Proklamaturi tas-​Saltna Jirrapportaw

Il-​Bżonnijiet Spiritwali Tiegħu Ġew Sodisfati

IL-​GŻIRA taʼ Ċipru tinsab fin-​naħa tal-​grigal tal-​Baħar Mediterran. Fi żminijiet Bibliċi, Ċipru kien magħruf għar-​ram u l-​injam taʼ kwalità tajba. Pawlu u Barnaba xandru l-​aħbar tajba tas-​Saltna hemmhekk matul l-​ewwel vjaġġ missjunarju tagħhom. (Atti 13:​4-​12) Illum, l-​aħbar tajba għadha qed tħalli effett pożittiv fil-​ħajja taʼ ħafna mill-​abitanti taʼ Ċipru. Dan żgur li huwa minnu fil-​każ taʼ Lucas, raġel li għandu ’l fuq minn erbgħin sena. Hu jgħid:

“Jien twelidt ġewwa familja taʼ sebat itfal u konna noqogħdu f’razzett li fih konna rrabbu l-​baqar. Mindu kont żgħir kont inħobb naqra ħafna. L-​iktar li kont inħobb naqra kienet l-​Iskrittura Griega Kristjana li kelli f’daqsxejn taʼ ktieb li kien joqgħod fil-​but. Meta kelli għaxar snin, jien u sħabi għaqqadna grupp żgħir għall-​istudju tal-​Bibbja. Madankollu, ma tantx domna għax xi nies mir-​raħal li kienu akbar minna fl-​età bdew jgħajruna li qed ngħidu l-​ereżiji.

“Iktar tard, meta kont bdejt nistudja fl-​Istati Uniti, iltqajt maʼ nies taʼ ħafna sfondi reliġjużi differenti. Dan reġaʼ qajjem ġewwa fija x-​xewqa għal affarijiet spiritwali. Qattajt ħafna ġranet fil-​librerija taʼ l-​università nistudja dwar reliġjonijiet differenti. Żort ukoll ħafna knejjes differenti, iżda minkejja l-​isforzi li għamilt, kont għadni m’iniex sodisfatt spiritwalment.

“Wara li spiċċajt l-​istudji tiegħi, mort lura lejn Ċipru u aċċettajt xogħol bħala direttur taʼ laboratorju mediku. Raġel anzjan jismu Antonis, li kien wieħed mix-​Xhieda taʼ Jehovah, kien iżurni fuq il-​post tax-​xogħol. Iżda, iż-​żjajjar tiegħu ġew innotati minn dawk tal-​Knisja Ortodossa Griega.

“Ma damx ma ġie jżurni teologu u qalli biex ma nibqax inkellem lix-​Xhieda taʼ Jehovah. Peress li mindu kont żgħir ġejt mgħallem li l-​Knisja Ortodossa Griega kellha l-​verità, jien aċċettajt dak li qalli u waqqaft iż-​żjajjar taʼ Antonis u bdejt niddiskuti l-​Bibbja mat-​teologu. Żort ukoll ħafna monasterji f’Ċipru. Saħansitra għamilt vjaġġ lejn it-​tramuntana tal-​Greċja u żort il-​Muntanja Athos, li hija meqjusa bħala l-​iktar muntanja qaddisa fid-​dinja Kristjana Ortodossa. Xorta waħda, il-​mistoqsijiet tiegħi dwar il-​Bibbja baqgħu bla tweġiba.

“Imbagħad tlabt lil Alla biex jgħinni nsib il-​verità. Ftit wara dan, Antonis reġaʼ ġie jżurni fuq il-​post tax-​xogħol, u ħassejt li din kienet it-​tweġiba għat-​talba tiegħi. Għalhekk ma bqajtx immur għand it-​teologu u bdejt nistudja l-​Bibbja m’Antonis. Komplejt nagħmel progress, u f’Ottubru taʼ l-​1997 issimbolizzajt id-​dedikazzjoni tiegħi lil Jehovah permezz tal-​magħmudija fl-​ilma.

“Marti u ż-​żewġt ibniet il-​kbar tagħna, li dak iż-​żmien kellhom 14 u 10 snin, għall-​ewwel kienu jopponu. Iżda minħabba l-​kondotta tajba tiegħi, il-​mara ddeċidiet li tattendi waħda mil-​laqgħat fis-​Sala tas-​Saltna. Hi tgħidx kemm baqgħet impressjonata bil-​qalb tajba tax-​Xhieda u bl-​interess persunali li huma wrew. Hi impressjonat ruħha l-​iktar meta rat il-​mod kif jużaw il-​Bibbja. B’riżultat taʼ dan, marti u ż-​żewġt ibniet il-​kbar tagħna aċċettaw studju tal-​Bibbja max-​Xhieda taʼ Jehovah. Immaġina x’ferħ kelli meta t-​tlieta li huma tgħammdu fil-​Konvenzjoni Distrettwali “Il-​Kelma Profetika t’Alla” fl-​1999!

“Iva, it-​tfittxija tiegħi għall-​verità ġiet sodisfata. Issa l-​familja tagħna kollha, jien, il-​mara u l-​erbat itfal, ninsabu magħqudin fil-​qima pura taʼ Jehovah.”