, u l-​affarijiet eċċitanti li kien semaʼ f’konvenzjoni taʼ l-​Istudenti tal-​Bibbja fl-​1922 qanqlu ġewwa fih imħabba profonda għall-​ministeru li ma birdet qatt. Ma kienx iħalli ġimgħa waħda tgħaddi mingħajr ma jieħu sehem fix-​xogħol taʼ l-​ippridkar, u dan għamlu wkoll fl-​aħħar ġimgħat taʼ ħajtu.

Karl sar membru tal-​familja taʼ Betel fil-​kwartieri ġenerali fl-​1925 u għall-​ewwel kien jaħdem fl-​istamperija. Kien iħobb ħafna l-​mużika, u għal xi snin kien idoqq il-​vjolinċell fl-​orkestra li kienet tieħu sehem f’xandiriet Kristjani fuq ir-​radju. Wara dan, hu beda jaħdem fid-​Dipartiment tas-​Servizz, u bbenefika ferm speċjalment meta ħadem mill-​qrib maʼ l-​indokratur tad-​dipartiment, T. J. Sullivan. Sadattant, Ted iżżewweġ u mar jaqdi bħala missjunarju f’Puerto Rico flimkien maʼ martu, Doris.

Għal nofs seklu, Karl Klein ħadem fid-​Dipartiment tal-​Kitba, u hemmhekk ta kontribut siewi ferm għaliex hu kien iħobb jagħmel ir-​riċerki u kellu għarfien profond tal-​Bibbja. Fl-​1963, Karl iżżewweġ lil Margareta, missjunarja Ġermaniża li kienet taqdi fil-​Bolivja. Bis-​saħħa taʼ l-​appoġġ li kienet tagħtih bl-​imħabba kollha, speċjalment meta beda jkollu l-​problemi tas-​saħħa, hu baqaʼ jagħmel xogħol produttiv saħansitra meta kien taʼ età avanzata, minkejja li taʼ din l-​età ħafna nies ikunu ilhom li rtiraw mix-​xogħol. Peress li Karl kien jitkellem b’mod sinċier ħafna u, taʼ mużiċist li kien, kien ibaqbaq bl-​entużjażmu, kulħadd kien jibqaʼ jiftakar it-​taħditiet li kien jagħti fil-​kongregazzjonijiet u fil-​konvenzjonijiet. Mhux wisq qabel ma miet, hu kien mexxa d-​diskussjoni dwar l-​iskrittura tal-​jum fil-​Betel taʼ New York, u l-​aħwa f’din il-​familja kbira tgħidx kemm ferħu u bbenefikaw.

Ħafna minn dawk li jaqraw regolarment It-​Torri taʼ l-​Għassa se jiftakru r-​rakkont tal-​ħajja taʼ Ħuna Klein, rakkont interessanti dwar l-​esperjenzi tiegħu li ġie pubblikat fil-​ħarġa taʼ l-​1 t’Ottubru, 1984. Żgur li se tieħu gost taqra jew terġaʼ taqra dan ir-​rakkont, waqt li żżomm f’moħħok li min kitbu qattaʼ jerġaʼ ħmistax-il sena oħra jaqdi bħala Kristjan leali u devot.

Ħuna Klein, bħala wieħed mill-​midlukin tal-​Mulej, xtaq b’qalbu kollha li jirrenja flimkien maʼ Kristu fis-​sema. Aħna għandna għalxiex nemmnu li Jehovah issa qatagħlu xewqtu.—Luqa 22:​28-30.

[Stampa f’paġna 31]

Karl fl-​1943 maʼ T. J. Sullivan u Ted u Doris

[Stampa f’paġna 31]

Karl u Margareta, f’Ottubru tas-​sena 2000