X’Tiftakar?

Ħadt gost taqra l-​ħarġiet reċenti taʼ It-​Torri taʼ l-​Għassa? Mela, ara jekk tistax twieġeb dawn il-​mistoqsijiet li ġejjin:

• Il-mistoqsijiet li jitqajmu f’Ġob kapitlu 38 għala jixirqilhom li jiġu kunsidrati saħansitra llum?

Ħafna mill-​meravilji li Alla ġibed l-​attenzjoni lejhom ma jistgħux jiġu mifhuma għalkollox lanqas mix-​xjenzati moderni. Dawn jinkludu kif il-​gravità żżomm id-​dinja fl-​orbita, x’inhu eżattament id-​dawl, għala din il-​varjetà li ma tispiċċa qatt tat-​trofof tal-​borra, kif jifforma l-​qtar tax-​xita, u kif inhi involuta l-​enerġija fil-​maltempati bir-​ragħad.​—4/15, paġni 4-​11.

• Liema eżempji mniżżlin fil-​Bibbja jistgħu jgħinuna nkampaw m’emozzjonijiet taʼ ħsara?

Asaf, Bàruk, u Nagħomi għaddew minn żmien fejn ħassewhom skuraġġiti għall-​aħħar jew kienu maħkumin minn emozzjonijiet taʼ ħsara oħrajn, u r-​rakkonti Skritturali taʼ kif huma rnexxielhom ikampaw maʼ sitwazzjonijiet bħal dawn jistgħu jgħinuna.​—4/15, paġni 22-4.

• Liema huma xi modi prattiċi kif tistaʼ tgħin lir-​romol Kristjani?

Il-​ħbieb jistgħu joffru l-​għajnuna b’qalb tajba u b’mod ċar. Membri tal-​familja u oħrajn jistgħu jkunu f’qagħda li joffru għajnuna finanzjarja jew materjali, fejn ikun hemm bżonn ġenwin. Il-​Kristjani sħabhom jistgħu jgħinuhom ukoll billi b’qalb tajba joffrulhom il-​ħbiberija tagħhom, u jipprovdulhom appoġġ spiritwali u faraġ.​—5/1, paġni 5-7.

• Għala huwa importanti li ‘niżżewġu biss fil-​Mulej,’ bħalma jingħata l-​parir fl-​1 Korintin 7:​39, Saydon?

Żwiġijiet maʼ nies taʼ twemmin ieħor taʼ spiss spiċċaw ħażin. M’għandniex xi ngħidu, li nisimgħu minn dan il-​parir juri l-​lealtà tagħna lejn Alla Jehovah. Meta nosservaw il-​Kelma t’Alla, il-​kuxjenza tagħna ma ċċanfarniex. (1 Ġwann 3:​21, 22)​—5/15, paġni 20-1.

• Ladarba Jehovah huwa l-​wieħed li jistaʼ jaħfrilna dnubietna, għala hu meħtieġ li l-​Kristjani jistqarru dnubhom maʼ l-​anzjani fil-​kongregazzjoni?

Iva, il-​Kristjan għandu jfittex l-​maħfra taʼ Jehovah għad-​dnubiet serji li jkun għamel. (2 Samwel 12:13) Iżda bħalma l-​profeta Natan ipprovda għajnuna għal David, irġiel ixjeħ u maturi fil-​kongregazzjoni jistgħu jgħinu lill-​midneb li jkun niedem tassew. Li jmorru għand l-​anzjani huwa fi qbil mad-​direzzjoni li tingħata f’Ġakbu 5:​14, 15.​—6/1, paġna 31.

• Liema evidenza hemm li aħna rridu nieħdu ħsieb l-​iltiema u r-​romol li huma fil-​bżonn?

Ir-​rekord storiku juri li għajnuna bħal din kienet marka tal-​qima vera fost il-​Lhud tal-​qedem u l-​Kristjani tal-​bidu. (Eżodu 22:​21, 22 [22:​23, 24, NW]; Galatin 2:​9, 10; Ġakbu 1:​27) L-​appostlu Pawlu inkluda fl-​Iskrittura istruzzjonijiet ċari għall-​Kristjani sabiex jipprovdi għajnuna għar-​romol li huma fil-​bżonn. (1 Timotju 5:​3-​16)​—6/15, paġni 9-​11.

• X’inhu l-​qofol għal ħajja mimlija skop u ferħana?

Irridu nikkultivaw u nżommu relazzjoni tajba maʼ Jehovah, Missierna tas-​sema. L-​istudju tal-​Bibbja huwa importanti biex nagħmlu hekk.—7/1, paġni 4-5.

• Għandu l-​bniedem spirtu immortali li jibqaʼ jeżisti wara l-​mewt?

Għalkemm xi nies jemmnu li dak li hu immortali hu l-​ispirtu, mhux ir-​ruħ, il-​Bibbja ma tappoġġax din l-​idea. Din turi li meta bniedem imut, jerġaʼ jmur lura lejn it-​trab u ma jibqax jeżisti. Iżda Alla kapaċi jagħtih il-​ħajja lura, u għalhekk kwalunkwe tama taʼ ħajja futura, permezz taʼ l-​irxoxt, tiddependi totalment minn Alla. (Qohelet 12:​7, Saydon)​—7/15, paġni 3-6.

• Fejn kien Danjel meta t-​tliet Ebrej iffaċċjaw prova fil-​wita taʼ Dura?

Il-​Bibbja ma tgħidilniex. Jistaʼ jkun li Danjel ma kienx obbligat li jkun hemm minħabba l-​pożizzjoni tiegħu, jew setaʼ jagħti l-​każ li kellu jmur xi mkien fuq xi inkarigu uffiċjali. Iżda nistgħu nkunu fiduċjużi li hu ma kkompromettiex il-​lealtà tiegħu lejn Alla Jehovah.​—8/1, paġna 31.