Tiflaħ Iktar mid-​Deheb Fin

ID-​DEHEB huwa mfittex ħafna għas-​sbuħija tiegħu u għax ma jispiċċax malajr. Huwa mixtieq ħafna għax jibqaʼ jleqq u bla tbajjaʼ x’aktarx għal dejjem. Dan għaliex id-​deheb jiflaħ għall-​ilma, l-​ossiġnu, il-​kubrit, u kważi għal kull ħaġa oħra. Ħafna oġġetti tad-​deheb li nstabu f’vapuri mgħarrqa u f’postijiet oħra xorta baqgħu jleqqu anki wara mijiet taʼ snin.

Taʼ interess, madankollu, il-​Bibbja tgħid li hemm xi ħaġa li tiflaħ iktar u “li tiswa aktar mid-​deheb li jintemm, u li hu ppruvat bin-​nar.” (1 Pietru 1:​7, Saydon) Id-​deheb “ippruvat,” jew irfinut, bin-​nar u b’metodi oħrajn jistaʼ jsir pur sa 99.9 fil-​mija. Madankollu, anki d-​deheb irfinut jintemm, jew jinħall, meta jiġi f’kuntatt maʼ l-​aqua regia (royal water), taħlita li fiha tliet kwarti aċidu idrokloriku u kwart aċidu nitriku. Għalhekk, il-​Bibbja hija korretta xjentifikament meta tgħid li ‘d-​deheb jintemm.’

B’kuntrast, fidi Kristjana vera ssalva ’l dak li jkun. (Lhud 10:39) Il-​bnedmin jistgħu joqtlu persuna li għandha fidi b’saħħitha, bħalma għamlu lil Ġesù Kristu. Imma dawk li għandhom fidi ġenwina jingħataw din il-​wegħda: “Ibqaʼ fidil sal-​mewt, u jien nagħtik il-​kuruna tal-​ħajja.” (Apokalissi 2:​10) Dawk li juru fidi sal-​mewt jibqgħu fil-​memorja t’Alla, u hu se jirxoxtahom. (Ġwann 5:​28, 29) L-​ebda ammont taʼ deheb ma jistaʼ jagħmel dan. Verament, f’dan l-​aspett, il-​fidi tiswa ħafna iktar mid-​deheb. Sabiex il-​fidi jkollha valur daqshekk mill-​aqwa, trid tgħaddi mill-​provi, jew mit-​tiġrib. Fil-​fatt, Pietru qal li huwa dan ‘it-​tiġrib tal-​fidi’ li jiswa iktar mid-​deheb. Ix-​Xhieda taʼ Jehovah bil-​qalb kollha lesti jgħinuk tistudja l-​Bibbja sabiex int trawwem u żżomm fidi soda f’dak Alla veru, Jehovah, u f’Ibnu, Ġesù Kristu. Skond Ġesù, din tfisser “il-​ħajja taʼ dejjem.”​—Ġwann 17:3.