Mistoqsijiet mill-​Qarrejja

Ir-​restrizzjonijiet fuq iż-​żwieġ bejn il-​qraba li nsibu fil-​Liġi Mosajka sa liema punt japplikaw għall-​Kristjani llum?

Il-​Liġi li Jehovah ta lill-​ġens taʼ Iżrael ma tidħolx fid-​dettall dwar ċerimonji u proċeduri tat-​tieġ. Madankollu, fiha xi projbizzjonijiet kontra ċerti żwiġijiet. Per eżempju, f’Levitiku 18:​6-20 insibu lista taʼ relazzjonijiet projbiti li jinvolvu lil ‘qraba.’ Din is-​silta tagħti ħafna dettalji dwar liema qraba m’għandhomx assolutament ikollhom relazzjonijiet sesswali bejniethom. M’għandniex xi ngħidu, il-​Kristjani la huma taħt il-​Liġi Mosajka u lanqas huma marbutin bid-​digrieti tagħha. (Efesin 2:15; Kolossin 2:14) Imma dan ma jfissirx li l-​Kristjani jistgħu sempliċement jinjoraw din il-​kwistjoni meta jkunu qegħdin jagħżlu lil min se jiżżewġu. Hemm għadd taʼ raġunijiet għala dan huwa l-​każ.

Biex nibdew, hemm il-​liġijiet sekulari li jirregolaw iż-​żwieġ bejn il-​qraba, u l-​Kristjani huma obbligati bażikament li jobdu l-​liġijiet tal-​pajjiż li jgħixu fih. (Mattew 22:21; Rumani 13:1) M’għandniex xi ngħidu, dawn il-​liġijiet ivarjaw minn post għal ieħor. Il-​biċċa l-​kbira mil-​liġijiet moderni taʼ dan it-​tip huma bbażati primarjament fuq l-​effetti ġenetiċi li jistgħu jirriżultaw. Huwa fatt magħruf li żwieġ bejn il-​qraba għandu iktar probabbiltà li jesponi lit-​tfal li jitwieldu fih għal mard u difetti ġenetiċi. Għal din ir-​raġuni u minħabba li jridu ‘jobdu lill-​awtorità taʼ fuqhom,’ il-​Kristjani li jkunu se jiżżewġu jimxu mal-​liġijiet taż-​żwieġ taʼ pajjiżhom.

Imbagħad hemm il-​kwistjoni taʼ x’inhu u x’mhux aċċettat fil-​komunità fejn jgħix dak li jkun. Kważi kull kultura għandha regoli u drawwiet li jikkundannaw iż-​żwieġ bejn individwi li huma membri taʼ l-​istess familja, u rabtiet bħal dawn iqisuhom bħala żienja, u għalhekk projbiti. Avolja r-​relazzjonijiet speċifiċi li huma projbiti jistgħu jvarjaw ħafna f’kulturi differenti, “bħala regola ġenerali, iktar ma tkun qrib ir-​relazzjoni ġenetika bejn tnejn min-​nies, iktar se jkun qawwi u emozzjonali s-​sentiment li jipprojbixxi jew jiskuraġġixxi r-​relazzjonijiet sesswali taʼ bejniethom,” tgħid The Encyclopædia Britannica. B’hekk, saħansitra meta ma jkunux involuti relazzjonijiet bejn membri taʼ l-​istess familja, il-​Kristjani ma jridux jaġixxu b’tali mod li jinjoraw għalkollox id-​drawwiet stabbiliti jew il-​mod xieraq kif taħsibha l-​komunità, sabiex ma jġibux tmaqdir fuq il-​kongregazzjoni Kristjana jew fuq l-​isem t’Alla.—2 Korintin 6:3.

Lanqas m’għandna ninsew il-​kuxjenza mogħtija lilna minn Alla. In-​nies kollha jitwieldu b’sens taʼ dak li hu sewwa u dak li hu żbaljat, dak li hu tajjeb u dak li hu ħażin. (Rumani 2:15) Il-​kuxjenza tagħhom tgħidilhom dak li hu normali u xieraq u dak li hu offensiv jew mhux naturali, sakemm ma tkunx ġiet mgħawġa jew twebbset bi prattiċi kontra n-​natura. Jehovah irrefera għal dan il-​fatt meta ta lill-​Iżraelin il-​liġi tiegħu kontra ż-​żwieġ bejn il-​qraba. Naqraw: “La tagħmlux bħalma jagħmlu fl-​art taʼ l-​Eġittu fejn kontu tgħammru, u tagħmlux bħalma jagħmlu fl-​art taʼ Kangħan li se nġibkom fiha; timxux skond il-​liġijiet tagħhom.” (Levitiku 18:3) Il-​Kristjani jgħożżuha l-​kuxjenza tagħhom ibbażata fuq il-​Bibbja u ma jħalluhiex tiġi korrotta mill-​mod mgħawweġ kif il-​ġnus jiddeċiedu dak li hu tajjeb u dak li hu ħażin.—Efesin 4:​17-19.

Allura, x’nistgħu nikkonkludu? Waqt li l-​Kristjani m’humiex taħt il-​Liġi Mosajka, il-​kuxjenza tagħhom tgħidilhom b’mod ċar li ż-​żwieġ bejn il-​membri taʼ l-​istess familja—bħal per eżempju missier u bint, omm u iben, ħu u oħt—huwa inaċċettabbli għalkollox fil-​komunità Kristjana.a F’każ li r-​relazzjoni ġenetika taʼ bejn l-​individwi tkun iktar imbiegħda, il-​Kristjani jirrikonoxxu li hemm liġijiet u statuti li jiggvernaw iż-​żwieġ legali u li hemm livelli li huma aċċettabbli soċjalment u kulturalment. Dawn irridu nqisuhom b’attenzjoni kbira sabiex inkunu nistgħu ngħixu fi qbil mat-​twissija Skritturali: “Ħalli jkun iż-​żwieġ tagħkom miżmum fil-​ġieħ minn kulħadd.”—Lhud 13:4.

[Nota taʼ taħt]