Nagħmlu l-​Aħjar li Nistgħu!

“AGĦMEL l-​aħjar li tistaʼ.” Dan il-​parir prattiku ngħata lil wieħed missjunarju minn membru tal-​Ġemgħa li Tiggverna tax-​Xhieda taʼ Jehovah. Imma għala ta dan il-​parir bażiku lil wieħed li għandu ħafna esperjenza fil-​ministeru? M’humiex il-​biċċa l-​kbira tal-​missjunarji nies qalbiena li taʼ kuljum ikollhom iħabbtu wiċċhom maʼ insetti, sriep, sħana, mard, u diffikultajiet oħrajn?

Tabilħaqq, il-​missjunarji tax-​Xhieda taʼ Jehovah huma rġiel u nisa komuni. Huma Kristjani li l-​imħabba kbira li għandhom lejn Jehovah u l-​proxxmu tagħhom qanqlithom biex imorru jaqdu f’pajjiżi barranin. Huma qed jistinkaw biex jaqdu lil Jehovah bl-​aħjar mod possibbli, fiduċjużi li hu se jsaħħaħhom.—Efesin 6:10.

Sabiex inkunu nafu iżjed dwar ix-​xogħol missjunarju, ejja nimmaġinaw li qed inżuru dar tipika missjunarja fl-​Afrika tal-​Punent u nqattgħu l-​ġurnata hemmhekk.

Ġurnata fix-​Xogħol Missjunarju

Huma kważi s-​sebgħa taʼ fil-​għodu. Naslu d-​dar missjunarja eżatt fil-​ħin biex nieħdu sehem fid-​diskussjoni taʼ l-​Iskrittura tal-​jum. L-​għaxar missjunarji jifirħu bina u jagħmlulna l-​wisaʼ mal-​mejda biex noqogħdu bil-​qiegħda magħhom. Hekk kif nibdew insiru nafu lil xulxin, waħda mill-​missjunarji, li ilha s-​snin fl-​inkarigu tagħha, tibda tirrakkonta esperjenza tad-​daħq li kellha fil-​ministeru. Imma l-​konversazzjoni tagħna tiġi fix-​xejn x’ħin il-​ħu li se jieħu ħsieb id-​diskussjoni tal-​ġurnata jfakkar lill-​grupp ferrieħi li sar il-​ħin biex jikkunsidraw l-​Iskrittura tal-​ġurnata. Id-​diskussjoni se ssir bil-​Franċiż. Għalkemm ma nafux nitkellmu b’dik il-​lingwa, mill-​mod kif jesprimu ruħhom il-​missjunarji nistgħu nindunaw li dawn tgħallmuha sew il-​lingwa, minkejja li kienu ġejjin minn pajjiżi oħrajn.

Id-diskussjoni fuq il-​Bibbja tispiċċa billi tingħad talba mill-​qalb, u mbagħad jibda l-​kolazzjon. Hekk kif nieħdu porzjon abbundanti taʼ ċereali, il-​missjunarju bil-​qiegħda ħdejna jħeġġiġna biex inżidu miegħu ftit biċċiet tal-​banana. Aħna nispjegawlu li ma nħobbuhiex il-​banana, imma hu jwegħedna li se nibdlu fehmitna jekk induqu l-​banana lokali. Għalhekk inżidu ftit biċċiet maċ-​ċereali tagħna. Kemm għandu raġun! Din il-​banana hija verament tajba—għandha togħma ħelwa qisha ġelat! Niġu aċċertati wkoll li l-​ħobż tal-​Franċiż li qed iservulna għadu ġej mill-​forn kmieni dal-għodu minn ħanut żgħir li qiegħed eżatt faċċata tad-​dar missjunarja.

Wara l-​kolazzjon, se nqattgħu l-​ġurnata maʼ koppja missjunarja, li se nsejħulhom Ben u Karen. Konna smajna dwar kemm dan it-​territorju fil-​punent taʼ l-​Afrika qed jagħti l-​frott, u issa ninsabu ħerqanin biex naraw jekk dan huwiex minnu.

