Darba Konna Lpup—Issa Sirna Nagħaġ!

Meta jien u Sakina konna żgħar, konna ġirien. Sakina kien fiha tifla u jien kont magħmula żgħira u rqiqa. Spiss konna nitlewmu u ngħajru lil xulxin, iżda darba kellna ġlieda serja. Minn dak in-​nhar ’il quddiem, la qatt erġajna tkellimna u lanqas sellimna lil xulxin. Maż-​żmien, it-​tnejn li aħna morna noqogħdu xi mkien ieħor u ma bqajniex f’kuntatt.

Fl-1994 bdejt nistudja l-​Bibbja max-​Xhieda taʼ Jehovah, u bil-​mod il-​mod il-​personalità tiegħi nbidlet. Erbaʼ snin wara meta kont qed nattendi għall-​jum t’assemblea speċjali tagħna f’Bujumbura, il-​Burundi, bqajt mistagħġba meta ltqajt maʼ Sakina. Ħadt pjaċir li kienet hemm, iżda t-​tislima tagħna kienet daqsxejn bierda. Iktar tard dak in-​nhar, ma stajtx nemmen lil għajnejja meta rajtha hemm fost il-​kandidati għall-​magħmudija! Hi wkoll kienet inbidlet kompletament. Ma kinitx għadha dik il-​persuna ġellieda li magħha spiss kont nargumenta. Kemm ħadt gost x’ħin rajtha tagħti evidenza pubblika tad-​dedikazzjoni tagħha lil Alla billi tissottometti ruħha għall-​magħmudija taʼ l-​ilma!

Meta telgħet mill-​ilma, mort niġri biex ngħannaqha u b’leħen baxx għedtilha f’widnitha: “Tiftakar kemm konna niġġieldu?” “Iva,” qaltli, “niftakar, imma dak kien fil-​passat. Issa jien persuna ġdida.”

Aħna t-​tnejn ferħanin li sibna l-​verità tal-​Bibbja li tgħaqqad lin-​nies. Din għenitna nbiddlu l-​personalitajiet tagħna qishom taʼ lpup għal dawk bħal taʼ nagħaġ li jappartjenu lir-​Ragħaj il-​Kbir, Alla Jehovah. Verament, il-​verità tal-​Bibbja tbiddel il-​ħajjiet.