Meta mmorru biex nirkbu l-​karozza tal-​linja, insibu daqs tużżana nies jistennew. Sħabna l-​missjunarji ma jdumux ma jibdew konversazzjoni vivaċi fuq suġġett Bibliku maʼ waħda mara u t-​tifel tagħha. Peress li ma nafux bil-​Franċiż, kulma nistgħu nagħmlu hu li noqogħdu hemm u nitbissmu! Hekk kif il-​mara qed taċċetta l-​kopji tat-​Torri taʼ l-​Għassa u Stenbaħ!, tasal tal-​linja, u mbagħad kulħadd jipprova jitlaʼ f’salt! Hekk kif nitħabtu biex nirkbu, ir-​rassa tan-​nies timbottana ’l quddiem. M’huwiex faċli li nibqgħu deħlin sa ġewwanett u nżommu l-​bilanċ. Hekk kif ix-​xufier jistartja l-​karozza, aħna nitolbu li naslu b’wiċċ il-​ġid. Kultant, il-​karozza tieqaf f’daqqa u jerġgħu jitilgħu iktar nies—kulħadd jgħaffeġ fuq xulxin qisna sardin. Aħna nħarsu u nitbissmu lejn il-​passiġġieri l-​oħra, u huma jitbissmulna lura. Kemm nixtiequ li nistgħu nikkomunikaw magħhom!

Waqt li nkunu għaddejjin bil-​karozza tal-​linja, nittawlu barra mit-​tieqa biex naraw l-​attività kbira li għaddejja fit-​toroq. Żewġ nisa mexjin ħdejn xulxin iġorru t-​tagħbija tagħhom fuq rashom. Waħda minnhom qed twieżen kaldarun kbir bl-​ilma. Wieħed raġel qed jittama li jbigħ xi ornamenti żgħar li għandu mifruxin fuq kutra miftuħa fuq il-​bankina. Kulfejn iddawwar wiċċek in-​nies qegħdin jixtru jew ibigħu tistaʼ tgħid kulma jistaʼ jinbiegħ jew jinxtara.

F’daqqa waħda, Ben, li kien bil-​wieqfa maġenbi, ħass xi ħaġa ttektek maʼ siequ. X’tistaʼ tkun? Veru li l-​karozza tal-​linja hi mimlija daqs bajda, imma għal darb’oħra jerġaʼ jħoss tektika oħra. Ben jirnexxilu jħares ’l isfel. Ġo xkora eżatt ħdejn saqajh hemm papra li kultant toħroġ rasha mill-​ixkora u tagħtih daqqa b’munqarha! Ben jispjega li sid il-​papra x’aktarx se jiħodha s-​suq biex ibiegħha.

Meta naslu fit-​territorju tagħna, insiru nafu bi pjaċir kbir għalina li konna qed inżuru raħal tipiku Afrikan. Meta naslu fl-​ewwel dar, Ben iċapċap idejh bil-​qawwi biex jiġbed l-​attenzjoni taʼ l-​inkwilin. Hekk “iħabbtu l-​bibien” f’din il-​parti tad-​dinja. Jitfaċċa żagħżugħ u jispjega li għandu x’jagħmel imma jgħidilna biex nerġgħu ngħaddu iktar tard.

Fil-bieb li jmiss, niltaqgħu maʼ mara li titkellem b’ċertu djalett li Ben ma jifhmux. Hi ssejjaħ lil binha u tgħidlu biex jittraduċi dak li jrid jgħidilha Ben. Meta Ben jispiċċa, il-​mara taċċetta browxer fuq suġġetti Bibliċi, u binha jwiegħed li jispjegahulha. Fit-​tielet dar, insibu ħafna żgħażagħ bil-​qiegħda fil-​bitħa taʼ quddiem. Tnejn minnhom iqumu fil-​pront minn posthom biex il-​viżitaturi jkunu jistgħu joqogħdu bil-​qiegħda. Imbagħad ikun hemm diskussjoni interessanti dwar l-​użu tas-​salib fil-​qima, u jsiru arranġamenti biex id-​diskussjoni tkompli fil-​ġimgħa taʼ wara. Issa wasal il-​ħin biex nerġgħu mmorru għand dak iż-​żagħżugħ li ltqajna miegħu fl-​ewwel dar u li kellu x’jagħmel. B’xi mod, dan diġà semaʼ dwar id-​diskussjoni li kellna maʼ dawk iż-​żgħażagħ fl-​istess triq. Hu għandu ħafna mistoqsijiet fuq il-​Bibbja u jitlob studju. Ben jiċċekkja l-​iskeda tiegħu u jiftiehem miegħu biex jerġaʼ jmurlu l-​ġimgħa taʼ wara fl-​istess ħin. Fi triqitna lura lejn id-​dar missjunarja għall-​ikla taʼ nofsinhar, Ben u Karen jispjegaw li huma jridu joqogħdu attenti ħafna kif jippjanaw l-​attività tagħhom taʼ l-​istudju tal-​Bibbja għax faċli jaqbdu ħafna studji u ma jkunux jistgħu jlaħħqu magħhom.

Aħna nifirħulhom kemm jafu jitkellmu bil-​Franċiż. Ben jispjega li hu u Karen ilhom sitt snin jaqdu bħala missjunarji, u issa qed iħossuhom iktar familjari mal-​lingwa Franċiża. Huma jassigurawna li ma kinitx xi ħaġa faċli li jitgħallmu lingwa ġdida, imma l-​perseveranza tagħhom tat il-​frott.

Fin-nofsiegħa, il-​missjunarji kollha jinġabru madwar il-​mejda għall-​ikel. Insiru nafu li kuljum ikun hemm missjunarju differenti inkarigat biex jipprepara l-​ikel taʼ fil-​għodu u taʼ nofsinhar u biex jaħsel il-​platti. Illum, waħda mill-​missjunarji ppreparat ikla li tassew tiftaħlek l-​aptit, tiġieġa u patata moqlija flimkien maʼ insalata tad-​tadam—l-​ispeċjalità tagħha!

X’inhuma l-​pjanijiet taʼ Ben u Karen għal wara nofsinhar? Huma jispjegawlna li f’dan il-​pajjiż kulħadd jistkenn mix-​xemx bejn is-​siegħa u t-​tlieta taʼ wara nofsinhar, u għalhekk il-​biċċa l-​kbira tal-​missjunarji jużaw dak il-​ħin biex joqogħdu jistudjaw jew jistrieħu ftit. Xejn ma niskantaw meta Karen tgħidilna li l-​missjunarji li jkunu ġodda ma tantx idumu ma jidraw din id-​drawwa!

Wara li nistrieħu ftit, nerġgħu mmorru fil-​ministeru taʼ l-​għalqa. Ben qed ifittex raġel li wera interess fil-​verità Biblika u li ilu jipprova jikkuntattjah. Dan reġaʼ m’huwiex id-​dar, imma malli Ben iċapċap idejh joħorġu żewġ ġuvintur. Huma jgħidulna li l-​inkwilin kien qalilhom dwar iż-​żjajjar taʼ Ben u insista li jiksbu l-​ktieb Għarfien Li Jwassal Għall-​Ħajja taʼ Dejjem bħala għajnuna għall-​istudju tal-​Bibbja. Aħna ferħanin ħafna li nħallulhom kopja taʼ dan il-​ktieb. Imbagħad nirkbu l-​karozza tal-​linja li se tiħodna f’post fejn Karen għandha studju tal-​Bibbja maʼ mara li wriet interess.

Hekk kif ngħaddu mit-​toroq iffollati, Karen tgħidilna kif iltaqgħet maʼ din il-​mara meta darba minnhom kienu fl-​istess taxi maʼ diversi passiġġieri oħrajn. Karen tat fuljett lil din il-​mara biex taqrah matul il-​vjaġġ. Il-​mara qratu u talbitha ieħor differenti. Dan qratu wkoll u saħansitra b’iktar interess. Meta waslu fejn kellhom jaslu, Karen għamlet arranġament biex iżżur lill-​mara f’darha u bditilha studju tal-​Bibbja effettiv fuq il-​browxer Alla X’Jirrikjedi Minna? Illum, Karen se tagħmel magħha l-​ħames lezzjoni taʼ dan il-​browxer.

Veru li ħadna gost f’din il-​ġurnata li qattajna fil-​ministeru taʼ l-​għalqa, imma għad għandna xi mistoqsijiet dwar ix-​xogħol missjunarju. Il-​ħbieb tagħna jassigurawna li meta naslu d-​dar se jippreparawlna xi ħaġa ħafifa x’nieklu u jwiġbulna l-​mistoqsijiet tagħna.

Kif Ilaħħqu

Waqt li nagħmlu festa bil-​bajd moqli, ħobż tal-​Franċiż, u ġobon, insiru nafu iżjed dwar il-​ħajja tal-​missjunarji. It-​Tnejn ġeneralment hija ġurnata li fiha l-​missjunarji jistrieħu jew jagħmlu xi affarijiet persunali. Il-​biċċa l-​kbira tal-​missjunarji jqattgħu xi ħin matul dik il-​ġurnata jiktbu lill-​qraba u lill-​ħbieb. Għalihom ifisser ħafna li jisimgħu mingħand tad-​dar, u l-​missjunarji jieħdu gost jibagħtu u jirċievu l-​ittri.

Ladarba l-​missjunarji jgħixu u jaħdmu viċin xulxin huwa essenzjali li jżommu komunikazzjoni tajba billi jassoċjaw maʼ sħabhom il-​missjunarji kif ukoll billi jiddiskutu affarijiet spiritwali. Għal dan l-​għan, apparti li jżommu skeda regulari għal studju persunali tal-​Bibbja, kull nhar taʼ Tnejn fil-​għaxija l-​missjunarji jistudjaw il-​Bibbja kif ukoll ir-​rivista t-​Torri taʼ l-​Għassa. Ben jgħidilna li meta missjunarji minn sfond differenti jgħixu flimkien, huwa normali li jinqalgħu xi differenzi żgħar. Madankollu, il-​provvediment spiritwali taʼ l-​istudju tal-​familja jgħinhom iżommu atmosfera paċifika u magħquda. Hu jenfasizza wkoll il-​ħtieġa li dak li jkun ma jagħtix importanza żejda lilu nnifsu.

L-umiltà wkoll hija essenzjali. Il-​missjunarji jintbagħtu mhux biex jiġu moqdijin imma biex jaqdu. Il-​ħbieb tagħna jinnotaw li waħda mill-​iktar affarijiet diffiċli fi kwalunkwe lingwa hi li tgħid “Jiddispjaċini,” speċjalment meta wieħed ikun qed jiskuża ruħu għal xi ħaġa li qal jew għamel mingħajr intenzjoni. Ben ifakkarna fl-​eżempju Bibliku t’Abigajl, li talbet skuża għall-​imġiba goffa taʼ żewġha, u b’hekk ikkalmat sitwazzjoni li setgħet wasslet għal diżastru. (1 Samwel 25:23-28) L-​abbiltà li ‘żżomm is-​sliem’ għandha rwol importanti biex tkun missjunarju tajjeb.—2 Korintin 13:11.

Darba fix-​xahar il-​missjunarji jkollhom laqgħa biex jiddiskutu kwistjonijiet li jeffettwaw lill-​familja, kif ukoll xi bidliet fl-​iskeda. Wara, jieħdu pjaċir b’deżerta speċjali. Għalina, dan l-​arranġament jidher mhux biss prattiku ħafna imma anki li jħajrek.

Meta nispiċċaw mill-​ikel, noqogħdu nduru ftit mad-​dar missjunarja. Ninnotaw li għalkemm id-​dar ma fihiex lussu, il-​missjunarji jikkooperaw flimkien biex iżommuha nadifa tazza. Għandhom friġġ, magna tal-​ħasil, u fuqiex isajru. Karen tgħidilna li f’pajjiżi tropiċi, bħal dan fl-​Afrika tal-​Punent, jistaʼ jkollok ukoll l-​arja kundizzjonata. Post xieraq fejn joqogħdu, ikel bnin, u prekawzjonijiet sempliċi kontra l-​mard jgħinu lill-​missjunarji jibqgħu f’saħħithom u effettivi.

Jiffokaw fuq l-​Aspetti Pożittivi

Bqajna impressjonati b’dak kollu li rajna. Forsi għandna nidħlu għax-​xogħol missjunarju? Kif nistgħu nkunu ċerti minn dan? Il-​ħbieb tagħna jagħtuna xi punti dwar xiex naħsbu.

Jgħidulna li qabel xejn, il-​missjunarji Kristjani ma jħarsux lejn dan is-​servizz bħala avventura. Huma qed ifittxu wħud taʼ qalb onesta li jridu jitgħallmu dwar il-​wegħdi meraviljużi t’Alla. Il-​missjunarji jiddedikaw minn taʼ l-​inqas 140 siegħa fix-​xahar fil-​ministeru taʼ l-​għalqa, u għalhekk l-​imħabba għall-​ministeru hija neċessarja.

‘Imma xi ngħidu għas-​sriep, il-​gremxul, u l-​insetti?’ nistaqsu aħna. Għalkemm il-​missjunarji jistgħu jiltaqgħu magħhom f’ħafna mill-​inkarigi tagħhom, Ben jgħidilna li maż-​żmien dawn l-​affarijiet jindraw. Hu jkompli jgħidilna li kull inkarigu missjunarju għandu s-​sabiħ tiegħu, u maż-​żmien, il-​missjunarji jiffokaw fuq l-​aspetti pożittivi taʼ l-​inkarigu tagħhom. Il-​kundizzjonijiet li għall-​ewwel jarawhom bħala “differenti” ma jdumux ma jsiru komuni, u f’xi każi anki pjaċevoli. Waħda missjunarja, li għamlet snin sħaħ taqdi fl-​Afrika tal-​Punent qabel ma kellha terġaʼ tmur lura f’pajjiżha minħabba ċirkustanzi persunali, qalet li ħassitha iktar diffiċli li titlaq mill-​inkarigu tagħha milli biex titlaq minn art twelidha snin qabel. L-​inkarigu missjunarju tagħha kien sar id-​dar tagħha.

Lest Int?

Ben u Karen tawna ħafna dwar xiex naħsbu. Xi ngħidu għalik? Qatt ħsibt dwar li taqdi bħala missjunarju f’art barranija? Jekk inhu hekk, forsi m’hijiex daqshekk impossibbli daqskemm kont taħseb. Waħda mill-​ħtiġijiet ewlenin hi li jkollok l-​imħabba għall-​ministeru full-time u tieħu pjaċir tgħin lin-​nies. Ftakar, il-​missjunarji m’humiex xi eroj sovrumani imma rġiel u nisa komuni. Huma qed jagħmlu l-​aħjar li jistgħu biex iwettqu xogħol importanti ferm.

[Stampi f’paġna 27]

Kull ġurnata tibda b’diskussjoni dwar l-​Iskrittura tal-​jum

[Stampa f’paġna 29]

Il-​ħajja bħala missjunarju tistaʼ tkun sodisfaċenti ferm

[Stampi f’paġna 29]

Xeni mill-​Afrika